مميزات وعيوب الالنترا2008

**migomax** · 22-01-2009 06:23 AM

العربية هايلة جدا..

الباور بتاع الدركسيون ده ميزة مش عيب.. بيسموه باور كهرباء.. وهو بيبقى خفيف جدا وانت واقف وكل ما تسرع بالعربية بيتقل.. وده بيخلي العربية ستيبل جدا على الطريق وانت على سرعات عالية..

لأنه لوانت غاوي سرعة .. وماشي فوق ال 100 ك 140 وانت رايح .. ولو الباور خفيف يعني النظام العادي وجيت تضرب مقص بين العربيات اللي حواليك العربية ح تحدف منك جامد ومش من السهل تلمها وخصوصا في المقصات الضيقة..

اما الباور بتاع الألنترا بيخليها ثابته جدا حتى وانت على طريق منحني وعلى سرعة عالية بتحس ان العربية ملتزمة بالحارة اللي هي عليها ومش بتهرب منك..

ومن مميزتها كمان وانك على طريق سفر وبيعدي منك عربيات نقل تقيل بمقطورة ما بتحسش قوي بخطفة الهوا اللي هو العربية تلعب منك وده دليل تاني على ثباتها..

العربية في حد ذاتها وعلى سعرها لما تيجي تقارنها من ناحية الرفاهية والشياكة والأداء بتتحط في صف السيارات الأعلى منها ثمن وبتتفوق عليهم كمان..

عيوبها الحقيقية.. ان غبور بخيل شوية في موضوع كمالياتها وانا من ناحية احساسي ان ما كانش تفرق معاه لو كان بيعمل بيها أوردر من المصنع.. يمكن تكون الجمارك ليها يد في موضوع ده..

عموما من وجهة نظري ناقصها نور القراءة اللي في السقف اللي بيبقى عند المرآة.. هو فيها في النص العادي .. المسند اللي بين كرسي السائق وكرسي اللي جنبه.. نور الفرامل الأستوب اللي في زجاج السيارة الخلفي.. والحاجات دي وفرها في الموديل الأعلى اللي بتزود فيه تقريبا 9000 الآف جنيه مع تكييف تاتش..

فراملها معقولة وبتمسك كويس رغم انها مش Abs ومافيهاش اير باج..

غير كده تسارعها وهمي وده بيخليها تفوق على العربيات التانية اللي ليها المواصفات تقريبا..
الباقي انت تحكيلنا عليه لما تركبها ان شاء الله..

**ahmed161075x** · 22-01-2009 04:15 PM

اشكرك على المعلومات الوافيه دى بس لى سؤال هى لما تحمل تلته ورا بتكون نازله قوى ليه كده ,,,,,,,,,, وعلى فكره انا محتار بين النترا وسيراتو ومشعارف اقرر لان سيراتو ارخص 8 الاف جنيه

**ahmed322** · 22-01-2009 05:46 PM

أنا ليا تعليق للاستاذ احمد اللى عايز يشترى عربيه سيراتو بص يا باشا انا محتار نفس الحيره زيك بالظبط بين الانسر والسيراتو والالنترا يس انا عمال اسأل على العربيات الكويسه فى السوق وهقولك على المعلومات اللى انا عرفتها من واقع تجربه وتجربه الناس الانترا عربيه زى الفل واحسن من السيراتو كمان ... بس عبيها انها كورى فى الاخر و انها واطيه اوى اوى ولما يكون فى حد قاعد وراء يكون العربيه فى الارض شويه و بتلبس اى مطب ... انا مش عايز اكرهك فى العربيه بس لازم قبل ما تدفع فلوس تعرف هتدفعها فين احسن

ثنايا السيراتو .. عربيه ممتازه جدا اعلى من التنرا كمان و عجلها احسن كمان و الثبات تقربيا نفس ثبات التنرا العربيه تقفيلها ممتاز لما تركبها ملقولش عليها كورى ابدا ..المانيول بتاعها ممتاز والاوتو كمان زى الفل محدش اشتكى منه بس
المشكله فى العربيه دى حاجه واحده انها تقيله جدا فى البيع زى بس غير كده العربيه ممتازه جدا

وعلى فكره التنرا غاليه على الامكانيات اللى فيها يعنى ايه رأيك لو تفكر فى الانسر الشكل القديم .. او تويوتا كورولا افضل حاجه فى السوق بجد عن تجربه

وانا ان شاء الله ناول اجيب لانسر

معلش طولت عليك بس كنت لازم اوصح ليك
اسف للأطاله

**migomax** · 22-01-2009 07:55 PM

المشاركة الأصلية كتبت بواسطة ahmed161075x

اشكرك على المعلومات الوافيه دى بس لى سؤال هى لما تحمل تلته ورا بتكون نازله قوى ليه كده ,,,,,,,,,, وعلى فكره انا محتار بين النترا وسيراتو ومشعارف اقرر لان سيراتو ارخص 8 الاف جنيه

هو الميزة اللي في السيراتو ان الفتيس مش اتوماتيك بس لأ ده استبترونك.. ودي ميزة لأنه يعتبر مانوال واتوماتيك في وقت واحد وهي من التقنيات الحديثة..

