مشكلة صعبة جدا متعلقة بثبات الفيات اونو 93 - هل من حل؟

**سامح شاهين** · 06-05-2017 11:15 AM

السلام عليكم

يعني في موجة ارتفاع اسعار السيارات الاخيرة، صرفت نظر عن بيع الفيات اونو 93 اللي معايا والترقية للأحدث
وقررت أوجه الميزانية اللي معايا (5000ج : 10000ج) لتضبط وتحديث الاونو
معايا اونو 93 ايطالي 1000cc وعربية ممتازة وخفيفة - واسعة نسبيا - موفرة في البنزين - الخ (اكيد حضراتكم عارفين مميزاتها)
لكن المشكلة اللي استدعت اني افكر في تغييرها هو الثبات في السفر
فانا عاوز اعرف هل من الممكن ضبط او تحديث العربية بحيث ثباتها يزيد في السفر؟

مشكلة السفر بالنسبالي واللي اتمني حد يفيدني لو ليها حل
بغض النظر ان العربية ثابته لحد سرعة 80 فقط، ودي بالنسبالي مش مشكلة لأني مش هازود في السرعة عن 80 عموما، ولكن المشكلة الكبيرة بالنسبالي:
ان العربية بحس انها بتعوم مني!!! او بمعني ادق ان تعريجات الطريق هي اللي بتمشّي العربية!!!
ممكن ابقي ماشي علي سرعة 70، ويكون الطريق متعرج شوية (طالع ونازل) الاقي العربية بتروح لوحدها يمين وشمال!! وبضطر افضل ماسك ومكلبش في الدريكسيون طووووول الطريق عشان العربية ماتروحش مني يمين او شمال!!
ولما برجع والله بلاقي نفسيا تعبان نفسيا وجسمانيا من السفر، طول الطريق قلقان + مكلبش في الدريكسيون عشان العربية ماتميلش مني يمين او شمال!
اخر مره ماشي علي سرعة 80 والطريق كان متعرج شوية (الدولي من برج العرب لاسكندرية) وصادف ان جمبي تريلا كبيرة،، والعربية للاسف مالت مني فجأة وكانت هاتدخل في التريلا وانا محمل العيلة معايا في العربية، لكن ربنا الحمدللة ستر.

والله يا جماعة الموضوع دا تاعبني نفسيا، وانا ماليش في العربيات اوي، مش عارف كل الفيات اونو كدا، ولا ايه بالظبط
وهل لو كان الدريكسيون باور - ماكانتش المشكلة دي حصلت؟ علي اعتبار ان الباور مش بيلف في ايدك يمين وشمال علي حسب تعريجات الطريق.
انا ممكن اصرف علي العربية اي حاجه، المهم احس ان العربية ثابته علي الطريق السريع المتعرج، ومش بتروح لا يمين ولا شمال
اعمل ايه يا حضراتكم ياريت تفيدوني

**rotanamasoud** · 06-05-2017 10:41 PM

الاونو عوامه كانت بتمثل لى رعب الطرق السريعه الحمد لله مكنتش بتاعتى كانت بتاعت واحد صحبى
مميزاتها الجباره كلها جوه المدينه بدون شرح
افضل تحسين للثبات كله شغل عفشه وجنوط وكاوتش
حتجنط وتعرض الكاوتش لاعلى قيمه ممكنه
حتروح لعفشجى محترف يظبطلك اى شغل فى العفشه
يوطى العربيه ولو فى سوست ناشفه ركب
بعد كل ده مش حتوصل لحل قوى
فى حل تانى الفليشيا فى سعر الاونو
عيب الفليشيا (هو مش عيب بس الشعب المصرى)انهم بيقولو انها بتسخن وده بيعتالج بسهوله
اوسع بكتير من الاونو عن تجربه
اثبت بكتير جدا جدا عن الاونو عن تجربه
محرك 1300 جيد فى السفر
يعنى نفس مميزات الاونو داخل المدينه ونفس مميزات الاونو فى رخص قطع الغيار مع زياده محرك اقوى ووسع اكبر وثبات اكبر بكتير
الاونو حتتفوق فى استهلاك بنزين اقل

**سامح شاهين** · 07-05-2017 08:13 AM

المشاركة الأصلية كتبت بواسطة rotanamasoud

يوطى العربيه ولو فى سوست ناشفه ركب

السوست دي اللي هي المساعدين؟

**borio1704** · 07-05-2017 11:58 AM

المشاركة الأصلية كتبت بواسطة سامح شاهين

السوست دي اللي هي المساعدين؟

دي السست:

ودي المساعدين

وفيه حالات بتبقى الاتنين مع بعض... بس غالبا بنغير المساعد بس من غير السستة.

السست بتشيل حمل العربية... والمساعدين بتقلل من الاهتزازات بتاعت السستة علشان العربية تثبت عالطريق.

أتوقع إن جزء كبير هيتحل عند حضرتك لو جبت مساعدين جداد... واضح إن المساعدين عندك بايظين.

بعد ما تغير المساعدين... ركب طقم كاوتش وجنوط محترم وانسى التعويم..

المشكلة بس إن طقم الكاوتش والجنوط ممكن يكلفوك حوالي 10 آلاف جنيه مستريح.

...