السلام عليكم و رحمة الله و بركاته

أزيكوا يا جماعة

حبيت أحكيلكوا حاجة حصلت معايا النهاردة الصبح عشان الكل ياخد باله

الصبح رن الجرس و أنا نايمة

ماما راحت تفتح الباب

فتحت لقت واحدة من اللي بيحفظوا كلام هما نفسهم مش فاهمينه و بيرصوه كله ورا بعضه و يا ويلك لو قاطعتهم

أنا أول ما سمعت الديباجة دي صحيت عشان نومي خفيف

أنا أوضتي جنب باب الشقه فإستنيت أسمع عشان أعرف هي هتقول إيه

لقيتها بتقول إحنا حملة مجانية من كلية الزراعة بنرش الحمامات عشان الوقاية من الجراثيم و الحمله دي اجبارية

أنا سكتت لإني سمعت كلمة كلية الزراعة اللي ألقت علي الموضوع صبغة مهنية حكومية بما لا يدع مجال للشك

و قالتلنا علي فكرة كل الجيران اللي فوقكوا و اللي تحتكوا رشوا و مش فاضل غير انتوا

ماما صدقت طبعا و دخلتها..و كل ده و أنا واقفه بأسمع في أوضتي

المهم الست قالت لماما أنا هأدخل أرشلكوا بنفسي مادام انتوا ستات قاعدين لوحدكوا

أنا أبتديت أقلق بصراحة

الرش ده حاجة Chemical و مينفعش اي حد مش Professional يتعامل معاها

يبقي إزاي دي داخله ترش من نفسها كده و لا حاطه ماسك و لا حتي لابسه جوانتي

ما علينا...قولت يمكن مش حاجة خطيرة أوي

خلصت بقي و وقفت عامله نفسها مشغولة جدا و بتكتب في وصل معاها و بتكلم ماما

ده يا مدام وصل بالرش و فاضلكوا كمان مرتين

هنجيلكوا يوم 17/1 و يوم 17/2

عايزين بقي من حضرتك 29 جنيه دمغة رمزية عشان الرش

انا سمعت كلمة دمغة رمزية مقدرتش استحمل

29 جنيه دمغة؟!!!!!!!!

روحت طالعالها بقي

كله الا إن حد ينصب عليا

أنا:إنتي تبع ايه يا انسة؟

هي:كلية زراعة

انا:طيب بطاقتك؟

هي:مانا وريت للمدام الكارنيه بتاعي مش لازم البطاقة

أنا:ماما ادخلي اتصلي بالجيران و شوفي عملت معاهم ايه دي(قدامها و لا هاممني عشان عارفة اخرتها)

ماما دخلت اتصلت بجارتنا قالتلها لا طبعا مرشيناش ...المكالمة مكانتش لسه خلصت بس ماما قالتلي من جوه انهم مرشوش

أنا:إنتي مش قولتي للمدام ان كل اللي فوق رشوا

هي عملت نفسها بتكتب في وصل تاني عشان متردش

أنا:انتو بقي ايه بالظبط حضرتك؟

هي:احنا تبع شركة Donia service و مكلفين من كلية الزراعة؟

أنا:دنيا ايه حضرتك؟

هي:دنيا سيرفس

أنا:ليه هي كلية الزراعة عويله مش عارفة تعمل الحملة بنفسها فمكلفه شركة تعملهالها؟

و أساسا الحكومة يوم ما بيعملوا حملات زي دي مبياخدوش حتي ربع جنيه

خدي الوصل ده و إجري من هنا و مشوفكيش هنا تاني قبل ما تطلعوا إنتي و اللي معاكي دول علي القسم يا إما هندهلكوا البوليس او الاحلي من البوليس كمان...بوابين الشارع

البنت خدت الوصل من ايدي و خدتها جري علي السلم و ندهت اللي بينصبوا في الدور اللي فوق عشان ينزلوا و نزلوا جري هما كمان

ماما خرجت من اوضتها تقولي ان جارتنا قالتلها إنهم جم من حوالي تلات سنين برضوا و قالوا نفس الكلام و قالوا هيعدوا بعد شهر و محدش شافهم بعدها

و اتصلوا علي الرقم اللي كان في الوصل قالهم إن دي شقه كانت متأجرة يوم واحد بس و اللي مأجرينها سابوها.

حبيت بس انبهكم يا جماعة عشان الكل ياخدوا بالهم

انا ساكنة في حي الهرم عموما عشان كده تنبيهي في المقام الاول لسكان الهرم و فيصل لأن ممكن يكونوا بينصبوا بس في الحي ده

بس عموما ياريت الكل ياخدوا بالهم و كل واحد يحذر قرايبه و معارفه