المشاركة الأصلية كتبت بواسطة Mohamed_ElNaggar
مساء الفل اولا ...
العربية الواجا معايا من سنه ونص تقريبا عملت حوالي 50 الف كم لأن انا بأسافر كتير(عملي وسكني في القاهره لكن اهلي في كفرالشيخ) عشان كده العربية ممكن تعمل من 3 الى 4 الاف كيلو في الشهر معايا ...
العربية عالية عن الارض ما تقلقش من حكاية الاحمال وهى واسعة وشنطتها واسعة وهى لا تقارن بالفيرنا او اللانوس او الافيو .. انت ممكن تقارنها باللانسر .. لأن العربية دي لانسر متنكره في واجا .. الموتور هو هو (انا بأتكلم على الموديل لغاية 2007 اللي هو موديل عربيتي) العفشة هى هى ..
مشكلتك هى حكاية المنيا دي ... لأنك هتضطر تنزل القاهره لو احتجت اى حاجه غير الصيانة الدورية .. لأنك بالتأكيد هتلاقي فلاتر الزيت والبنزين بتاعة اللانسر في المنيا ... المشكله لو فانوس او مراية هتتضطر تنزل القاهرة تجيبهم...
العربية من وجهة نظري حلوة وخامتها جيده وفيها كماليات نادرا لما تنزل للسوق المصري مجانا او في base category بمعنى تاني مش هتلاقي عربية تانية بالكماليات دي بنفس السعر اذا استثنينا الصيني علما بأنها لا تقارن مع الصيني من حيث الجودة والاعتمادية ... هى من وجهة نظري احسن من كل الكوري ولا تعتبرني ابالغ اذا ما قارنتها بالياباني ... لأن هى اصلا ميتسوبيشي زى ما قلت لحضرتك...
شكل العربية حلو ومميز وهتلاقيك دايما متميز في منطقتك بيها... لكن مشكلتها اولا زى ما قلتلك قطع الغيار ثانيا سعر اعادة البيع لو بتحب التغيير ...
لكن في حالتك انا لا انصحك بها لأنك هتزهق لو حصل لا قدر الله وحبيت تشتري لها قطعة غيار من القاهرة وهتشيل الهم ... فخليك افضل في حاجه منتشرة في المنيا وقطع غيارها متوافرة ....
وانا تحت امرك في اى معلومة تانية لو اصريت عليها ..