-
انا بقي طول عمري ماشي من غير رخصة
معتمد ان في اي مشكلة الحاج بيحلها على طول وعمري ما حد وقفني وانا معاييش رخصة :mrgreen:
المهم بعد صدور قانون المرور الجديد ايام هوجة الحزام والخوذة والكلام ده كانوا مشدديدن جدا في الكماين
المهم رحت في يوم اجاز شم النسيم كان المرور شغال ولقيت حوالي 70 بني ادم رايحين يطلعوا رخصة
المهم الوالد كان معايا وكارت رئيس نيابات المرور في جيبة وطبعا كله تشفي فيا عشان دايما كان يقولي انت بتسوق كويس في الشارع لكن لو دخلت امتحان اكاديمي هاتسقط :cry:
المهم كانو مشدديدن جدا بس طبعا الكارت كان هايعديني رفضت طبعا نقدمة وعديت من الاختبار الشفوي والظابط بنفسة اللي كان بيمتحنا وسالني في اكتر من 50 نوع اشارة بس مين كنت حافظهم :lol: :lol:
نزل 29 واحد الامتحان العملي من ال 70 مش هاقول طبعا على المهازل وقت الامتحان وخاصة الست اللي دخلت على الدكة اللي شالها الظابط وطلع يجري :lol: :lol: :lol:
والعربيات اللي بطلت وووووووو
المهم العبد لله الوحيد (والله العظيم) اللي خدها في اليوم ده وماكنتش مصدق نفسي :oops: :oops: :oops:
لان اللي كان ماسك وحدة مرور شبرا ظابط قلة من انزه الظباط وكان شديد جدا
احلى حاجة وهو بيمضيلي قولتلة انا كان معايا كارت من فلان الفلاني ومارضيتش اطلعة قاللي كويس عشان ماحرجكش :oops: :oops: :oops: :oops:
بس سألتة سؤال كان في نفسي قولتلة انتوا بتشددوا قوي كدة ليه
قاللي عشان لما حضرتك تبقي عارف تسوق انت وغيرك وغيرك مش هانزل انا والعميد واللواء وده(ومعاه حق) الدولة الوحيدة اللي بحصل فيها كدة ننزل ننظم المرور في عز الحر وعز البرد الشديد ووقت الافطار نفطر في الشارع عشان واحد ولا واحدة مشيوا غلط وربكوا المرور وراهم
معاه حق طبعا :shock: :shock: :shock: :shock:
-
اول مرة كانت العربية بأسم صديق عزيز ليا وقعدت على اسمه لمدة 6 شهور لحد ما طلعت بطاقة شخصية ونقلتها على اسمى, رحت اطلع براءة ذمة قالولى عندك 2800 جنيه مخالفات , طبعا منهم البعض فى سوهاج والبعض فى اسوان وحاجات غريبة جدا واماكن عمرى ما خطيتها ولا حتى بطائرة, المهم عملت تليفون لأحد الاصدقاء وهو بدوره كلملى الراجل بتاع نيابة المرور هنا ودفعت 90 جنيه ودى كانت اول مرة .
تانى مرة فى الثلاث سنوات التانيين لقيت عندى 250 جنيه منهم واحدة بتاعة سرينة شرطة والثانية كسر اشارة والثالثة مش فاكر ايه هى, وطبعا انا لا بكسر اشارات وموضوع السرينة دة اتحل فى ساعتها والمحضر اتكتب على مزاجى وطبعا اثبت فى المحضر انى معاييش سراين وبتاع ومن قرفى دفعتهم ومشيت .
