احســــاس الزيـــــرو - موضوع مثير
السلام عليكم
تحياتى للشباب البروتونيين و اللى ناويين
طبعا كلنا عارفين و شوفنا و جربنا فى عربياتنا سواء دى او قبل كده او عربيات اصحابنا يعنى ايه عربية زيرو
العربية الزيرو برائحة الفابريقة من اول ما تاخدها و تطلع ترخصها بقى و المشوار البايخ اياه بتاع المرور
وبعد كده التليين و تروح تعمل اول صيانة و تبقى هاتتجن على العربية و عايز تطمئن عليها و هى فى الورشة و الود ودك لو تلبس الافارول و تنزل تقف معاها
بيبقى الواحد ماشى خايف عليها من الهوا و يغطيها فى الجراج و يقعد يختار انسب مكان للركنة علشان ماتتخطبش
وبعد لما ياخد عليها يبتدى قلبه يجمد شوية و يمشى عادى فى الشارع من غير قلق
و تفضل بقى ماشى الصيانات الدورية مع بعض الملاحظات الطفيفة لحد ماانبهارك و فرحتك بالعربية الزيرو تبتدى تقل لحد ماتحس انك راكب عربية مستعملة و هاتبدى تفتح بقها و تبقى عايز تبيعها و تجيب واحدة زيرو
طبعا الكلام ده مانطبقش عليا خالص و عمرى ماحسيت مع عربيتى انى راكب عربية زيرو من كتر زياراتى المتكررة للتوكيل
انا كنت عايز انطبعاتكم و ارائكم فى قصة الزيرو دى و من امتى بدأتم تحسوا ان العربية بقت مستعملة و زهوة و فرحة الزيرو راحت عند كام كيلو متر
ملحوظة : الموضوع ده خاص بالاخوة الافاضل اللى معاهم العربية البروتون عموما ياريت بقى بلاش المداخلات المستفزة وواحد صاحبى كان معاه وجارى كان معاه و النيسان احسن و اللانسر مافيش احلى من كده و الكلام ده مع احترامى الشديد بلاش الناس الفاضية تدخل تقول اى كلام بره الموضوع الاصلى