السلام عليكم
هل شراء السكوتر يعتبر موفر عن استخدام السياره و لا يعتبر من باب الرفاهيه ؟
حسب ما سمعت عن سعر بيع السكوتر بيكون فيه خساره كبيره عشان هو صيني و مش بيستحمل الاستهلاك
برجاء الإفاده و النصح بأفضل نوع و الميزانيه في حدود 20 الف
جزاكم الله خيرا
هو فعلا موفر لكن اخطارة اكتر من السيارة. انا اشتريت سكوتر ب 20 الف و بيعته بعدها بشهر ب 17 الف و كان ماشي 80 كم. بيعته عشان عندي موتسيكل و ما حبيتش الاسكوتر مقارنة بالموتسيكل. اكتر الانواع عملية هو sym و كله صيني ما تقتنعش ب ايطالي و الكلام ده. موفر في البنزين طبعا حوالي 30 كم في اللتر. لو مشاويرك زحمة ووسط البلد و اشارات كتير اعتقد هينفعك جدا. لو سفر و طرق مفتوحة مش هتلاقي فرق جامد لان ليه استهلاكات كتير زي زيت و سير و بكر سحب و كده. اهم حاجه تشتري سيفتي خوذة و جوانتي علي الاقل و يا ريت تشتري ركب و كيعان و جذمة سيفتي كمان.
زى مالزميل svneleven شارك وهزود حاجتين
الاسكوتر حلو جدا جوه البلد لو حجمه صغير مش كبير , انا معايا هامرز اف 10 ال250 س س , حجمه كبير عن ال sym
ومشويرك قصيره
وفيه ركنه امان - عشان لو ملوش ركنه محترمه هيتبهدل بسرعه
https://www.nilemotors.net/Nile/499621-a.html
https://www.nilemotors.net/Nile/501813-a.html
فى حاجات بسيطه احنا اللى بنسوق عربيات مبنحسش بيها زى سواقين الموتوسيكل زى:
* دخان عادم السيارات- انت وانت جوه العربيه لو شميت ريحه عادم بتقفل الزجاج- انما وانت على الموتوسيكل هتشم هتشم
* شويه مياه فالشارع: بالعربيه مبيهمكش- بالموتوسيكل بتاخد بالك جدا عشان متتزحلقش وعشان متترتش على هدومك وكمان بتحاول تتجنب تقف فالمياه وتنزل رجلك وتبل الجزمه
* الركنه فعلا مسسبالى مشكله - بخاف يتسرق فجبتله انظار وقفل
* الهواء زى العادم كدا مبتعرفش تهرب منه بسهوله
* العربيات بتستقل بالواحد تلاقيهم بيكسروا عليك بدون سبب مهم مصتصغرنى
* الرعشه- الموتوسيكل فيه رعشه بتدايق بعد فتره من السواقه دى مش موجوده فالعربيه
* السخونه: بعد نص ساعه بتحس بسخونه طالعه من تحت
* الخوزه هى امان لمن بتحسسك انك مخنوء
بص انا بحب الموتوسيكلات وبسوق كتير - انا بحاول اوصلك كل الفروقات بين الموتوسيكل والعربيه عشان لما تشترى موتوسيكل يكون فى بالك بعض النقاط عشان متبقاش متضايق منه
وفيها ايه ان الواحد يجيب اسكوتر للرفاهيه- انا معايا اسكوتر وموتوسيكل والاثنين للرفاهيه
دلع نفسك وهات واحد ولو معجبكش بيعه وادى الواحد جرب حاجه جديده واتعلم
هات حاجه ماشيه اقل من 5000 كم ويكون موديل مش قبل 2015
تكون ثانى يد
بالتوفيق انشاء الله
حاجه تانيه فرق بين العربيه والموتوسيكل
التحرك بالموتوسيكل بياخد وقت اكتر من العربيه وهشرحلك
اولا بتشيل الغطاء من على الموتوسيكل
بتفك الجنزير
بتدور الموتوسيكل وتستنى يسخن
تشيل الغطاء والقفل تحت الكرسى
ممكن تنظف الكرسى عشام ممكن يكون عليه تراب
تلبس الخوذه
تقفل الجاكيت
تلبس الجاوانتى
تظبط المرايات عشان ممكن تكون بتتحرك من مكانها وانت بتشيل الغطاء
كدا انت جاهز تتحرك
فالعربيه انت بتنزل المساحات بتدور وتطلع :)
شكرا لحضراتكم جدا علي هذه المعلومات الوافيه