الموضوع: شراء سيارة بطريقة إسلامية

يا جماعة جزاكم الله خيرا..

أنا فعلا محتار بقالي 3 شهور في الموضوع دة.. وتايه... وضائع كمان بين الناس اللي بتقوللك يا عم كبر والدين يسر والبلد مش إسلامي فاملكش ذنب، والبيع الإسلامي مكلف وإنت عليك من دة بايه... والكلام اللي يودي في داهية دة.

ومابين "شائعات" عن الحلول الإسلامية القليلة المتوافرة.. التي لم أجد أحدا يؤكدها لي فعلا.. ويأخذ بيدي.. إلى أن وجدت نقاشكم الثري دة ربنا يكرمكم كلكم آمين

دلوقتي يا جماعة.. أنا من خلال قراءتي لكلامكوا.. اتشجعت على معرض ديهاتسو أوي.. وبنك فيصل شوية.. بينما استبعدت معرض العباسية بسبب التقسيط على سنتين اللي هيبقى صعب عليا شوية..

اللي شجعني على دايهاتسو هو وضوح الشرح.. وبساطة الإجراءات ... من كلامكوا ...

أما بنك فيصل بقى.. خلليت والدي راح سأل لعدم تفرغي (وهو الصراحة من المتحيزين ضد فكرة البنك الإسلامي من أساسها مش عارف ليه كدة )... رجع قال لي الدنيا معقدة وشروطهم عالية وقفلها في وشي.. وعاوز يروح المصرية للسيارات !!

أنا مش مستريح لكلامه بأمانة يا أخواني

فممكن بس حد فيكو عارف حوار بنك فيصل.. يوضحلي واحدة واحدة إيه المطلوب والإجراءات ؟؟

أنا ممكن أتصرف في 35-40 ألف مقدم إن شاء الله... وماقررتش أجيب عربية إيه... وخبرتي في عالم السيارات محدودة جدا... وهذه ستكون أول سيارة أجيبها إن شاء الله...

فكرت في المستعمل بس أجلت الفكرة لغاية ما أشوف الزيرو نظامه ايه.. يا مسهل

عاجباني الأفيو.. بس مش عارف هتبقى غالية عليا وللا ايه.. عموما عاوز عربية سعرها من 50 لغاية 70 أو 75 بالكتير أوي...

المهم بس حد يفهمني نظام فيصل إيه بوضوح الأول.. وأفاضل بينه وبين توكيل ديهاتسو...
وبعدين أخد بنصيحتكوا في موضوع العربية.. مع العلم بأني شاب في بداية حياتي جدا جدا.. ودخلي مش عالي أوي.. ربنا يكرم إن شاء الله ويكرمكم جميعا..

والله الموفق

بسم الله ..
اخي الفاضل
كلامي عن بنك فيصل كنت سمعته من موظف في فرع روكسي من مدة .. مش عارف الشروط اتغيرت و اللا لأ .. لكن لا اعتقد انها تغيرت .. و هي كالاتي :
* يوجد نظامان للتقسيط : - التقسيط بضمان الوظيفة ( مفردات المرتب ) و - التقسيط بضمان الوديعة

1 - التقسيط بضمان الوظيفة ( مفردات المرتب ) ... يستلزم انك تكون موظف حكومي .. و يكون دخلك يغطي القسط ( و في مرة قاللي انه لازم يغطي القسط مرتين ).. و نفس الموضوع بالنسبة للضامن .. و يطلب من حضرتك الاتي :
- مفردات المرتب من مكان العمل
- مفردات مرتب الضامن
- ايصال كهرباء او غاز .. مكن باسمك او الوالد ..و كذلك الضامن
- بعض الاوراق الروتينية مثل صورة البطاقة و صور شخصية و صورة الرخصة ... الخ
- اقصي مدة للقسط 60 شهر
- حضرتك بتجيب عرض سعر من المعرض بالسيارة التي تريد شرائها و تسلمه للبنك مع الاوراق .. و بعدها تكون فترة الاستعلام ( اعتقد من 4 ايام الي اسبوع عمل ) .. و بعد الموافقة تستلم العربية ان شاء الله
- يوجد مصاريف ادارية و مصاريف التامين في الاول .. و لكن لا اعرف قيمتها تحديدا و تكون نسبة من الثمن الاجمالي للسيارة .
- يوجد قسط للتامين يدفع سنويا ...

