أنا اشتريت عربية دوجان 92 ودي السيارة الأولي عايز أعرف رأيكم

**mahmouda** · 17-08-2007 04:14 PM

أنا اشتريت عربية دوجان تركي موديل 1992 فيها كماليات زجاج كهرباء و سنتر لوك و تكييف عايز من كل الأخوة الأعزاء ياتري اختياري مناسب وايه ياتري مشاكل العربية دي وازاي أحافظ علي حالتها الكويسة اللي عليها وهيا مفيهاش بور ستيرنج ياتري لو حبيت أركبه يتكلف قد ايه ؟

**hazem_khidr** · 17-08-2007 08:41 PM

الف مبروك و ربنا يحفظهالك و اهلا بيك معانا في المنتدي.
بالنسبه للدوجان عربيه جميله جدا جدا و هيا هيا الشاهين بس علي ما اعتقد الموتور بتاعك نفس موتور ال 131 القديم و حيبقي 1600 مش 1300.
العربيه بتعاملها عادي زي اي عربيه مالهاش شروط معينه علشان تحافظ عليها خصوصا ان العربيه ما ظهرش منها اي مشاكل في اي حاجه.بس اهم حاجه انك تعمل ليها صيانه كامله يعني تغير زيت و فلتر و بوجيهات و فلاتر بنزين و سير دينامو و سير تكييف و متهيالي الكاتينه عندك جنزير مش كاوتش زي الموديلات العاليه خلي برضه الميكانيكي يبصلك عليه .
و اكشف علي عفشه العربيه كويس و لو محتاجه مقصات او بيض او مساعدين غيرها ما تستخسرش علشان تطمن لها انها ما تعملش حركه نقص علي اي طريق.
و انصحك ما تسافرش بيها نهائي دلوقتي الا لما يمر شهر علي ركوبك علي ما يظهر فيها اي عيب او اي حاجه ممكن اللي بعهالك ما عملهاشز و اتاكد من حاله الكاوتش و الاستبن و اتاكد ان الكوريك و مفتاح العجل موجود علشان ما تتزنقش و انت ماشي.
بالنسبه للباور فهو حيتكلف من 2500 الي 3000 جنيه بس نصيحه لو مش محتاجه اوي ما تركبوش علشان بيبقي عاوز صنايعي محترف مش اي حد يقدر يركبه.
و الف مبروك تاني و ربنا يملهالك بركه :)

**mahmouda** · 18-08-2007 11:38 AM

أنا عاجز عن الشكر لردك الجميل و أتمني أن نكون أصدقاء في المستقبل
أنا كنت عايز أسألك سؤال عن معدلات استهلاك البنزين في العربيات ال 1600 CC و كمان المستعملة وياتري ايه اللي ممكن يتعمل علشان يقلل استهلاك البنزين وشكرا

**ahmed1981** · 18-08-2007 01:00 PM

المشاركة الأصلية كتبت بواسطة mahmouda

أنا كنت عايز أسألك سؤال عن معدلات استهلاك البنزين في العربيات ال 1600 CC و كمان المستعملة وياتري ايه اللي ممكن يتعمل علشان يقلل استهلاك البنزين وشكرا

السيارات ال 1600 القديمة إستهلاكها داخل المدينة في المتوسط 150 كيلو في الصفيحة
وعلى الطوالي ممكن 200 كيلو في الصفيحة

طبعا ده يعتمد على كفائة الموتور وأسلب القيادة ويفرق من عربية للتانية

بالنسبة لتقليل إستهلاك البنزين أهم حاجة السواقة الهادية يعني التسارع الهادي بدون ضغط جامد على دواسة البنزين

**mahmouda** · 18-08-2007 01:51 PM

أنا أشكرك يا م/ أحمد بشدة وعلي فكرة أنا كمان مهندس مدني بس أنا كنت عايز اسألك سؤال كان في حد قالي ان ممكن يكون استهلاك البنزين الزيادة يرجع ل الكربيراتير مش عارف ايه رأيك ؟
وشكرا