الموضوع: مشكله فى موبينه لانسر كريستاله ..العربيه بتبطل وانا ماشى

السلام عليكم ورحمه الله ..
ارجو من الساده الأعضاء المشاركه فى حل مشكله قربت تجننى
انا معايه لانسر كريستاله 98 الشكل القديم ارنبه ..ماتور 1300 كاربراتير
العربيه كانت بتعمل دخنه سوده وتستهلك بنزين كتير وتبطل وانا ماشى
روحت لميكانيكى فى المنصوره قالى العربيه مقدمه كهربا جامد وفيه مشكله فى الاسبراتير
لما فك الأسبراتير لقى فيه ودن مكسوره ولقى الشاكوش مكسور ..جابلى فارغه من عنده وقالى روح للكهربائى انقل محتويات الاسبراتير بتاعك فى الاسبراتير ده ..
روحت للكهربائى نقلهم وتمام ...للعلم الفارعه اللى نقلت الاسبراتير بتاعى فيها بتاع عربيه بطه
ركبت الاسبراتير ونضفلى الكربراتير وقالى الكاربراتير بتاعك كويس جدا ولسه جديد
خدت منه العربيه ماشاء الله السحب محترم وبطلت دخنه وبقى استهلاك البنزين محترم 550 كيلو فى التفويله على الطرق المفتوحه بسرعه 110
لحد هنا كله تمام
المصيبه بقى
بعد ما امشى بالعربيه 150 - 200 كيلو العربيه تبطل منى
تنتش مره واحده بس واجى ادوس بنزين مفيش استجابه ومش سامع صوتها دايره
يدوب افك الغيار القيها نورت لمبات الطبلوه انها مبطله
احاول ادور متدورش ...مع العلم انها فى الحاله الطبيعيه بتدور من اول تكه
اقفل الكونتاك واسيبها شويه تبرد وادور تدور وتبقى تمام وامشى شويه وتبطل تانى وهكذا
فى اول مره تبطيل بيبقى بعد مسافه كويسه زى ما قولت 100 كيلو 150 كيلو ..لما تبطل بقى اول مره متبقاش ملزمه بمسافه كل شويه تبطل ...تمشى سريع تبطل ..تمشى بطىء تبطل ..اوقات تتجنن ويدوب متمشيش نص كيلو على سرعه 60 تبطل
فى الوقت ده اغير بوجيهات تتظبط نوعا ما
يعنى تبطل كل 20 كيلو كل 50 كيلو
الكهربائى قالى دى مشكله موبينه
الموبينه بتسخن وتفصل
غيرت الموبينه بموبينه صينى ...اللى لقتها ...نفس المشكله ..العربيه بتبطل لما امشى بسرعه لمده تزيد عن نص ساعه
روحت لميكانيكى تانى ..قالى دا عيب فى الموديل ده ولازم تغير الاسبراتير من بابه
دلوقت انا فى حيره ..خايف اغير اسبراتير والمشكله متتحلش
افيدونى
للعلم
-انا غيرت كل الفلاتر بنزين زيت هوا قولت جايز فلاتر
-العربيه اوقات كتير ابقى جاى من مشوار وعايز ابطلها القيها تقعد تندع كدا مش عايزه تبطل لازم افتح الكونتاك تانى واقفله
داخل البلد مبيظهرش معايه عيب التبطيل دا نهائيا
وشكرا لصبركم ومنتظر اهل الخبره ...اغير اسبراتير ولا اعمل ايه ؟؟؟؟؟؟؟؟؟؟؟؟؟؟؟؟؟

وجزاكم الله خيرا مقدما

الأسبراتير اللى اشتريته طلع مغير موبينه برضو ....واضح انى نحس اوى