السلام عليكم

دى أول مشاركه لى فى منتدى فولكس .. أنا كان معايا فولكس باراتى موديل 2004 وبعتها ولكن حبيت اشارك معاكم بموضوع حصل معايا ...

بعد ما اشتريت العربيه وكان جاى معاها مفتاح ريموت وكان الريموت شغال تمام وبعد شويه عطل وبقيت اقفل وافتح العربيه بالمفتاح .. واتصلت بمركز الصيانه وقالى اكيد الريموت عطل علشان اتحط جنب موبيل او سماعات وان أنا لازم اروح ليهم علشان يبرمجوه ومش فاكر قالوا هدفع كام على اساس ان ده عيب استخدام وملوش دعوه بالضمان .. المهم ما عجبنيش الكلام وقعدت ادور على النت لحل للمشكله دى ولقيت حلول فى مواقع بالانجليزيه ولكن لموديلات تانيه مش للباراتى .. ولكن قلت اجربها ومانفعتش وقلت احاول انا من دماغى ( عملت طبعا حاجات قريبه من الفكره اللى بتنفع مع الموديلات التانيه ) والحمد لله اخيرا برمجته واشتغل ...

ودى الطريقه اللى انا برمجت بيها الريموت ...
تجيب المفتاح اللى الريموت بتاعه عطلان وتدور بيه العربيه وبعدين والعربيه دايره تدوس على الزرار اللى فى الريموت 3 مرات ورا بعض وبعدها هتسمع صوت الكلاكس ( لفتره صغيره جدا كأنك ضغطت على الكلاكس وشلت ايدك بسرعه ) وبعد كده هتلاقى الريموت اشتغل زى الفل ...

ولو حد الريموت بتاعه مش عطلان وحب يجرب مش هيحصل اى مشاكل وهيسمع بس صوت الكلاكس بعد الـ 3 دوسات ...

واللى عنده اى موديل تانى وعنده مشكله فى المفتاح او الريموت ممكن يعمل بحث على النت وان شاء الله هيلاقى حل ...
وعلى فكره الموضوع ده مش منقول ودى تجربه شخصيه ...

وآسف للاطاله ...