الموضوع: غلطة وندمان عليها .. !!

أكبر غلطه إن أنا اشتركت في نايل موتورز عشان بقي إدمان.ولو غلطه تانيه بس لحد دلوقتي مش عارف أحدد إذا كانت غلطه أو مش غلطه هي اني سافرت

انا كمان بوست ايد بابا مرة واحدة لما كان تعبان اوي
ولما توفى ندمت اشد الندم اني ما بستوش كتير
وندمت اكتر اني مبوستش ايده لما توفى قبل الغسل
الله يرحمه ويرحم جميع موتانا

المشاركة الأصلية كتبت بواسطة Bossy_Fadl

اول غلطة اني غلطت في حق انسان عزيز عليا جدا غلط كبير بس للاسف كنت صغيرة و مكنتش اعرف

ثاني غلطة (هي غلطة و مش غلطة) اني سيبت كلية صيدله و دخلت كليتي بس هي كانت امنية حياتي من و انا صغيرة ادخل كليتي فعشان كده مندمتش اوي

ثالث غلطة لما رفضت عرضين للتدريس في جامعتين و انا في سن صغير جدا و كان المبرر الاهبل خجلي من الطلبة اللي كنت في الغالب هابقي اصغر منهم

موضوع جميل كالعادة من ملكة الاجتماعي

ميرسي ليكي يا احلي نور علي الفكرة الحلوة

و لو افتكرت غلطات تانية هابقي اجي اقولهالك (:

حبيبتشي يا بوسي موضوع الكليه ده بالذات حصل معايا وحمدت ربنا بعد كدة لما عرفت حكمته او ظهرت حكمته في المستقبل
يعني متندميش عليها لسه حكمة ربنا هتظهر لك في المستقبل
ميرسي على مشاركتك يا قمر المنتدى

