العربية أتبهدلت سااااعدوني النترا 94

**الدكتور** · 24-04-2017 09:03 AM

السلام عليكم ورحمة الله وبركاته
أول حاجة حابب أشكركم أستفدت منكم كتييير.. أنا أشتريت النترا 94 أوتوماتيك من أسبوعين و قاريبي هو اللي بيفهم في العربيات و كلفته بالمهمة دي و أنا أبيض مش بعرف حتى أسوق و هو خدها ظبطها.. بعد كده سمعت أن العربية دي تدبيسة جامد و ملهاش قطع غيار و لا حد بيفهم فيها طبعا قلبي أتحصر و لأني مش بعرف أسوق بقى كل واحد يعملي خدمة و ينقلهالي يمصلح عليا و يستغلها في مشاوير و خلافه.. و بعد ما جبت خالي يعلمني السواقة للأسف دخل بينا في حفره سوده خرشم العربية و بعد ما طلعوها و كلت طوب و صخر بالهبل طلعت مش عايزه تدور و دورناها بالعافيه و كل ما نغير dاوr تبطل و بقت تحدف يمين و مش عارف أوديها لمين عفشجي و ميكانيكي بيفهموا في الموديل ده و أنقلها إزاي و الفرامل طبعا مش تمام و أنا ساكن في أكتوبر و هل أتدبست فعلا مع العلم أنا كنت عاوزها أوتوماتيك و كل اللي معايا كان 55 الف تمنها و أستلفت عليهم عشان أظبطها.. و الله قلبي بيتعصر من الحصرة بذات بقى لو هي مقلب.. للأمانه البايع كان مجدد رخصه 3 سنين و مغير بطاريه جديده و العفشه تمام و كوتش و جنوط سبور و مظبط التكيييف و عامله 220الف كم.. و شكرا ليكم جميعا..

**kh_fawzy** · 24-04-2017 10:12 AM

كان في ميكانيكي زمان في امبابه كان متخصص اوي في الموديل دة والموديل اللي بعدة كان في شارع الوحدة وتقريبا اسمه ماهر

**الدكتور** · 24-04-2017 10:15 AM

ما تعرفش حضرتك فين بالظبط أو أسم الورشة و التليفون ربنا يكرمك

**kh_fawzy** · 24-04-2017 02:03 PM

انا مش فاكر رقم التليفون بس هو في شارع الوحدة في امبابه بتمشي علي الكورنيش لحد كوبري الساحل وبعدين بتدخل شمال مع الكوبري وبتعدي اول تقاطع وبعدين هو تمشي شويه صغيرين هو كان قبل واحد بتاع شكمانات

للأسف دة اللي انا فاكرة لان الكلام دة كان من سنين ياعني انا مش متاكد أصلا لو كان لسه موجود بس هو كان شاطر ومتخصص في الانترا 94 و 96 وسونتا 96

**الدكتور** · 24-04-2017 04:14 PM

متشكر جدا لحضرتك يا باشا

**الدكتور** · 24-04-2017 04:15 PM

حد يرد يا جماعة محتاج ردودكم

**الدكتور** · 24-04-2017 04:17 PM

أنا مش بعرف أسوق و اللي هيسوقهالي مره و يدبس في المشوار مش معقول هفضل أطلب منه كل شويه يوديها في حته..

**الدكتور** · 24-04-2017 04:19 PM

عايز ميكانيكي النترا 94 أوتوماتيك بيفهم فيها بجد و عفشجي كويس عشان ما أطلبش من قريبي كل شويه يوديها و يجيبها

**doooom** · 24-04-2017 05:21 PM

احم..
افضل حل من وجهه نظرى
جووووووووجل
ابحث عن حلول المشاكل ف المنتديات
اكيد هتلاقي ارقام و عنواين ميكانيكيه
بالتوفيق
واكيد لو بحثت من جوجل ع مويل عربيتك واخر البحث نايل موتورز هيجيب لك المشاكل وحلها و الورش ..