مصر ما بقتش بلد الامن ولا الامان زي زمان

**thegoodhacker** · 13-01-2009 08:35 PM

ياجماعة بجد البلطجية و الصيع انتشروا في الشوارع بدرجة كبيرة تخلي الواحد ما يحبش يخرج من بيته غير للضرورة وبس....
السرقة بقت منتشرة سرقة العربيات و سرقة الشقق بقي خبر عادي كل يوم .....
دي العملية وصلت لدرجة تزوير عقود بيع شقق يعني عمي عنده شقة في العجمي وطبعا بيستخدمها كمصيف بس و العمارة من غير بواب راح النهاردة يطل علي شقته لقي واحد تاني ساكن فيها و مغير الكالون و لما عمي خبط وفتحله قاله انه شاري الشقة دي ووراه عقد الشراء كمان و طبعا عقد مزور .... ولسة عاوزين نشوف حل للمصيبة دي!!
ده غير الشوارع اللي ما بقاش فيها امان خالص .....
اول امبارح وانا ماشي علشان اروح اركب اتوبيس شغلي في الثانية ظهرا لقيت اتنين واقفين واحد منهم قالي السلام عليكم رديت عليه السلام و لقيته بيمد ايده بالسلام وانا طبعا ما اعرفهوش (وطبعا الواحد ما يامنش لحد ما يعرفهوش في الشارع خصوصا ان الولد ده كان معاه واحد واقف جنبه ) و فعلا عملت بالمبدا ده و عملت نفسي ما اخدتش بالي و كملت طريقي لانه اكيد المنظر ده ما يطمنش ووقفت عند مكان انتظاري للاتوبيس....... لقيت الولدين دول بيبرطموا في الكلام بالغلط وانا بصراحة عملت نفسي مش سامعهم علشان الموضوع ما يتطورش ..... الظاهر سكوتي استفزهم ولقيتهم جم عندي يكلموني وواحد منهم قالي انا جيت اسلم عليك علشان انا كنت باشبه عليك ... قلتله انا ما اخدتش بالي انك مديت ايدك بالسلام ثانيا انا ما اعرفكش.....
قالي انا معذور وعاوز فلوس علشان اركب المواصلات انا وصاحبي...... قلتله ماعيش فلوس خالص ....... راح واحد منهم قالي خلاص احنا عاوزين الشنطة اللي معاك دي ......
رحت بعدت عنهم شوية وزعقت فيهم باعلي صوت انتوا عاوزين ايه بالضبط روحو انجروا من هنا !! لقيتهم مشوا شوية قدام ووقفوا بعيد شوية بس كنت سامع صوتهم كانوا بيتفقوا علي حاجة و بعدين واحد منهم قال لا احسن ده صوته عالي وحيلم علينا الناس..... دقيقة لقيتهم جايين يقفوا ورايا ولقيتهم عاوزين يحاوطوني رحت متلفتلهم وهاتك زعيق فيهم وتطور الامر لمشادة كلامية و شتيمة مني ومنهم.....وبرضوا عاوزين يحاولوا انهم يرجعوا يحاوطوني تاني لغاية ما واحد ابن حلال وقف معايا وطفشناهم انا وهو لغاية ما ركبت اتوبيس الشركة ......
يعني ببساطة كانوا ممكن يثبتوني او علي الاقل بيصيعوا عليا في عز الظهر وفين في محطة مصر علي الشارع الرئيسي امام باب محطة القطار وفي وجود ناس كتير رايحة جاية في الشارع ..... انا مش عارف هو فين الامن ده وفين البوليس اللي سايب الصيع دي ماشية في الشوارع يعملوا اللي هم عاوزينه ؟
حسبي الله ونعم الوكيل في البوليس اللي مش مهتم غير بفض المظاهرات و ترهيب الناس عن كلمة الحق.... وحسبي الله و نعم الوكيل في الحكومة اللي خصخصت المصانع و قعدت الناس علي القهاوي ما يلاقوش اكل عيش غير بالسرقة او بالشحاتة....
بجد انا بقيت افكر في الهجرة من البلد دي علشان اخلص من القرف ده .....

**Busquets** · 13-01-2009 08:55 PM

كلامك سليم مليون فى المية

بصراحة الامن دا اخر حاجة ممكن اسمع عنها فى هذه الفترة!

انا والله نفسى اهاجر بعد ما اخلص كليتى!!

بس ازاى و هشتغل ايه و هعرف اعيش ولا لأ! دى اللى معرفهاش

مش معقول انى نايم فى بيتى و خايف اتسرق!

و مش معقول وانا ماشى فى الشارع شاكك فى كل الناس بسبب شوية ناس ملهاش لازمة!!

انا مرة زمان واحد قال لى ممكن الموبايل هحط فيه الكارت بتاعى اعمل مكالمه!

قلت له ماعيش موبايل! هو قال لى انا لسه شايفك بتتكلم فيه

قلت له مالكش دعوة مش هدهولك و هاتك يا جرى :) ماكنش فى حل تانى ولا فكرت انى اتكلم معاه و لا اشد معاه لانو لو طلع مطوة و عورنى مش هينفعنى الشتيمة ولا الكلام معاه :)

مش فاهم ازاى فى مكان زحمة و ماحدش وقف معاك!!

الناس بقت تعمل عبيطة و همها على نفسها و بس!

