كما هى رائعة تلك السيارة....
http://www2.0zz0.com/2008/07/30/05/965411983.jpg
الحمد لله والفضل لله عملت صيانة ال 10,000 كم من كام يوم
وهحاول اقيم العربيه فى صور نقاط للمميزات والعيوب من وجهة نظرى كسائق للعربيه ومالكها من 8 شهور
المميزات:
1- الشكل الخارجى المتميز
2- وضعيه القيادة المريحه ذات الرؤيه الجيدة للطريق
3- السحب القوى للموتور (وما ادراك)
4- نعومة الفتيس الاتوماتيك وسلالسة تغيير الغيارات بدون ما تحس
5- المرونة فى المناورة
6- ثباتها فى السرعات العاليه والمنحيات
7- عزل ممتاز
8- عفشه ناعمة
9- تكييف اتوماتيك قوى وفعال بصورة ممتازة
10- تابلوه فخم جدا وشيك
العيوب:
1- صوت ماكينات رفع الزجاج عالى وخشن يعنى مافيش سلاسة
2- الازاز اللى جنب السائق هو الوحيد الاتو اللى يترفع مرة واحدة اما الباقى لازم تفضل دايس على الزار لحد ما يترفع
3- مافيش شاشة عرض بيانات السيارة زى استهلاك البنزين والرسايل المختلفه زى الميجان
4- استهلاك البنزين عالى نوعا ما مقارنتا بالميجان
5- الباور استيرنج هيدروليك وطبعا بيبقى اتقل من الكهربا وان كان ميعتبرش عيب لان العربيه تعتبر رياضية ولكن كنت افضل انه يكون كهربا
6- مافيش مرايات ضم
الحقيقة ده تقريبا معظم الحاجات اللى انا مبسوط منها واللى مضايق منها فى المازدا 3
انا هعمل مقارنه سريعه بينها وبين الميجان
لانى اجرت الميجان اتوماتيك فى مصر لمدة 28 يوم الاجازة اللى فاتت موديل 2006 وعملت بيها حوالى 2500 كليو
الميجان:
عربيه واسعه
شكل خارجى شيك
وضعيه قيادة مريحه
اوبشنز ظريفه
عزل اكتر من ممتاز
مجملا:
1- المازدا تتفوق فى التسارع والسحب القوى ، لان السحب كان مضايقنى اوى فى الميجان ، الحقيقة فرق كبير بين السيارتين
2- المازدا تتفوق فى الفتيس الاتوماتيك من سلاسة النقل بين الغيارات
3- كشكل خارجى اظنهم متساويين
4- كراحة داخليه الميجان تتفوق على المازدا
5- كثبات اظنهم متساويين
6- كاوبشنز الميجان تتفوق
7- كفرامل الميجان تتفوق لان فراملها اقوى من المازدا وده كان عاجبنى اوى
8- كخامات للمواد اظن المازدا تتفوق لان الميجان كانت ايد الابواب الداخليه متقشرة وده كان مضايقنى اوى
9- كوسع داخلى الميجان تتفوق بشده
10- كقوة تكييف المازدا تتفوق بشده
11- استهلاك البنزين افضل بكتير فى الميجان من المازدا
12- كعزل للصوت الميجان تتفوق على المازدا وان كان المازدا عزلها مقارب ولكن مش زى الميجان
13- الباور الكهربا فى الميجان احسن من الباور الهيدورليك فى المازدا
مجملا العربيتين انا مبسوط جدا منهم
وبجد بلاقى متعه حقيقية فى سواقة العربيتين دول
ملحوظة:
التقييم والمقارنة لم يشمل خدمات الوكيل وأسعار قطع الغيار وسعر اعادة البيع