مطلوب مساعدة عاجلة بخصوص سيارة دايو لانوس 2 2006
بسم الله الرحمن الرحيم
لو سمحتوا يا جماعة أنا معروض عليا سيارة دايو لانوس 2 موديل 2006، هي بتاعة خالي وعاملة 48 ألف كيلومتر بس وده عشان هو مش بيستخدمها كتير ومعظم الوقت راكنها.
هي فيها كذا مشكلة لما جربنا نسوقها فكنت عاوزة أعرف بس حل المشاكل دي صعب ولا لا وهيتكلف في حدود كام، وهل كدة اشتري العربية ولا بلاش احسن.
1- أول حاجة هل يمكن إجراء الصيانة الدورية للعربية في التوكيل الرسمي؟ عشان اتقاللي من بعض الناس انها عشان دايو فمش تبع التوكيل وانها لازم تكون شيفروليه.
2- لما بتدي النقله اولاني أو تاني أو تالت وتدوس بنزين الrpm بيعلي وبيوصل لـ 3 والعربيه مبتمشيش بنفس المقدار، يعني عزم علي الفاضي أكنك بتدوس بنزين علي الفاضي، وده مش فاهمة سببه ايه ولا تكلفته كام.
3- تيل الفرامل عاوز يتغير ضروري.
4- العربية محتاجة بوجيهات أكيد.
5- فيها بارومة خفيفة جدا فوق العجل على طول زي نقط كدة او دواير صغيرة محتاجة سمكرة.
6- الاكصدام الأمامي محتاج تغيير عشان مكسورحاجة بسيطة ومش الأصلي بتاعها، أما الخلفي محتاج رش بسيط كدة.
7- التكييف مفيهوش فريون ومحتاج يتشحن وأكيد هحتاج أكشف عالتكييف عموما.
8- محتاجة كمان اغير حاجة عبيطة جدا هي الموكيت بتاع الشنطة وأوضب الشنطة من جوة عشان متوسخة جدا ومتبهدلة وعاوزة اعرف اعمل ده فين وهيتكلف كام برضه تقريبا.
*العربية بشكل عام نظيفة جدا وفتيسها ودبرياشها خفاف جدا وفرشها وصالونها في منتهى النظافة وزي ما تكون زيرو والموتور زي الفل وما اتلعبش فيه والعفشة كويسة الحمد لله ولسه متغيرلها 4 فرد كاوتش السنة اللي فاتت كمان ومتجابلها بطارية جديدة من اسبوعين وشكلها من برة نظيف جدا والبارومة مش باينة غير مع التدقيق ومن قريب.
*محتاجة من الخبراء في الدايو لانوس 2 يقولولي الحاجات دي هتتكلف في حدود كام تقريبا وكمان عاوزة مركز صيانة كويس جدا ويا ريت لو معتمد يكون في حلوان وكمان قطع غيار مضمونة في حلوان.
يا ريت ما تبخلوش عليا في النصايح، دي اول عربية اشتريها ولسه هتعلم السواقة كمان.
