اوبل فيكترا دي لو قدامى ببلاش مش هاخدها
عربيه متعبه جدا وميغركش الصور وميغركش ال 1600 والكلام ده
مش هتلاقيلها قطع غيار نهائيا ولو لقيت هتكون نادره جدا وعلشان مش موجوده فاى حد هيبعلك حاجه هيستغل الحاجه وهيديهالك باضعاف تمنها وهتكون مجبر تشتري
يعني من الاخر برده قطع غيارها غاليه جدا جدا
ومفيش ميكانيكي بيفهم فيها حتى لو صنايعي محترم
الاكسيل الهاتشباك جميله وقطع غيارها ممكن لا مؤخذه تلاقيها عند البقال
ميزه الكورى كله ان قطع غياره منتشر بشكل غير طبيعي ورخيص جدا
وخد بالك ان الميكانيكا بتاعت الاكسيل ( كلاسيك ) يعني مش ملخبطه
لو جبت اى صبى حتى فى اى ورشه هتلاقيه بيشتغلك فيها
ابعد عن اى عربيه المانى او فرنسى او انجليزي ( من الاخر يعني خليك فى حدود الكورى واليابانى فقط )
الكورى معروف هيونداى وكيآ دول افضل ماركتين ( الاكسيل هيونداى )
اليابانى سوزوكي و ميتسوبيشى وهوندا - ( بس لو هتجيب يابانى خليك فى الميتسوبيشى ( لانسر مثلا ) )
عايز اوضحلك حاجه اهم من كل ده
مستحيل تجيب عربيه مشدوده بسعر مناسب لان اللى بيبيع مش بيشد ( اللى بيبيع عربيه بيلمها ويوفقها علشان تتباع ويخلص منها يعني معندوش اى قبول انو يصرف من جيبو عليها جنيه زياده )
الاكسيل الهاتشباك ممكن تجيبها فى رنج التلاتين وخلى بالك الهاتشباك غير السيدان
وقع فى سعرها على قد ما تقدر لان الهاتشباك سوقها مش مفتوح زي السيدان
تاني حاجه متشتريش اى عربيه مغسوله
لان اى حد عايز يلفت انتباهك بما انك مبتدئ وجاي تشوف العربيه هتلاقيه غاسل العربيه جوه وبرا وحاطط فواحه بقى ومروش عليها عشان تتزهل بالمنظر لان الناس اللى فى البدايه دايما طبيعتهم بيجرو ورا المنظر
فالطبيعه هتجرى ورا النضافه وهتنسى الاساسيات والمصايب اللى فيها
واتعلم انك لما تبص على عربيه حط فى دماغك انك مش هتشتريها وحاول تطفش البيعه حتى لو عاجباك ( فاصل يعني )
قالك 38 قولو 28
متوقعش الف والفين زي ما الناس معتقده
وقع بال 10 عشان توصلو لحلول وسط عشان وقت ما توصل لحل تلاقى نفسك وقعت منها بتاع 7 ولا 6 الاف جنيه ودول هينفعوك لو فكرت تشدها بعد ما تجيبها
لقيت مفيش استجابه للفصال اخلع بالعقل وقولو مش عايزها وقدامى حاجه تانيه افضل
اهم حاجه تاخد ميكانيكي او سمكرى يتمنها ويكون صايع وبيعرف يفاصل