الموضوع: كلمة حق ، فى حق مودرن موتورز

السلام عليكم ،
بصراحة لما بيكون فى تقصير واهمال فى جهة ما ، زى معظم توكيلات العربيات ، محدش بيسكوت عليهم ، وانا شخصيا بحس براحة ضمير لما انشر عميلهم المهببة علشان كل الناس تعرفها وتحذر منهم، ولاكن فى نفس الوقت لما يكون فى مكان بيطور من نفسه ويحسن ادأه بشكل ملحوظ ، من حقة اننا نشيد بيه.

وانا من تجربتى مع مودرن موتورز ، ملاحظ تطور قوى فى مستوى خدمة العملاء ، وخدمة مابعد البيع ، وانا حذكر اهم المواقف اللى حصلت معابا فى اخر زيارتين لعمل الصيانة ، واللى دفعتنى انى اقول كلمة حق فى حقهم.

1-بعد الحجز المسبق للصيانة ، الميعاد بيكون فى خلال 3 او 4 ايام ، وقبل المعاد بيوم ، بيكلمونى علشان يأكدوا عليا المعاد ويفكرونى ، ولو اتأخرت عن معادى ربع ساعة ، المعاد بيكون ملغى ، وده نظام كويس لا يسمح بتراكم التأخير و بالتالى طول الانتظار لساعات بس لتسليم العربية.

2-فعلا وصلت فى معادى وبدأت تسليم العربية للمهندس فى خلال ربع ساعة من وصولى.

3-عملوا خدمة جديدة لتوصيل العملاء من ابورواش الى ميدان لبنان والعكس ، فى مواعيد محددة على مدار اليوم ، علشان لو محتاج ترجع تشوف شوغلك او تعمل اى مشوار واليوم ميضيعش كده، ولما كلمونى قبل الصيانة بيوم علشان يأكدوا المعاد ، سألونى لو محتاج استخدم الخدمة دى ولا لأ، علشان يعملوا حسابهم فى العدد (طبعا مجانية)

4-استلمت العربية من غير مشاكل الحمد لله ، وبعد 3 ايام لقيتهم بيكلمونى تانى يطمنوا على العربية ، ويسألونى على رأيى فى خدمة العملاء ،فكرونى لما كنت عامل عملية بسيطة اوى فى دار الفؤاد ،وكلمونى برضو بعد اسبوع يطمنوا على صحتى :)

عموما ، ده انطباعى الشخصى اللى مبنى على تجربتى الشخصية معاهم فى ابو رواش ، واتمنى ان كل التوكيلات تتعامل مع العملاء بالاسلوب ده واحسن كمان ان شاء الله.