المواصفات دي صعبة شوية خصوصا في السعر ده
ومتنساش ان مفيش عربية كاملة
الكمال لله وحده
يعني مثلا ممكن انصحكك بالماتريكس
واسعة وثابتة ومريحة في السفر لكن استهلاكها للبنزين عالي
وممكن انصحك بتويوتا ياريس
قليلة الاعطال واعتمادية عالية وموفرة في البنزين لكن قطع غيارها غالية
وممكن انصحك بسيارة الماني زي الاوبل فكترا او الاسترا
اعتمادية عالية ومناسبة لاغراض التنقل الطويل واعطالها محدودة لكن سعرها عالي نسبيا
وممكن اقولك هات حاجة زي الفيرنا
محلي وقطع غيارها مناسبة واستهلاكها للبنزين يمكن تحمله واعطالها معقولة لكنها تقفيل مصري ودي مشلكة لو مكنش صاحبها اللي انت حتشتريها منه واخد باله منها ومراعيها ومغيرلها الحجات المصري
بصراحة القرار صعب خصوصا انه واضح انك تعبان في الفلوس جدا زي اغلب الناس هنا
علي العموم انا اقدر اديك نصيحة واقتراح
رتب اولوياتك في السيارة
مثلا تقول اهم حاجة الاعتمادية ودي تساوي 10 نقط
يليها استهلاك البنزين ودي تساوي 10 نقاط
يليهما اسعار قطع الغيار ودي تساوي 5 نقاط
يليهم الاتساع الداخلي 5 نقاط
يليهم الثبات 8 نقاط
...... الخ
ثم رشح عدد كبير من المركات والموديلات
وابتدي اعمل جدول وحط نقط لكول موديل وجمع
ثم اختار اعلي 3 سيارات في عدد النقاط
واختار منهم اللي ترتاحلها
دي النصيحة اما الاقتراح
انا لو مكانك حروح اجيب فيرنا استعمال علي اساس انها مفهومة ومحفوظة وممكن تكشف عليها في اي بنزينة قبل الشراء وقطع غيارها رخيصة نوعا ومتوفرة الي جانب ان سعرها معقول وايضا سعر اعادة بيعها مضمون
وبعد 6 شهور ممكن تبتدي تعيد تقييم الموقف اذا كنت راضي عنها ولا تحب تغير
ولو كان قرارك التغيير وقتها تكون اسعار الجديد نزلت والرؤية اتضحت وساعتها تبتدي تفكر بالمعطيات الجديدة
خالص تمنياتي لك بالتوفيق والهداية
ومتنساش تحكيلنا علي التفاصيل
المفضلات