الموضوع جميل فعلا و عايز اقول على غلطتى الكبيره عشان الناس تاخد عظه منها و يمكن بس اطول فى الشرح شويه يا ريت متزهقوش بس المهم انى استفدت كويس من غلطتى و ياريت اى حد يقرا الكلام بتاعى ده يستفاد هو كمان
الموضوع بدأ بعد ما خلصت الجيش على طول و طلعت عشان ادور على شغل زى اى شاب علما بأنى الحمد لله من اسره كويسه و ميسوره الحال الى حد كبير. الفتره دى كانت فتره سيئه اوى و كنت معنديش اى خبره فى اى حاجه و كنت قااااعد فى البيت مش بعمل اى حاجه غير كده و انى اخرج مع صحابى بس انا كنت على علاقه كويسه جدا بربنا الحمد لله و كنت اصلى الوقت بوقته فى المسجد و كنت اقوم الليل و مبطل سجاير و كنت متدين لدرجه كبيره و كنت نفسى اشتغل فى مجال الكمبيوتر بس للأسف مفيش اى خبره و روحت ادور على شغل فى شركات الكمبيوتر حتى انى كنت بعرض كتير انى اشتغل منغير مرتب بس عشان اخد فكره و اخد خبره ، و جيت فى يوم كنت يائس جدا و نفسيتى تحت الأرض قولت ما اصلى و ادعى ربنا ماهو انا مفيش ادامى غير كده ، و فعلا اليوم ده قومت بالليل و اعدت اصلى و ادعى ربنا انى اشتغل فى شركه كمبيوتر حتى منغير مرتب و حسيت بجد بقربى من ربنا اوى اليوم ده و بكيت كتير وانا بدعى ربنا ، المهم نمت اليوم ده و الصبح نزلت اصلى الظهر فى المسجد كالعاده و بعد ما خلصت صلاه السنه لقيت واحد جارى مليش علاقه بيه اوى يعنى بيسلم عليا و بيقولى تحب تشتغل فى شركه كمبيوتر ، انا طبعا مصدقتش نفسى و قولتله بس هشتغل ايه ،قالى هتشتغل مدير الشركه ، طبعا انا مصدقتش نفسى و فرحت جدا و قولتله يا ريت ، قالى تعالى دلوقتى نروح لصاحب الشركه وتعمل مقابله ، المهم روحت و عملت المقابله و الراجل اعجب بيا جدا و قالى تحب تستلم من امتى قولتلو بكره الصبح قالى اتفقنا ، المهم انا قولت الحمد لله وفعلا تانى يوم استلمت الشغل ، قابلتنى مشكله كبيره و طبعا هى انى معرفش اى حاجه فى الكمبيوتر و دى اول مره اشتغل فطبعا قلقان و خايف و مش فاهم اى حاجه فى اى حاجه ، المهم طبعا رجعت لربنا تانى و اعدت ادعى انى ابقا كويس جدا فى شغلى و افهم فيه كويس ، و الحمد لله ربنا استجاب دعايا تانى ولقيت نفسى مرتبى بيزيد بعد اسبوعين بالظبط و لقيت نفسى ناجح جدا فى شغلى لحد ما جه يوم و اصحاب الشركه اختلفوا مع بعض و نتيجه لأنى كنت ناجح جدا فى شغلى و كنت كمان بجيب شغل كتير للشركه لقيت الأتنين صحاب الشركه عايزين يشاركونى فى شركه خاصه ، طبعا انا صليت استخاره و قبلت عرض من الأتنين و بدأنا و عملنا الشركه و الشركه نجحت و عملنا مع الشركه سايبر كبير والسايبر نجح و عملنا سايبر تانى و لقيت فلوس كتير بتدخل و لقيت نجاح جامد اوى والحمد لله و قعدت سنتين على كده و هنا بدأ الأنهيار ،
بدأت اغتر بنجاحى و بدأت اسيب الصلاه شويه شويه و بدأت اعمل معاصى و بعدين كبائر و اصحاب السوء طبعا كانوا كتير اوى و بدأت اهمل فى شغلى و الشغل طبعا بدأ ينهار و يخسر و وكل حاجه بدأت تبوظ و اصرف على شغلى من رأس مالى و بدأ الصحاب يختفوا و كل حاجه تروح و كل اللى عملته فى السنتين دول تقريبا راح المهم لما لقيت كل حاجه راحت اعدت افكر و فى يوم جمعه كان قبل اول الشهر و مش معايا فلوس اكمل مصاريف الشركه و السايبرات روحت اصلى الجمعه و كان بقالى فتره مش بصلى الجمعه و بعد ما الصلاه خلصت و الناس مشت من الجامع اعدت اصلى لوحدى و ادعى ربنا و روحت سايبر من الأتنين و اعدت مستنى الفرج من عند ربنا ، و فجأه لقيت واحد جاى يعمل رساله ماجيستير كبيره جابت فلوس الحمد لله كويسه اوى سددت مصاريف الشهر للشركه و السايبرين مع العلم ان فى سايبر من الأتنين كنت قفلتوا و بدفع ايجاره لأنو مش بيجيب حاجه و مقدرش اشغل فيه عماله المهم صليت تانى و دعيت ربنا انه يتصرف و يهدينى للصح اللى ممكن يظبطلى الأوضاع ، وانا قاعد لقيت واحد جاى يشترى منى السايبر و دفع فيه مبلغ كويس اوى يعوض الخساره وانا وافقت بس المشكله انى عشان ابيع السايبر ده كان لازم ارجع المحل التانى بتاع السايبر المقفول عشان الضرايب المهم فى يوم ما بعت السايبر ده لقيت واحد جاى تانى يشترى منى السايبر التانى المقفول و منغير اجهزه و منغير اى حاجه يعنى هيدينى فلوس بس عشان اسيب المحل و امشى و فعلا بعتو و فضيت الشركه و فى نفس اليوم ده كان والدى و ووالدتى رايحين الحج وفى نفس اليوم دخلت فى شركه تانيه انا واخويا و عملنا مشروع جديد خالص عملنا محل نجف و موبيليا و الكلام ده من سنتين بالظبط و الحمد لله المحل النهارده من اكبر المحلات بتاعت النجف و الحاله بقت كويسه اوى و الدنيا رجعت تانى تبقا كويسه بس مع الفرق المره دى انا اتعلمت الدرس كويس اوى و ندمت و رجعت لربنا و عمرى ان شاء الله ما هبعد عنه تانى .
اللى انا كتبته ده يا جماعه كله حصل و مكدبتش فى اى حاجه فيه و يا ريت اى حد يقرا الكلام ده يتعلم منه و و ياخد منه عبره و فى الآخر عايز اشكر اللى اقترح الموضوع ده و تحياتى للجميع