أنا عاوز بس أحكي على حاجة غريبة حصلت معايا من كذا سنة عشان نبقى عارفين اللي بيحصل في بلدنا واحنا مش دريانين أو دريانين ومطنشين!
من كام سنة كنت في جنينة مول ورحت لمحل هدايا هناك أجيب حاجة...لقيت في الفاترينة دبدوب كبير شكله جميل جدا وعجبني قوي قمت داخل وسألت الراجل على سعره قاللي بستين....رحت مطلع الفلوس ومديهاله وأخدته على طول من كتر ما كان عاجبني!
المهم لما روّحت جيت أبص عالتيكت اللي متعلق فيه لقيت الكلام اللي مكتوب فيه بالعبري! طبعا أنا ما صدقتش وقلت يمكن تكون دي أي لغة تانية...فضلت بتاع ربع ساعة أدقق في الكلام والحروف اللي مكتوبة انما في الآخر الكتابة للأسف طلعت فعلا بالعبري!
طبعا أنا صعقت.....أنا كنت زمان لما بسمع ان اسرائيل بتحاول تهرّب بضايع ليها بطريقة مستترة للبلاد العربية ما كنتش بصدق...انما ساعتها صدقت بعد ما شوفت بعيني
والكلام ده كان في أواخر 2002 قبل ما يعملوا اتفاقية الكويز والاختراعات العبقرية بتاعت شيمون بيريز دي! طبعا الواحد ممكن يتخيل الوضع دلوقتي بقى عامل ازاي!
وبما ان الشيء بالشيء يذكر...فا مرة (من كام شهر) كنت قاعد ومشغل البرنامج الأوروبي في الراديو فا لقيتهم راحوا ذايعين أغنية لمغنّي اسرائيلي كنت سمعتها بالصدفة عالنت قبل كده...
ولا تعليق!