الموضوع: رؤيتى **

توفيق باشا....إزيك

والله يا باشا إنت بتقراء أفكاري......أنا فعلاً فرحت بالعرض في الأول وبعدين قاعدت أحسبها على سبيل المثال لصيانة الـ20 الف القادمة.....إجمالي المبلغ 440جم.....ده شامل 140جم فلتر هوا و260جم مصنعيات....يعني لما تخصم 5% من 400جم هيخصم 20جم بس!!! يعني إجمالي المبلغ 420جم......إصراحة مش فارقة خالص
طبعاً مشكور كل من ساهم في هذا العرض عشان بس ماحدش يزعل....أنا مش بقلل من المجهود المبذول....بس فعلاً العرض ماهواش وهمي ( أبو عبدالله....والله مجهودك ربنا يجازيك عليه )

وعشان ماحدش يقول أنا متحيز....نفس الحال عندي في عرض توكيل رينو.....مع إني مش باروح التوكيل كتير....بس شايف برضه إنه عرض مش وهمي ( ماتزعلش مني يا د.أكمل إنت مجهودك فوق راسنا...بس هو ده أخرهم )

انا باتفق معاكم برضة
بس الحقيقة انا لما لمحت لـ م. أحمد عبد الوهاب كان الرد دبلوماسي زيادة وهو إن الأصل في العرض مش مادي على أد ماهو المقصود منه تقدير الإدارة العليا في دايهاتسو لينا وعلى إن العرض على كل الصيانات الخاصة بالسيارة وليست الصيانات الاستتثنائية مثلاً

هو أنا برضه فكرت فيها شوية لاقيت إنه مثلاً لو عمل خصم لأعضاء نايل موتورز يصل الى 25% هاتلاقي كل الشعب المصري بيجري عشان يشتري الإستيكر بتاعنا من غير ما يكون لي علاقة خالص بالمنتدى.....وما أسهل إنتشار الخبر في البلد دي وهاتلاقي العملية بأت سبهلله

عملياً 25% خصم واسعة شوية يا عمرو :)
يعني حتى لو 10% هاتبقى قابلة للتطبيق شوية

كلام جميل ولا اختلف معاكم فيه
ولكن دي بداية يا اخواني
والناس حبت تعبر عن تقديرها لنا
يعني نوع من اشعارنا بالاهتمام من قبلهم

وان شاء الله تتوالى العروض بإذن الله بس متقطعوش

وعلى فكره المقابلة بتاعت شهر يناير ان شاء الله هتبقى تحت رعاية دايهاتسو مصر كلها
يعني احنا هنحدد الميعاد وهما عليهم الباقي ان شاء الله
انا بلغت اهه من بدري
الناس بقه تعمل حساباتها ان شاء الله

انا متفق مع رأي إن الخصم مهواش مادي قد ماهو رمزي عشان التوكيل يبين إهتمامه بتجمع مجموعة من عملاؤه (اللي هما إحنا) و تقديره لهم خاصة إن المقابلتين خاصة الأخيرة كانوا ما شاء الله صورة مشرفة لدايهاتسو .. و تقدير التوكيل بان من التواجد في المقابلة الثانية خاصة و المهندس محمد عبد الصمد من أوائل الناس اللي حضرت في المعاد مزبوط و قعد للأخر .. و مهندس أحمد عبد الوهاب كان ناوي يقعد المقابلة كلها لكن حصلت ظروف .

و زي ما قال أبو عبد الله .. المقابلة الجاية إن شاء الله تحت رعاية دايهاتسو مصر مش إحنا اللي هننظمها زي كل مرة .. مجرد هنعمل إستفتاء علي مكان التجمع (مصر الجديدة- مدينة نصر - 6 أكتوبر .. إختيار المنطقة يعني) و هنبلغهم و هما هيقوموا بالباقي .

كمان فيه ميزة الحمد لله عليها تحققت من خلال المقابلات إن أصبح فيه جو من الصداقة بين الملاك و بين بعضهم .. و بين الملاك و مهندسين التوكيل .. يعني الواحد بيبقي رايح التوكيل مستريح نفسياَ و عارف إنه هيمشي مبسوط بإذن الله ولو حصل مشكلة حقه مش هيضيع لأننا عرفنا الناس دي عن قرب و أصبحنا عارفين إنه توكيل محترم و بيروح من عنده أي شك سببه تجربة سابقة في توكيل تاني لسيارة سابقة و صورته المكونة مسبقاَ عن التوكيلات .. و بيروح يسلم علي المهندسين و يدردش معاهم في جو من الصداقة و بيبقي عارف هيقابل مين من قبل ما يروح و دي ميزة بصراحة بمليون جنيه .. كفاية إن بقي ممكن الواحد يتفق مع ملاك أخرين و يروحوا يعملوا الصيانة مع بعض فا الموضوع مش جاف بالعكس أعتقد ده أهم من العرض المادي .

انا رأيي إن بعيد عن الخصم يتم مناقشة غلو أسعار الصيانات عموماَ بالنسبة لسيارات دايهاتسو لأنها غالية فعلاَ .

المشاركة الأصلية كتبت بواسطة أبو عبدالله

ولكن دي بداية يا اخواني
والناس حبت تعبر عن تقديرها لنا
يعني نوع من اشعارنا بالاهتمام من قبلهم

وان شاء الله تتوالى العروض بإذن الله بس متقطعوش

المشاركة الأصلية كتبت بواسطة MoToRiZeR

تقدير التوكيل بان من التواجد في المقابلة الثانية خاصة و المهندس محمد عبد الصمد من أوائل الناس اللي حضرت في المعاد مزبوط و قعد للأخر .. و مهندس أحمد عبد الوهاب كان ناوي يقعد المقابلة كلها لكن حصلت ظروف .

كمان فيه ميزة الحمد لله عليها تحققت من خلال المقابلات إن أصبح فيه جو من الصداقة بين الملاك و بين بعضهم .. و بين الملاك و مهندسين التوكيل .. يعني الواحد بيبقي رايح التوكيل مستريح نفسياَ و عارف إنه هيمشي مبسوط بإذن الله ولو حصل مشكلة حقه مش هيضيع لأننا عرفنا الناس دي عن قرب

مفيش كلام كتير ممكن اضيفه بعد كلام ابوعبدالله و محمود

العرض ده اظنه بداية من جانب التوكيل, لأنه فعلا فى تقدير كبير من جانبهم و اهتمام بالمجموعة دى لأن سبحان الله كلهم بلا استثنماء ناس قمة فى الاحترام و الذوق, و عندهم حب مساعدة الاخرين, و دى حاجات قلما الواحد الواحد يلاقيها اليومين دول, ما بالكم بمجموعة كبيرة زى اسرة الدايهاتسو ... ربنا يبارك فيهم جميعا

اهتمامهم ده ظهر بداية من طلب م/محمد عبدالصمد حضور المقابلة الثانية, و اهتمامه بميعادها, و حضورها قبل الميعاد كمان, ده بالاضافة الى وجوده على الجروب الخاص على الفيس بوك ... و مننساش المجهود اللى بيبذله م/احمد عبدالوهاب لتذليل اى عقبات تقابل اعضاء الموقع فى التوكيل

تخفيض 25% اظنه صعب جدا يا اساذ توفيق, يعنى غالبية التوكيلات لو عملت تخفيض بيبقى المتعارف عليه 10%, و فى حالات قليلة 15%