الحمد لله وبفضله قررننا شراء سيارة جديدة للاسرة المهم ان انا ليا الخيار الاول فى اختيارها اول لما فكرت قولت اجيب حاجة كسر زيرو افضل من الزيرو يعنى اجيب موديل احسن بنفس التمن انا كنت حاطط فى بالى شوية عربيات وهما ( إلنترا-ماتريكس-لانسر-ياريس-افيو ) ومحدش يقولى دول فئات مختلفة معرفش بقى هى جت كده والانواع دى سواء زيرو او كسر زيرو المهم وانا بدور لقيت عربية ميجان مستعملة بحالة فوق الممتازة وانبهرت بالعربية وخلتنى مش شايف غيرا وكانت ظروفها كويسة من حالة وسعر وصاحبها راجل محترم ويشاء الله انها متكونش من نصيبى من غير سبب واضح ( كنا متفقين وكل حاجة بس يظهر الراجل كان مستعجل جدا ) وبعدين لقيت كورولا 2004 ورحت اتفرجت عليها وعجبتنى وكان شكلها نضيفة واتفقنا فى السعر وافاجأ عند الفحص ( اللى كان صاحبها مش موافق عليه فى الاول ) ان العربية لاتمس تويوتا بشىء إلا التصميم تقدر تقول متصنعة فى الحرفيين اتضح انها كانت عاملة حادثة رهيبة وأتصلحت واترشت بس طبعا لايمكن ترجع تانى لقينا الشاسيه معووج والنصف الخلفى متغير بالكامل ودايرة الكهربا متغيرة وحاجات غريبة كتير وحسبى الله ونعم الوكيل فى الناس والله صاحبها كان أستاذ جامعى بس الحمد لله
وبعد هذا الموضوع رجعنا تانى للزيرو واول شىء أستبعدناه هو الماتريكس اللى كانت فى اول القائمة عشان حكاية التركى شفتها فى المعرض معجبتنيش حسيت ان فيه فرق فى الخامات وتقفيل الموتور عن الكورى ( قد يكون إحساس شخصى ) وحلت محلها الاكسنت ثم حلت الإلنترا مكانها عشان فرق السعر مش كبير المهم خلال الفترة دى عربيات كتير دخلت القايمة وطلعت تانى زى الصنى والسيتى والأوبترا والفيرنا
من الاخر حاجة تحير المهم المقارنة الحالية اللى مش لاقيلها حل بين اللانسر1300 مانوال من الوكيل والإلنترا المانوال قلبى يقولى إلنترا وعقلى بيقولى لانسر وبرضة شوية اقول انا اريح نفسى واجيب نيو اكسنت
بجد إحترت لدرجة ان انا كرهت العربيات كلها
وكمان قدامى ماتريكس 2005 عاملة 5000 كم بس ياريت حد يقولى تساوى كام ضرورى
او يحسملى المقارنة السابقة او اى حد يقول اى حاجة
وانا آسف على الإطالة بس بجد انا وصلت لمرحلة مش قادر آخد قرار