إحترت يا ناس

**Ahmed Anwer** · 13-08-2007 11:28 PM

هقول رأي هيزعل معظم الناس في المنتدي ، بصراحة العربيات الياباني في الفئة السعرية دي خدعة للمصريين كل ميزاتها إنها اسمها صنع في اليابان حتي الهوندا صنع في تايلاند ، الياريس و اللانسر موتور 1300 و عيب الثبات معروف في الإثنين بس هوا عشان الناس تتبسط و تقول جايبين حاجة ياباني و الصني شكل قديم و تقفيل مصري في الفئة السعرية دي اللي تقول عليها ياباني بجد السيريون فقط عربية صغيرة و غالية منطقي إنها تبقي ياباني
اعتقد في الفئة دي الكوري يكسب عايز تجيب ياباني يبقي اعلي بقه عن كده بكتير عشان تبقي بجد ياباني مش خدعة تسويقية
اللإنترا و الأوبترا هما أفضل إختيار في الفئة دي كحجم و إمكانيات
و رأيي الشخصي أي حاجة زيرو برقبة المستعمل حتي لو مرسيدس ، يعني تفتكر صاحبها عايز يبيعها ليه ؟؟

**Ahmed Hassan** · 13-08-2007 11:44 PM

المشاركة الأصلية كتبت بواسطة Ahmed Anwer

الياريس و اللانسر موتور 1300 و عيب الثبات معروف

الانسر 1300موتورها ضعيف شويه ممكن... لكن موضوع ان فيها عيب ثبات معروف.. دي بصراحه معلومه جديده جدا عليا.

بالنسه للياباني في ياباني فعلا زي السوبارو مثلا.. و سعرها منافس جدا... بصراحه صعب تقول ان الاوبترا و الالنترا منافسين سعريا للانسر خليجي مثلا (مع ان انا شخصيا افضل الالنترا عن الانسر)

**mada121977** · 13-08-2007 11:51 PM

اللانسر فى المرتبه الاولى و بجداره و اسال مجرب , عربيه ما شاء الله تحفه و عاليه عن الارض و سعر اعاده بيع ممتاز و قطع غيار متوفره و يابانى

**Ahmed Anwer** · 13-08-2007 11:52 PM

السوبارو ليس لها سوق في مصر و مش عارف ايه السبب فعلآ ، أنا أساسا معرفش اسم وكيلها في مصر ايه أنا بس بشفوها في معرض في شارع النزهة ، يمكن عشان شكلها مش طول بعرض متتملاش العين

**PRO-DRIVE** · 14-08-2007 12:09 AM

ابو غالى هو وكيلها

ثانيا العربيه ممتازة و كل حاجة فيها بس عندنا الناس اتبرمجت على لانسر و يارس و كورولا :? و معندهمش استعداد يغيروا انا فى راىى كورولا متسواش ربع تمنها نفسى اعرف فيها اية زياااده ؟؟ و يارس برضة سعرها مبالغ فيه المفروض تنزل 10 او كدا لانسر دى نفسى اشوف بلد فى الدنيا فيها 1/8 من الانسر اللى عندنا :? و فيها اية زياده برضة سعرها غااااااالى جدااا و نص مواصفاتها متاكله :shock: لكن دى محبوبه الشعب عاوز تشوف سوبارو كتير ولا عاوز تشوف كيا شييل شعارها و حط شعار تويوتا و انت تلاقى الناس بتقول عربيه ممتازة تمام و حلوه و معرفش اية بس عشان شعار تويوتا

**emadfk** · 14-08-2007 12:13 AM

فى رائى 1600 اللانسر حكاية ولا كورى ولا صينى ولا دياوله

**Ahmed Anwer** · 14-08-2007 12:29 AM

كلام سيادتك مضبوط تماما
بس أحب أضيف لكلام سيادتك ملحوظة ، الماركات الياباني اللي مش ناجحة في مصر الدايهاتسو و السوبارو رغم كل واحد يقولك اللانسر ياباني و الياريس ياباني و ده كفاية طب إشمعنا الماركتين دول يعني مهما ياباني برده و كمان ياباني عالي و اقرا عنهم سيارات مشهود لها بالتحمل و الكفاءة ،
الأول كنت فاكر العيب في قوة التوكيل بس حضرتك بتقوللي سوبارو وكيلها أبو غالي و دايهاتسو وكيلها عبد اللطيف الجميل يعني مفيش أقوي من كده
في رأيي الشخصي الماركتين مش ناجحين عشان متخصصين في compact car يعني تاخد كل اللي انته عايزه في العربية في عربية حجمها صغير أو متوسط و ده مبعجبناش في مصر عشان احد اسباب إختيارنا للسيارة المنظرة

**M_Abdallah** · 14-08-2007 12:57 AM

رأي هات اللانسر 1600 مانوال.

_______________
محمد عبدالله

**fahd_628** · 14-08-2007 01:08 AM

الانسر 1300 موتورها ضعيف شوية عليها و ممكن تشترى الانترا 1600 ( اقصد انك مش حتاخد سرعة و سحب ال 1600 و كمان موتور الالنترا 2007 حكاية جامد جدا ما شاء الله و 121 حصان اما ال لانسر فا حاجة و تمنين مش فاكر تقريبا 87 حصان )

فا لية تشترى عربية 1300 لما ممكن تشترى 1600 بنفس السعر و الأتنين عربيات ممتاازة جدا

انا بتكلم عن الانسر 1300

لكن لو بتفكر فى لانسر 1600 فا توكل على الله و هات لانسر

**ahmed1981** · 14-08-2007 02:22 AM

المشكلة إن صاحب الموضوع محددش السعر الي ممكن يدفعه يعني عايز عربية بحدود كام؟؟؟؟؟؟؟؟

لو حضرتك بتقارن بين الألنترا 1600 وبين لانسر 1300 فأنا رأيي رغم أني لم أركب ولا واحدة فيهم أن ال 1600 تكسب جداً
لأن مسألة كوري وياباني معدتش بتفرق كتير العملية قربت من بعض خالص
مسألة أن العربية الفلانية ياباني يبقى ال 1300 منها أفضل من ال 1600 كوري هذا كلام أراه غير منطقي بالمرة
وأنا أتكلم هنا عن ياباني تقفيل ياباني وكوري تقفيل كوري (مش تقفيل مصري)