-
حكايتى غريبة شوية، رحت الساعة 9 مشيت فى الأجراءات عادى، امتحنت نظرى مع ضابط محترم، امتحنت عملى فى ربع ساعة، اتصورت و على الساعة واحدة أخدت الرخصة بدون ما أدفع ولا مليم اكرامية، كنت مجهز كارت لمدير مكتب مباحث المرور بس حبيت أجرب الأول و بجد بجد من ساعتها عمرى ما احتجت لواسطة فى مرور الدقى، حتى ان السنة اللى فاتت لقيت على النت نازل عليه مخالفتين رادار كل واحدة ب 500 جنيه :shock: :shock: و الأتنين بنفس التاريخ وواحدة فى الشرقية و التانية فى الغردقة و أنا ماروحتش دى أو دى، المهم دخلت لوكيل النيابة و جبتله جواب من الشغل بحضور الشهر كله و مواعيد دخول و خروج العربية و الراجل اقتنع انها غلطة كمبيوتر غالبا و كنت متوقع ينزلهم كتير بس طلع راجل قوى و شالهم الاتنين. :D :D
-
ليه يا سمسم كده تقلب علينا المواجع :cry: :cry:
في يوم صيف حار مشمس توجهت للمرة الاولى لاستخراج رخصة القيادة وانا كنت بسوق من صغرى كده بالدراع لاكن عمرى ما مشيت بين اي اقماع والحمد لله :lol:
المفروض انى كنت اروح المرور وهناك هيقابلنى الواسطة اللي يعرف مدير المرور مباشرة وصدقونى والله انا مكنتش عايز واسطة ولا نيلة بس الحاجة هيا اللي دبستنى في المجاملة ديه المهم قولت ياض روح جهز الورق عقبال ما الراجل يجي وربنا ميوريكوا ( كان يوم خميس يعني نص يوم والزحمة موت ) وبعد جهاد في سبيل استكمال الاوراق لقيت الراجل لسه مجاش وتليفونة مقفول قولت يبقى بومبة والراجل خلع ومفيش فايده لازم اكمل المشوار لوحدى وروحت اشتريت الكتاب بتاع الاشارات بخمسة جنية وقعدت حوالى ساعة احفظة صم (وفي الساعة ديه استرجعت ايام الثانوى العام لما كنت براجع الملازم قبل ما اخش الامتحان ) وبعد ان انتهيت من حفظ الكتاب من الجلدة للجلدة وقفت في الطابور عشان اقدم الملف فاذا الموظف يصدمنى بان الورق ناقص وفيه ورق عايز يتأشر وورق بقشروا وحاجات مفمتهش منها حاجة يعني ايه يعني ياريس ؟؟ قالى فوق علينا بكره يا سيد
طبعا مادت بى الارض وحسيت بكل معانى الذل والهوان وكراهية طاغيه لنظام المرور والنظام البيروقراطي بل والنظام الجمهورى نفسة طبعا توجهت للخروج من البوابة باقدام مثقلة بالخيبة والمرارة واذا بالتليفون بيرن تررررررن تررررررن مين انا فلان الفلانى (الواسطة) انت فين يا عم دانا متبهدل خالص - انا في العباسية وجاي دلوقتي
وبعد دقائق قليلة وصل لارض المرور السيد المستشار (تربتت تو يلي ) واذا بنظرية هوب ( المشار اليها عاليه في مداخلة اخونا المهاتما تطبق بحازفيرها )
هوب بقينا في مكتب مدير المرور
هوب تاشيره علي الملف بتاعى اذابت كل العقبات
هوب روحنا علي الاختبار
هوب مش لاقي عربية مانيول اسوق بيها (عشان كنت معتمد علي عربية الراجل والراجل عربيتة كانت نوبيرا اوتومتيك وانا معرفش اسوق مراكب ولا اعرف اسوق اوتوماتيك )
هوب الامتحان خلص وانا مستني والدتي تيجي بعربيتها عشان اسوق بيها
هوب دخلنا تاني مكتب مدير المرور اللي تكرم واشر تاني علي الملف
هوب تعالى يوم السبت اتصور وخد الرخصة
طبعا مش هقولكم قد ايه الموقف ده اثر فيا وخلانى ابص لبلدنا علي انها اكبر حلة كوسة في الدنيا وان اللي يمشى عدل هو اللي يحتار ويشمت عدوه فيه كمان
وطبعا جيت اطلع رخصة العربية وبدون تفكير طبقت نظرية هوب اللولبيه
وعمار يا مصر
-
-
رخصه من دوله الامارات العربيه المتحده :
دي بقي كان من احلي ايام حياتي بجد كان يوم 5/3/2005
كنت قدمت طلب في المرور علشان افتح ملف و اعمل الرخصه او (الليسن ) زي ما بيسموها هناك و اي واحد مصري هناك تسأله تلاقيه عاوج لسانه و يقولك(حصلت ليسن ولا لسه؟ :wink: :? )المهم
روحت فتحت الملف في شهر 2 و لما لقو معايا الرخصه المصريه عدوني من الشفوي و احتبارات الركن بين عربيتين و الحاجات البسيطه دي و حددوا ليا ميعاد في شهر 3 علشان الامتحان.
كل اللي معايا في الشركه لما عرفو قالولي ما تتعبش نفسك عمرك ما حتاخدها من اول مره دا انت لو سواق و محترف يدوب تاخدها من تالت مره دا يوم ما تقول انك اخدتها بسرعه كمان!!!!
كنت بقول اوك و حاضر و مش بجادل مع ناس مش فاهمه و بقول في عقل بالي ربنا قادر علي كل شئو الحمد لله الواحد بيعرف يسوق و هما يعني حيمتحنوني في ايه غير بنزين و فرامل و دبرياج يعني!!!!!!و اللي يقولي خدلك عشرين حصه قبل الامتحان علشان تتعود علي الطرق و المشي فيها و الحاجات دي .
المهم طنشت الكلام دا كله و قبل الامتحان باسبوع اتفقت مع شركه تعليم سواقه علي خمس حصص بس اخر حصه قبل لامتحان بساعه !!!!
المهم روحت الامتحان و انا مصلي الفجر و اخدت الحصه و روحت المرور و انا خايف و ركبت الاتوبيس بتاع المرور اللي بيمشي ورا العربيه اللي بمتحن فيها و دا النظام هناك كل عربيه بيبقي وراها اتوبيس و كل شيويه العربيه تقف بامر من الاتنين الضباط اللي راكبين فيها و ينزل اللي بيمتحن من العربيه و واحد تاني من الاتوبيس ينزل علشان يمتحن.
