إلغاء حساس زيت الباور - و تجربة جديدة
من فترة... و كل ما بفتح الكبوت بلاقي زيت بيتسرب من حساس الزيت بتاع باور الديريكسيون... اللي بيركب فيه فيشة بتدي indication لما زيت باور الديريكسيون ينقص...
الزيت كان مغرق الحوض و مبهدل منظره... غير أني كنت دايما شايل معايا احتياطي زيت باور عشان لو نقص أزوده...
سألت على الحساس ده في الهيئة العربية للتصنيع AAV لقيته ب315 جنيه... و سألت الخبراء... قالولي عاجلا أو آجلا هيضرب زيت... و هتحتاج تغيره تاني...
سألت عنه في الاستيراد و العربيات اللي جاية انصاص... مالقيتوش... و لما لقيته ... نصحني الناس الخبراء أني ماجيبهوش عشان عمره الافتراضي ممكن يكون قرب ينتهي
طيب الحل ايه؟؟؟
رحت عند مركز الخدمة اللي بتعامل معاه دايما... و قالولي من الآخر لو عايز تريح دماغك... طببه (يعني سد مكانه بطبة) و الغي عمل الحساس...
و اقتنعت بالحل ... و فعلا خلعنا ماسورة زيت الباور اللي راكب فيها الحساس و وديناها عند الخراط... اللي عمل قلوظة للخرم اللي كان راكب فيه حساس الزيت و تم سد مكانه بمسمار (بعد لف المسمار بمعجون لضمان عدم تسريب الزيت نهائيا)
كما تم تنظيف حوض الموتور و ازالة كل آثار الزيت المترسب...
التكلفة: 10 جنيه (تمن قلوظة الماسورة و المسمار اللي ركب)
النتيجة: أكثر من ممتازة... الحوض نضيف... و الزيت زي ما هو... مابينقصش... و الديريكسيون ناعم (عشان الزيت بخيره) و طبعا دا يحافظ على عمر طرمبة الباور....
المحصلة النهائية: قضيت على المشكلة نهائيا... و مش هحتاج لقطعة الغيار ديه أبدا.... و بكدا أكون وفرت تمنها في مقابل الاستغناء عن option مش ضروري...
و الى اللقاء مع تجربة تانية من التجارب الموفرة ... :F_eyeb1[1]:
