ماروتي: إيه سبب المشكلة دي لما بأسخن الماروتي؟

السلام عليكم

لما بآجي أدور الماروتي الصبح و أسخنها بتدور عادي من أول مرة و أشغل الشفاط علشان تسخن و صوت الموتور بيكون تمام، و بعد دقيقة أو دقيقتين بيبدأ صوت الموتور يكركر مرة واحدة كأنه عاوز يقف فمهما أعلي أو أوطي الشفاط بتفضل تعمل كده لحد ما العربية تفصل. لو دوست بنزين قبل ما تفصل الموتور بيظبط و تكمل تسخين عادي.

و برده (مش عارف ده له علاقة بالموضوع و لا لأ) و هي بتسخن الشكمان عندي بينطر نقط هباب علي الأرض زي اللي في الصورة المرفقة. هو الهباب بيفضل ينزل لحد ما العربية تسخن بس و بعد كده بيبأي تمام. و بعد ما مؤشر الحرارة يوصل للـC العربية بعدها بتبأي تمام و تمشي كويس.

فهل حد يعرف إيه سبب الموضوع ده؟ :U_thin1[1]:

ملف مرفق 15687

و عليكم السلام يا أخ هشام

من غير علامات تانية مميزة ممكن يكون السبب حاجات كتير أوى...

- مية الرادياتير بتنقص و العربية بتسخن أو المؤشر مبيرجعش قبل النص بسهولة و القربة الاحتياطى مليانة؟ جوان وش السلندر عايز يتغير و بسرعة جدا
- مية القربة الاحتياطى بتتشفط و تنقص أول بأول و مبتلحقش تقعد؟ جوان وش السلندر فى أوله و برضه لازم يتلحق بسرعة
- المية كويسة و مش بتنقص و مفيش سخونية؟ حاجة من تلاتة: طقم كهربا (بوجيهات و أبلاتين و كوندينسر) أو سير الكاتينة عايز يتظبط أو الاحتمال الأضعف أوى شوائب فى البنزين
- غالبا لو سير الكاتينة عايز يتظبط حتحتاج برضه تغير طقم الكهربا للأمان ... متستخسرش.

و ربنا يعافيك و يعافينا

نبتدى بالسهل
تنظيف الكاربيراتير بالهواء ومنظف الاسبراى للكاربيراتير- نفخ فيلتر الهواء او تغيره بس كدا
نتابع العربيه هل فى تحسن ولا لا

سؤال:
حاله العربيه ايه؟ عامله كام كم؟ بتاكل بنزين- مياه- زيت؟

طمنا عملت ايه؟

اقتباس:

---

المشاركة الأصلية كتبت بواسطة salam100100

نبتدى بالسهل
تنظيف الكاربيراتير بالهواء ومنظف الاسبراى للكاربيراتير- نفخ فيلتر الهواء او تغيره بس كدا
نتابع العربيه هل فى تحسن ولا لا

سؤال:
حاله العربيه ايه؟ عامله كام كم؟ بتاكل بنزين- مياه- زيت؟

---

كلامك سليم
وجود هباب من فتحة الشكمان يعنى نسبة وقود غير متناسبة(نسبة الهواء الى البنزين ) يعنى ضبط كربراتير

أنا آسف جداً علي الـتأخير في الرد .. و أشكركم علي الإجابات المفيدة.
- بالنسبة لفلتر الهواء ما فيهوش أي مشاكل.
- العربية حرارتها كويسة جداً الحمد لله و نادر لما المؤشر يوصل للنصف.
- مياه الرادياتير مش بتقل إلا بسيط أوي، و الإربة طبعاً مليانة و بأتابعها كل فترة.
- العربية عاملة 47,000 كم. بس عمري ما قست موضوع سحب البنزين ده قبل كده. أول لما البنزين يقرب يخلص بأملي التانك و خلاص :)

.. أما الكاربيراتير فأنا اشتريت منظف الاسبراي فعلاً و إن شاء الله أنظفه و أشوف النتيجة. ده اقتراح جميل.