المهم جه الدور عليا و التلاته اللي قبلي نزلو و سقطو :cry: :cry:
ركبت و سميت و لقيت الضابط اللي جنبي بيقولي اربط حزامك قولتله انا بعدل الكرسي الاول قالي انا بقولك علشان ما تنساش.
لمهم ظبط نفسي و طلعت و الضابط دا قعد يتكلم معايا عن مصر و الامارات و الشيخ زايد و مكان شغلي من الاخر عاوز يخليني اتلفت عن الطريق لكن كنت بكلمه عادي و حاول يغلطني كذا مره لكن مكنتش بسمع كلامه و فضل مطول معايا يجي 15 دقيقه سايق!!!!!!!!!
لحد ما نزلت من العربيه و قالي مبروك يا اخ حازم انت اخدت الرخصه بصراحه انت فعلا سواق و تستحقها اتصل بيهم في مصر بقي خليهم يدبحو الارانب و يعملو ملوخيه :D :D :D :D
انا فعلا مكنتش مصدق نفسي ان دا حصل بس توفيق ربنا اكبر من اي شئ.
رجعت الشركه و طبعا نظرات الغل و الحقد من كل واحد كان بيحطم في معنوياتي و لدرجه ان المدير المالي و الادري يوميها اتصل بيا بنفسه يباركلي و بيقول انت اول واحد في الشركه من سنه 1972 من يوم ما فتحت ياخد الرخصه من اول مره و بالسرعه دي.
-
أنا للأسف طلعت الرخصة بالفلوس ، لأن المرور اللى انا تبعه كان معقد الأمور شوية وماكنش حد بيعرف ياخد رخص من غير ما يدفع. المهم انا كنت شارى عربية وماشى بيها من غير رخصة لمدة 6 شهور وكنت مكسل أروح اطلعها لأنى كنت مخنوق من المرور بسبب تجربة مريرة فى ترخيص العربية ونقل ملكيتها. كلمت واحد أمين شرطة شغال مع ظابط فى المرور وخد منى ساعتها 600 جنيه وكل اللى عملوا معايا انه عدانى من إمتحان النظرى (الكمبيوتر) اللى ما بقاش مجرد إشارات وبس ، لا دة بيسأل فى مواقف معينة لو حصلت معاك هاتتصرف ازاى ، يعنى مثلا على سبيل المثال كان فى سؤال بيقولك لو انت سايق ومعاك طفل بيعيط هاتتصرف ازاى أو لو فردة كاوتش فرقعت هاتتصرف ازاى. طبعا انا كان معايا واحد بيملينى الإختيارات الصح وهو دة اللى انا أخدته بالفلوس اللى دفعتها ، بعد كدة ما عملش معايا حاجة ، رحت تانى يوم إمتحان السواقة وعديت منه الحمد لله من غير مشاكل لأنى كنت بسوق من فترة وكمان رحت بعربيتى ال 128 فكان الموضوع سهل. وتانى يوم رحت اتصورت واستلمت الرخصة.
-
لللأسف برضه زى ما قال الأخ أبو سيف أنا طلعت الرخصة بالفلوس وده كان لسببين: أولا إنى يا دوب كنت باعرف أنقل و أمسى بالعربية على التانى بالكتير , ثانيا و ده الأهم إن كل اللى سألتهم قبل ما أروح المرور قاللولى إنك حتى لو محترف سواقه هاتسقط لو مش معاك واسطة أو دفعت فلوس.
المهم واحد قريبى يعرف واحد بيشتغل فى مكتب لواء مرور أخد منى 400 جنيه و جابلى جواب توصيه ممضى من اللواء و موجه لمدير وحدة المرور اللى أنا تبعها
المهم يومها الصبح روحت المرور و دورت على رئيس الوحدة العقيد فلان الفلانى و صبحت عليه و إديته جواب التوصية ...راح مأشر عليه و قاللى روح لمحمد بيه الضابط الى مسئول عن الإمتحانات ..... محمد بيه شاف جواب التوصية والتأشيرة راح مأشر عليه و دبسه فى بدبوس على وش الورق والإستمارات فى الملف بتاعى ,هو كمان و قاللى روح إمتحن ....... الباشا بتاع الإشارات شاف الجواب راح سألنى سؤال خايب مش فاكرة و قاللى إنزل إمتحان السواقة.. لما جه الدور عليا رحت خابط أول قمع العسكرى قاللى كفاية أخرج من المكان ....المهم إتأشر على الورق بإنى ناجح و بعدين طلعت إتصورت و أخدت الرخصة تانى يوم.
كل ده ب 400 جنيه و مفعول جواب التوصية السحرى
عمار يا مصر
Content Relevant URLs by
vBSEO 3.6.0 PL2