ربنا يرحمنا

**speed4speed** · 13-01-2009 09:23 PM

مين يسدق ان اسكندريه بجلالة قدرها مفيهاش غير 6 ضباط بس مكافحة مخدرات
لو ماشى فى اى حته فى اسكندريه تلاقى ديلر حشيش
والى يغيظ بجد لما تلقيه جاى عليك لوحده و يقلك ( انا معايا دخانه كويسه ) و فى الاخر تطلع وحشه دا كلام ؟؟

**thegoodhacker** · 13-01-2009 09:31 PM

المشاركة الأصلية كتبت بواسطة speed4speed

مين يسدق ان اسكندريه بجلالة قدرها مفيهاش غير 6 ضباط بس مكافحة مخدرات
لو ماشى فى اى حته فى اسكندريه تلاقى ديلر حشيش
والى يغيظ بجد لما تلقيه جاى عليك لوحده و يقلك ( انا معايا دخانه كويسه ) و فى الاخر تطلع وحشه دا كلام ؟؟

يا باشا انا ببساطة شفت مجموعة من الشباب تجار حشيش واقفين علي ناصية من النواصي و عمالين يقطعوا في الحشيش و يعبوا في الاكياس...... والكلام ده ما كانش في وقت متاخر ولا حاجة .... ده كان بعد المغرب علطول....
ده غير حقن المخدرات المستخدمة اللي بتلاقيها مترمية علي الارض جنب كانزات البيرة.... كل ده في الشارع عادي

**TeXo** · 13-01-2009 09:35 PM

علي فكره المشكله موجوده في كل البلاد , بلد زي امريكا في العصابات زي اللي بنشوفها في التليفزيون دي عربيات لاند روفز و رشاشات و حركات , يعني احنا ارحم :) ,

و الله انا كمان المشكله دي ساعات بتخليني اقرف من العيشه ,ساعات بحس إن البلد دي مش بتاعت الناس اللي في حالها و عايزه ناس بلطجيه و ساعات برجع و اقول في كل بلد في الوحش و في الحلو , ,

متابع الموضوع معاكم :)

**thegoodhacker** · 13-01-2009 09:44 PM

المشاركة الأصلية كتبت بواسطة TeXo

علي فكره المشكله موجوده في كل البلاد , بلد زي امريكا في العصابات زي اللي بنشوفها في التليفزيون دي عربيات لاند روفز و رشاشات و حركات , يعني احنا ارحم :) ,

انا معاك ان حتي في امريكا واوروبا ممكن يحصل العن من كده بس لو كلمت البوليس حتلاقيه جالك في اقل من خمس دقايق..... ده لو شخص كسر اشارة مرور في الشارع حيتمسك ويتظبط اخر تظبيط .....
وصدقني لو البلطجية اللي في مصر معاهم فلوس كانوا اشتروا مدافع ورشاشات وعملوا اكتر من اللي بيحصل في امريكا واوروبا...... ومين عالم ايه اللي ممكن يحصل في الفترة اللي جاية كمان !!

**thegoodhacker** · 13-01-2009 09:47 PM

المشاركة الأصلية كتبت بواسطة Busquets

انا مرة زمان واحد قال لى ممكن الموبايل هحط فيه الكارت بتاعى اعمل مكالمه!

قلت له ماعيش موبايل! هو قال لى انا لسه شايفك بتتكلم فيه

قلت له مالكش دعوة مش هدهولك و هاتك يا جرى :)

جدع الجري نص الجدعنة برضه....

بس المشكلة في الموقف بتاعي اني مرتبط بوقوفي في المكان ده علشان اركب اتوبيس شغلي

**TeXo** · 13-01-2009 10:03 PM

طيب انا عايز أسئلكم في حاجه ,

هو الواحد لو اتحط في موقف زي كده يسلم نفسه بسهوله يعني عايز يسرقك تقله اتفضل و لا تعافر معاه ؟

اصل عن نفسي في ناس يهموني علي طول ينصحوني لو في حاجه شبه كده حصلتلك ما تقاومش , انا شايف بقي اني عندي اتقتل و لا اني اتسرق و انا ساكت ,

انا كده برمي نفسي في التهلكه و لا ايه ؟

إيه رائيكم ؟

**Busquets** · 13-01-2009 10:06 PM

والله انا نفسى اعرف المفروض اعمل ايه

بس انا عن نفسى لو ماعرفتش اجرى :) اصلى بحب الجرى اوى :) هديلو الموبايل او ارميه على الارض و اجرى بردو :) المشكله انو ممكن يكون شارب ولا متنيل و يشوهنى! و الضرب فالوش مفهوش معلش و احنا مالناش قطع غيار

خليها على الله بس لو حصلك الموقف من دول اجرى لو ماعرفتش اديلو الحاجة و اجرى لو شلة كتيرة 8 9 مثلا!! هتكون متطر تعمل اللى هما يقولوهولك :)

**Busquets** · 13-01-2009 10:09 PM

نسيت اقول::

طبعا المقاومة فى حالة انك حسيت ان اللى اودامك هتقدر عليه

يعنى لو انت بدى بلدنج و قلبك ميت خش اضرب فيه لو حتى اللى بيثبتك 2!

لو مالكش فى الخناقات و دا افضل لانك لو حاولت معاهم هتتصاب هتتصاب! حاول تفلت بـ اى طريقة