2 - التقسيط بضمان الوديعة ...
انسي كل العك اللي فات ... و حط وديعة في حسابك تساوي المبلغ الذي يتم تقسيطه ... و الاجراءات تخلص في ربع ساعة ... مش حيبقي فاضل بس غير الاستعلام .
*ملاحظة علي نظام الوديعة
- الوديعة ممكن تكون شهادات استثمار / حساب جاري / الخ .... و لكن مينفعش تبقي وثائق في صندوق استثمار لان قيمته تتغير بتغير اتجاه البورصة .
- يتم تجميد الوديعة لصالح البنك .. و لا يتم السحب منها الا بمقدار المبلغ المدفوع من الاقساط ..
- العائد علي الوديعة لا يجمد .. بل يتم استحقاقه في موعده عادي جدا و يضاف الي الحساب
- الوديعة مش لازم تكون في حساب حضرتك .. ممكن تكون في حساب اي شخص اخر .. و الدك .. قريبك .. صاحبك .. اي شخص .. و يعتبر ضامن لك .. و يسري علي وديعته ما قلناه سابقا

بقي ان اقول لك ... - النسبة في تقيط المرتب تكون دائما اعلي من تقسيط الوديعة تقريبا بمقدار 1% او 1.5% .. لكن هي كام بالضبط .. للاسف لا اعرف
- فرع روكسي لبنك فيصل من اسوأ الفروع التي يمكن التعامل معها - عن تجارب - .. يمكن و اكيد فيه ناس كويسه ... لكن اغلب المتعاملين مع الجمهور ( و هو المطلوب ) تعاملهم صعب جدا.. و احقاقا للحق .. انا اتعاملت هناك مع اشخاص كويسة و اذكر ان اسماؤهم كانت ا / هشام ابو رحاب -- ا / النوتي
- اقترح عليك فرع مدينة نصر ... او السيدة زينب .. كلاهما حديث نسبيا .. و التعامل هناك جيد الي حد كبير ... و فرع السيدة زينب هادي و جميل .. و في هناك رجل غاية في الادب و الذوق .. و هو اللي ماسك التمويل و الاستثمار اسمه ا / عزت .. ممكن تقابله و تستفيد منه .

اخيرا ... ممكن تاخد في الاعتبار بنك ناصر .. العقد بتاعه مش عقد قرض .. و لكنه عقد بيع سيارة بالتقسيط .. . و اعتقد انه مستوف للشروط الشرعية ( الا اذا افادنا احد الاعضاء الكرام بغير ذلك ) ... لان البنك بيشتري العربية و يبيعهالك ... و اذا فكرت فيه ... و طلع حلال فعلا .. فاعتقد انه يتفوق علي فيصل لانه يقسط حتي 84 شهر .. اي 7 سنوات ... و عموما. هناك فرع مدينة نصر .. اللي باحب اسميه ( فرع عائلي ) لانه فرع صغير و هادي و موظفيه قليلون .. حتلاقي هناك شاب بشوش اسمه الاستاذ سيد .. حيفيدك بكل اللي تحتاجه .

اعانك الله .. و اكرمك ... و بالتوفيق .. و حنستني تقوللنا عملت ايه..

المشاركة الأصلية كتبت بواسطة hk_52

اخيرا ... ممكن تاخد في الاعتبار بنك ناصر .. العقد بتاعه مش عقد قرض .. و لكنه عقد بيع سيارة بالتقسيط .. . و اعتقد انه مستوف للشروط الشرعية ( الا اذا افادنا احد الاعضاء الكرام بغير ذلك )

بداية بارك الله لكم وساعدكم ويسر لكم ولنا.. آمين

فعلا ناس محترمين وجدعان

المشاركة الأصلية كتبت بواسطة hk_52

اخيرا ... ممكن تاخد في الاعتبار بنك ناصر .. العقد بتاعه مش عقد قرض .. و لكنه عقد بيع سيارة بالتقسيط .. . و اعتقد انه مستوف للشروط الشرعية ( الا اذا افادنا احد الاعضاء الكرام بغير ذلك )

طاب في حد هنا ممكن يفيدنا في الموضوع دة يا جماعة؟ أنا فعلا اطلعت على بيانات بنك ناصر وشروطه من على موقعه على النت... ومن ضمن الشروط إنك لازم تبقى موظف لمدة خمس سنين.. ودة شرط مش متحقق فيا..
http://www.nsb.gov.eg/NasserSocialBa...8%A7%D8%AA.htm


أنا أهم حاجة بالنسبة لي القسط يكون أقل كل شهر.. وبالنسبة للعربية يا بشمهندس... أه الأفيو جميلة والياريس تحفة... بس أنا عموما مخللي عملية انتقاء العربية دي للآخر.. المهم اشوف ايه أفضل وسيلة حلال وبسيطة للشراء إن شاء الله

أنا برضو هحاول أعرف أكتر إن شاء الله... عن بنك فيصل وديهاتسو.. يا مسهل

أنا فعلا اطلعت على بيانات بنك ناصر وشروطه من على موقعه على النت... ومن ضمن الشروط إنك لازم تبقى موظف لمدة خمس سنين.. ودة شرط مش متحقق فيا..

انت لو موظف (حكومي ) لمدة اقل من ذلك بقليل - اربع سنوات مثلا - ممكن يتغاضوا عن هذا الامر
و اذا ماكانش - يبقي امامك نظام الوديعة ..

و ربنا يسهلك الامور... و متنساش تقولنا عملت ايه .. علشان احنا في نفس المركب برضه .