الايموليزر السيراتو ٢٠١٠

**m_elbog** · 08-04-2020 08:53 PM

ليا استفسار بخصوص شفرة المفتاح السيراتو ٢٠١٠ في موجة السيول اللي حصلت على مصر شهر مارس الماضي كنت حريص جدا اني مستخدم العربية نهائي وفعلا كانت مركونة وبعد انتهاء موجة السيول نزلت بها مشوار ولما بطلت العربية وجيت ادورها مكنتش عاوزة تدور بعد محاولات كتيرة جدا دارت بصعوبة روحت على طول الكهربائي فدخلت بالجهاز اكتشف انه المشكلة في الايموليزر بتاع العربية المهم فك الكنترول وغير اي سي باور واي سي ايبرون وركب واشتغلت العربية كويس جدا لكن للأسف علامة الايموليزر اختفت من التابلوه ولما شيلت الهوائي بتاع المفتاح وجربت ادورها دارت برضة من غير الهوائي واللي يتغير المسئول عن تعريف المفتاح الكنترول فعاوز اعرف بما ان الجروب هنا فيه قامات كبيرة وخبرة عالية في السيراتو فأنا عاوز ارجع العربية زي ماكانت بالشفرة اعمل ايه.

**sala7** · 13-04-2020 12:56 AM

السلام عليكم

شوف يا استاذي الفاضل
اسوء حاجه بيعملوها الكهربائيه بتوع المفاتيح علشان يريح دماغه من وجع القلب ومن ناحية تانيه ان اغلبهم ما بيعرفوش يبرمجوا شفره صح ، فا كلهم نفس المدرسة يفك ال chip ويعمل ايبروم بالغاء السيكتور اللي عليه بيانات الشفرة علشان يريح دماغه من الزبون و ياخد القرشين و السلام عليكم

حضرتك علشان تحل الموضوع ده هتحتاج حاجه من ٢ يتعملوا
١- يا هتروح تعمل ايبروم تاني و ترجع بيانات الشفرة و الكلام ده عن واحد تخصص كيا و عارف هو بيعمل ايه مش (عند واحد كهربائي وخلاص اللي هما بتوع كل شي ان كان) - و متسالنيش مين علشان للاسف انا ماعرفش حد فاهم في مصر
٢ - يا تروح التوكيل بكنترول نفس رقم اللي عندك و تخليهم يبرمجهولك .

تحياتي