مساعده فى اسطوانه دبرياج kia rio

**nooodyme** · 05-12-2008 05:41 PM

يا شباب انا محتاج مساعدتكم

عندى الدبرياج تقيل جدااااا وغيرت الكابل اكتر من مره بيفضل يومين كويس وبيبوظ تانى

فى التوكيل بيقولولى العربيه عايزه ديسك واسطوانه

بس انا شايف ان العربيه بتسحب معايا زى الفل ومش بتقطع ولا اى حاجه خالص

كنت محتاج اعرف الاسطوانه لما تبقى بايظه اعراضها ايه؟؟

**SAMER_ENGINES** · 06-12-2008 02:42 PM

الإسطوانة لو بايظة تلاقي العربية مش بتسحب و تلاقي و انت بتدوس علي دواسة البنزين كأني العربية مش واخدة غيار و انت بتدوس علي الفاضي امبالي يعني و تستمر كدة شوية و تروح فجاءة واخدة سرعتها بس بعد عذاب لكن اني الموتور يقطع من الإسطوانة فده ميحصلش علي حد علمي و تلاقي الفتيش تقيل كمان و انت بتنقل او بيزعق و تسمع صوت فيه مع النقلات و لو حاولت تطلع أمريكاني بالعربية هيكون صعب و مش هيبقي في عزم في العربية خالص عشان تأمرك بيها و كمان الموضوع بيظهر جدا في مطالع الكباري و في اي مطالع بصفة عامة و حتلاقي ريحة شياط او زي ريحة الشياط نتيجة حرق بواقي اجزاء التيل و الظغط علي الإسطوانة عشان العربية تسحب هي دي الأعراض اللي تعرف بيها اني الإسطوانة بايظة و للإصلاح هتحتاج اني ميكانيكي يحل لك الفتيس او الموتور عشان يجيب اسطوانة الدبرياج و عادة حل الفتيش بيكون اسهل و ياخد الاسطوانة و يقولك هنعملهالك و يروح يعملها عند حد متخصص فرامل و دبرياج و يحاسبوا و ياخد منك الطاق اتنين و تلاتة فأنت تقوله حل لي الإسطوانة و روح عند اي حد اعملها انت لانه لو عملها هو عند المحل بتاع الفرامل و الدبرياج بـ 20 مثلا حيقولك 60 فنصيحة الميكانيكي يحل بس و انت تروح تملا الإسطوانة و تشوف التيل اللي هيركب فيها و البرشام و كله قبل ما تركب و تروح تاخدها و الميكانيكي يركب و تحاسب الميكانيكي علي الحل و التركيب بس, أتمني أكون افدتك.

**ahmedsrs** · 06-12-2008 05:45 PM

الأعراض دى اعراض تلف بلية وفرش الفرش لما بيتنى بيخلى الواير يقطع كل شوية وسحب العربية بيبقى عادى جدا

**nooodyme** · 07-12-2008 05:47 PM

الف شكر يا جماعه على المعلومات دى
بس يا ريت الاخ ahmedsrs يقولى يعنى ايه فرش؟؟
مع العلم ان العربيه طبيعيه خالص ماعدا ان الدبرياج تقيل

معلش اخوك ضعيف خالص فى الميكانيكا

**ahmedsrs** · 07-12-2008 09:56 PM

الفرش ده الأسم الدارج لحاجة اسمها الفورك ( الشوكة ) وهى قطعة معدنية شبه الشوكة بتضغط على البلية اللى بتضغط على الأسطوانة لفصل الحركة والفرش ده الى بيبقى ماسك فيه الواير بتاع الدبرياش لما بيتقطم او يتنى بيفصل عادى بس كل شويه بتعلى الدبرياش عشان تعادل كمية الأنثناء وساعتها الواير بيضقر فى حديد الفتيس ويتقطع كل شوية وكل شوية تغيره ارجو اكون وضحت الصورة

**nooodyme** · 08-12-2008 12:42 AM

الف شكر يا باشا على المعلومه وعلى اهتمامك

**memoii** · 12-12-2008 09:19 AM

أنا عندى فكرة يا Nooodyme .. انت تولع فى العربية عشان العين بس و بعدين تستعملها عادى جدا هتلاقى كل الاعراض راحت خالص ....
هههههههههههههه
بهزر معاك انت عارف .... نتقابل بالليل :)

اه بقولك ايه .. اكيد الناس هنا ظبطوك على الاخر و مش ناقص غير ان انت تعمل بقه البتاع اللى مصدعك ده ...