شكراً جداً
شكراً جداً
شكرا جزيلا يا باشمهندس
كنت عايز اسال حضرتك على حاجه
انا لسه شاري لانسر 98 وهي عامله 82 الف كم وكنت عايز اغير لها جميع السيور وطقم السرفيز وبليه الشداد
انا عرفت كده المصنعيات طيب اسعار القطع اللي حاتركب ايه؟
وهل حضرتك تنصح بحاجه تانيه اغيرها او اكشف عليها وشكرا لك
باشمهندس طارق....يا باشمهندس ... سامعني
اعرفك بنفسي ف السريع كده انت وكل حبايبنا في المنتدى الظريف ده
انا مهندس محمود كريم koriem
ربنا اكرمني واشتريت لانسر 2008 الشكل القديم 1600 سى سى اوتوماتيك
الحمد لله العربية فعلا جميلة
بس عاوز اعرف بالنسبة لصيانة الالف عادة يعني بتكلف كام في الظروف الطبيعية
بمعنى اصح اعمل حسابي في كام وانا رايح ؟
ده سؤال
تاني سؤال
ممكن اتاخر أد ايه على صيانة الالف ..يعني ممكن اعمل 1500 او 2000 مثلا
وايه الضرر في كده؟
أخر حاجة بقى
ممكن الموضوع ده ياخد وقت أد ايه؟ يعني متوقع اقعد هناك أد ايه؟وهيعملولنا تخفيض عشان احنا من نايل موتورز ولا لا :)؟
شوفت بقى كل دي اسئلة :):)
مش عارف من غيرك كننا هنعمل ايه :)
أستاذ ماجد اهلا بيك في المنتدى وآسف على التأخير في الرد .. الحقيقة مشفتش السؤال غير النهارده
هي صيانة الـ 80 ألف عموما بتتكلف حوالي 1500 جنيه (بلاص ماينص 200 جنيه) شاملا قطع الغيار المذكورة والمصنعيات وطبعا اللي بيرفع القيمة سير الكاتينة والبلية والشداد (مجموعة الكاتينة بتتغير مع بعض) وده بخلاف العربية عايزة تيل فرامل او لآ - انما لو حضرتك عايز التفاصيل يا ريت تتصل بمخزن قطع الغيار في قليوب تليفون 42157629 من 8 ص الى 4 م كل يوم ما عدا الجمعة وتعرف سعر قطع الغيار بالتحديد
باشمهندس محمود أهلا بيك في المنتدى ومبروك العربية الجديدة وربنا يديك خيرها ويكفيك شرها
صيانة الألف بتكون مش اكتر من تغيير زيت وفلتر الزيت ومراجعة عامة على السيور وعمل اي ملاحظات للعميل على العربية
التكلفة بتكون زيت موبيل وان اللي بيقعد 10 آلاف كيلو متر وده افضل علشان يقعد للصيانة القادمة وسعره 220 جنيه والفلتر وسعره 50 جنيه يعني اجمالي 270 جنيه شامل الضريبة انما المصنعيات مجانية في صيانة الألف فقط
وصيانة الألف ضرورية علشان الزيت اللي بييجي مع العربية بيكون فيه رواسب وشوائب التليين ويجب تغييره بعد الألف الأولى (اصل فيه ناس بتقول ده زيت الفابريقة وممكن يقعد كتير انما الكلام ده غلط وميتسوبيشي محددة بدقة كل حاجه تتغير امتى للمحافظة على الضمان) وممكن تقعد لحد 1500 انما يفضل بلاش اكتر من كده
طبعا ضمان عربية حضرتك 100 ألف كيلو متر أو 3 سنين ايهما اقرب ، وده يتطلب عمل الصيانات الدورية في مواعيدها وفي مركز خدمة معتمد ومواعيدها هي صيانة الألف ثم كل عشرة آلاف بعد كده
صيانة الألف ملهاش حجز سواء في قليوب او جسر السويس وبتستغرق نص ساعة بالكتير بس لو حضرتك رحت بدري
بخصوص خصم نايل موتورز هو لسه لم يتم الاتفاق عليه رسميا انما جاري باذن الله
متشكر جدا يا باشمهندس على الإفادة
بس انا نسيت اقول معلومة صغيرة :( هى ان انا مش ضمان الوكيل انا عربيتى خليجي وبالتحديد سعودي
فهل ممكن اعمل الصيانة في الفرعين اللي انت قولت عليهم ؟وياترى بالسعر ده ولا اكتر عشان انا ماليش ضمان؟
معلش انا اسالتي كتير ... ممكن تقوللي العناوين بالظبط والمواعيد
اشكرك بشدة
السلام عليكم
يا ريت حضرتك تسأل المعرض اللي اشتريت منه عن الضمان لأن الخليجي في موضوع الضمان 3 أنواع :
- النوع الأول بضمان الرواس سواء شاريها من الرواس او موزع معتمد للعربيات الخليجي اللي الرواس بيستوردها وده ضمان حقيقي 3 سنوات او 100 ألف كيلو متر لكن مع ضرورة الالتزام بالصيانة في مركز من مراكز الرواس الأربعة
- النوع الثاني ان المعرض بيكون متفق مع مركز خدمة زي صبحي سند أو جوزيف ، أو يكون فيه مركز خدمة تابع للمعرض زي هاي تريد وفي الحالة دي بيدي ضمان لمدة سنة على ما اعتقد والصيانة لازم تتم في مركز الخدمة اللي المعرض بيحدده
- النوع الثالث : وده ملهوش ضمان والمعرض في الحالة دي نوعين - نوع محترم بيقولها بصراحة العربية دي خليجي وملهاش ضمان
ونوع غير محترم بيقول للمشتري العربية مصري وضمانها الوكيل او الرواس ولسه امبارح كان عندي واحد جاي يعمل صيانة وعايز يكشف على رقم شاسيه العربية علشان احدد له دي من عربيات الوكيل مصرية او لأ ، وده لأن المعرض للأسف قال له العربية مصري والضمان والصيانة في التوكيل رغم ان العربية خليجي
فلو عربية حضرتك من النوع الثالث يبقى اهلا وسهلا بحضرتك لعمل الصيانة في مراكز خدمة مصرية والفرق ان مصنعية صيانة الألف الأولى مش مجانية وان كانت لا تزيد على 70 - 80 جنيه على ما اعتقد.
وبخصوص العناوين هي مذكورة في الموضوع ده
http://www.nilemotors.net/Nile/showthread.php?t=98
السلام عليكم
عندى لانسر 1300 بضمان الوكيل عامله 78 الف كنت عوز اعرف هو الضمان كام الف هل 60 ولا 100
َضمان الـ 100 ألف كيلو متر أو ثلاث سنوات هو فقط لموديلات 2008 وما بعدها
اما ما قبل ذلك فهو 60 ألف كيلو متر أو ثلاث سنوات
شكرا عالمجهود الحلو