عاوز القول الفصل في زيت العربية
انا عندي عربية شاهين موديل 97 و عندي و هي زيرو، و دايما باستخدم زيت إسو إكسترا و من سنة 97 لغاية دلوقتي و انا في الغالب بغير الزيت على 2500 او حتى 3000 و ساعات قليلة قوي بيوصل 4000 كم. سمعت من حوالي اسبوعين واحد بيقولي ده ما ينفعش خالص، لأن إسو إكسترا آخره 1000 كم و بس.
لكن يا جماعة انا بقالي أكثر من 10 سنين ماشي على النظام ده و لا الماكنة فوتت و لا حاجة و الأكتر من كدة إن ساعات كمان ما كونيش بغير الفلتر الا كل حين ومين (مرة قعد الفلتر حوالي 4 سنين ما تغيرش يعني من 97 لغاية 2001 لما غيرته أول مرة)
العربية لغاية دلوقتي عاملة 136 الف كيلو و في شهر نوفمبر 2008 اللي فاتت كان عمرها معايا 11 سنة بالتمام. و العربية 1400 سي سي.
بناء على ده كنت عاوز أعرف الرأي الفني الصواب في موضوع الزيت ده، لأني بصراحة حكاية الكيلومتر بتاعت تغيير الزيت دي انا موش شايفها منطقية لو بصينا عليها لوحدها من غير أي عوامل تانية.