السلام عليكم ورحمة الله وبركاته
الساده الاعضاء المحترمين
عايز استشاره بسيطه بس مش هايعرف يجاوب عليها الا حد خبير شويه
انا بصراحة عندى موتسيكل Bajaj Pulser 180 اسود اشتريته من الزيرو بصراحة لم يحدث معى اى مشاكل وقطع غياره متوفره واصليه وسعرها معقول واستهلاكه فى البنزين ممتاز جدا وكل حاجه فيه محترمه جدا جدا وشغال معايا زى الفل وانا مشوار شغلى من الهرم لجسر السويس كل يوم يعنى تقريبا بنتكلم فى ٦٠ كيلو يوميا وعامل بيه لحد دلوقتى حوالى ٨٠ الف كيلو وغيرتله بستم مره واحده من حوالى شهرين ودلوقتى اكنى راكب موتسيكل جديد بصراحه وماعنديش فيه اي مشكله خالص .
وانا بصراحه بفكر انى اجدد واجيب Bajaj Pulser 200NS خلال الثلاث شهور الجايين زيرو برده بس سعره بقه حوالى ٣٠ الف وهنا المشكله بصراحة لانى اعرف ان الهوندا بنتكلم فى نفس السعر تقريبا لو حاجه صغيره مش ريس CB 4 يعنى او مثلا اى هوندا من ٢٥٠ الى ٤٠٠ CC لانى مش هاقدر اركب ريس وكده وكمان محتاج قاعده شويه مريحه ومش بحب كمان الصوت العالى .

اسف اذا كنت طولت ... انا فقط محتاج نصيحة مفيده من حد فاهم كويس .... هل اخلينى فى الزيرو بقطع غيار اصلية متوفره بكثره وكذلك مراكز خدمه كتير جدا وانا بجد مجرب الكلام ده على الحقيقة مع Bajaj

ولا هوندا مستعمل او استيراد زى مابيقولوا ... ولو هوندا ادور على موديل ايه وسنة كام ومايكونش ريس ايه ( مع العلم انا مش بتاع سرعه يعنى ١٢٠ او اكتر شويه كفايه جدا جدا ) وهل صيانته سهله وقطع غياره متوفره ويعنى ايه افراج جمركى والكلام ده ومن الآخر هل الهوندا المستعمل بجد هايكون افضل من الBAJAJ الزيرو .

وانا عارف انى ماينفعش اقارن الهوندا بال BAJAJ ..... بس انا راجل عملى بتاع شغل مش منظره عايز موتسيكل احط المفتاح واجرى على الشغل واحط المفتاح اخر اليوم اجرى على البيت لا يعلق ولا يتساب عند ميكانيكى يومين تلاته عشان مش لاقيله قطعة غيار وكده والحركات دى

انا اى مشكله فى ال BAJAJ بخلصها فى ساعتين ثلاثه يوم الجمعه فى مركز الخدمة يعنى كمان مشاء الله مش بيقف بيا لا ده انا اللى بحس بالحاجه وباروح اخلصها يوم الجمعه ....


سؤالى ده لإنى بصراحة كنت بركب عربيات ودلوقتى راكن العربية من اربع سنين الا للضرورات وبتحرك بالموتسيكل ومن ساعتها بصراحة حياتى كلها بقت افضل بكتير . عشان كده محتاج نصيحة لوجه الله تكون من ناس فاهمه كويس جدا جدا ومجربه . وجزاكم الله خيرا كثيرا .