انا ما سقتش السيراتو علشان أحكم عليها بس من ناحية الأداء الأنترا أكيد أحسن من الأنسر البوما والتيوتا الكورولا الشكل اللي قبل الأخير.. بس هو أكيد السيارتين بياعين عن الألنترا.. لأن الناس في مصر ساعات كتير بينحازوا لحاجات كتيييييرغريبة.. والدليل لسه بنتج النصر 128 ..

شوف مكتب بيأجر عربيات وجرب العربية اللي نفسك فيها ده ح يخليك تقارن بسرعة وبنفسك..

ربنا يوفقك للصالح

**aboezz44** · 23-01-2009 02:43 PM

بسم الله
طيب ليه ماحدش بيفكر فى النيسان اصنى
عربيه ياباني
تقيله على الطريق
ماكينه بسم الله ما شاء الله 2 كامه
استهلاك البنزين معايا المانيوال عامله 260كم على الطوالى
والسعر 86000جم بس للمانيوال عربيه كامله يابانى 1 ايرباج
وتوكيل محترم من هنا للصبح
وربنا يهديكم للى فيه الخير

**KING_LEDO** · 23-01-2009 04:49 PM

نفسي ننسى الناس القديمه لانسر قديمه و لانيسان ملهاش اصل و اتلغت من التسعينات
ليه منستخدمش التكنولوجيا
على فكره الألنترا انا بأديها حقها بس (على فكره حغير خلاص) عربيه ممتازه استيبل و على السرعات كمان (كان لى موضوع عن السرعات بأسم الشد بين الشارك وبى ام و النترا
بالنسبة للمطبات الأستندارد مفيش مشاكل لكن مطبات ألأهالى و الفلاحين و معاك ناس كاملين في مشكلة ولكن خمسه و شنط و مليانه كل حاجه (داخل الغردقة مفيش مشاكل) سفر حتى الأسكندرية مفيش مشاكل غير مطب كمين الزعفرانه لازم تأخذه باعرض لو محملالى ذكرته)

**Silver_Arrow** · 29-01-2009 04:51 PM

المشاركة الأصلية كتبت بواسطة ahmed161075x

ايه حكاية واطيه عند التحميل من ورا

هي فعلاً بتهبط شوية وهيا محملة وممكن تحك في المطبات..بس عامةٍ كوسة

**tarekx** · 30-01-2009 08:02 PM

يا شباب انا معايه النترا 2008 البور الكهربا بتاع الدركسيون بيفصل بعد سرعه 90 ومعاه العربيه هيعرف خليه يعدي الي 90 وياكل غرزه وهوه هيعرف ان البور فصل وبصراحه العربيه الوحيده الي بخاف منها وانا سايقها مش شايف كبوت ولا اي حاجه ادامي بحس اني سايق طياره وبزعل لو لما بتتخربش او يجرلها حاجه بس ربك حليم ستار وبيسترها والله كتير اوي والواحد بيقول الحمد لله نصيحه اخويه اذا لم تكن سواق اوعي تشتري الالنترا

**migomax** · 31-01-2009 10:53 AM

المشاركة الأصلية كتبت بواسطة tarekx

يا شباب انا معايه النترا 2008 البور الكهربا بتاع الدركسيون بيفصل بعد سرعه 90 ومعاه العربيه هيعرف خليه يعدي الي 90 وياكل غرزه وهوه هيعرف ان البور فصل وبصراحه العربيه الوحيده الي بخاف منها وانا سايقها مش شايف كبوت ولا اي حاجه ادامي بحس اني سايق طياره وبزعل لو لما بتتخربش او يجرلها حاجه بس ربك حليم ستار وبيسترها والله كتير اوي والواحد بيقول الحمد لله نصيحه اخويه اذا لم تكن سواق اوعي تشتري الالنترا

أخي طارق.. الباور مش بيفصل لكن دي ميزة من مميزات البوار الكهربائي انك كل ما بتزود السرعة الباور بيتقل وده بيخلي العربية أكثر ثبات على الطريق وتقدر تغرز على سرعات عالية بثبات..
أما موضوع عدم روئية الكبوت فده في كل السيارت الحديثة وذلك لتقليل الأحتكاك مع الهواء ومقاومته..
فإذا كان السائق قصير القامة فالموضوع فعلا ممكن يكون صعب عليه..

**alivara** · 01-02-2009 11:48 PM

المشاركة الأصلية كتبت بواسطة migomax

أخي طارق.. الباور مش بيفصل لكن دي ميزة من مميزات البوار الكهربائي انك كل ما بتزود السرعة الباور بيتقل وده بيخلي العربية أكثر ثبات على الطريق وتقدر تغرز على سرعات عالية بثبات..
أما موضوع عدم روئية الكبوت فده في كل السيارت الحديثة وذلك لتقليل الأحتكاك مع الهواء ومقاومته..
فإذا كان السائق قصير القامة فالموضوع فعلا ممكن يكون صعب عليه..

قصير القامة ؟! الحمد لله ان الواحد طويل يمكن اشوف مقدمة العربية و فيه كمان حل سهل اوي فيه جزء صغير شيك كده بيتركب على مقدمة العربية عشان تعرف بيه نهايتها فين فتعمل حسابك و انا شوفته كتير فى النترا و ياريس خصوصا