المرسيدس الصيني .. جيلي Fc الجديدة
انا اليوم كنت في معرض فورميلا الأهرام وكنت رايح اتفرج فقط
أيوة كنت بتفرج فقط لأني اتخذت القرار اني اجيب أفيو
لكن لسوء حظي وجدت قنبلة اسمها جيلي FC
وطبعا ده لسوء حظي لأني بعد ما شوفتها دماغي باظت ومش عارف اخد قرار
يعني بعد ما كنت مظبط نفسي على الأفيو دلوقتي حصل لي مارشدير في تفكيري والجيلي مشعشعة في نافوخي بطريقة بشعة
العربية حكااااااااااااية
قول من هنا للصبح
شكل خرافي
تقفيل رائع
أوبشنز ملهاش حل
وسائل حماية مش موجودة حتى في الياباني
مش ممكن
اتفرجوا على شكلها
http://www.geely.ua/usersimage/Bins/geely_fc_6.jpg
طبعا الشكل مش كل حاجة بس انا فليتها حتة حتة لدرجة ان الراجل كان هيديهالي ببلاش عشان اخلص
يا جماعة حد يساعدني الله يخلليكم
انا فعلا دماغي باظت
اجيبها وللا اخلليني في الأفيو ؟؟؟؟؟؟
الأفيو : 84.000
الجيلي : 83.000
طبعا مع فارق رهيب في الكماليات لصالح الجيلي ، ومخبيش عليكم لما شوفتها حبيتها من أول نظرة ونسيت الأفيو في لحظة
العربية مفيهاش أي حاجة غلط غير انها صيني
انا عن نفسي مش بعتبر ده عيب لكن يا خوفي يا خفرع لو حبيت ابيعها بعد كده مع سمعة الصيني اللي زي الزفت هعمل ايه .
أفيدوني يا أهل الخبرة في الصيني
والله يا جماعه انا احترت وعندى سؤال
السلام عليكم
والله يا جماعه بجد انا احترت معانا هو السؤال ايه بالظبط ... تعالوا نحدد نفسنا فى سؤال واحد ونجاوب كلنا عليه
ياترى احنا فى مصر دلوقتى لسه الفكر بتاعنا زى زمان والسوق عندنا لسه زى زمان ؟؟؟؟
بمعنى زمان كان الواحد مننا بيشترى العربيه وبيحط فيها فلوسه كنوع من انواع الإستثمار المضمون لما بيفكر يبيع هيكسب فيها وان لا قدر الله ماحصلش نصيب وكسب يبقى اكيييد مش ممكن يخسر زيها زى الدهب كده
لكن انا متأكد ان السوق والفكر المصريين دلوقتى اتغيروا تماما وتحولنا الى سوق وفكر استهلاكى
بالظبط كده زينا زى دول الخليج ليه مش مهم نتكلم دلوقتى فى الأسباب ولكن هى دى النتيجه والحقيقه
يبقى لازم لما نيجى نشترى انهارده اى عربيه المفترض ان معاييرنا الشرائيه بتتغير تبعاً للفكر الجديد
صينى ايوه صينى وايه المانع
طالما انا كمشترى شايف انها بتوفرلى الكماليات اللى انا محتاجها ويمكن زياده فى الرفاهيه كمان وبسعر تنافسى كبير جدا ورهيب فى معظم الحالات وبصراحه انا أولى بالكماليات والرفاهيه دى وبفرق الفلوس دى كلها
انما المهم هنا .... والأهم كمان ....
انى زى ماباشترى اى نوع او ماركه حتى لو امريكى او يابانى او حتى اوروبى محترم باعتمد على ايه ؟؟؟
اول شىء لازم افحص العربيه دى كويس جدا واتأكد ان مافيهاش عيوب تصنيع مثلا
وان يكون لها فترة ضمان لعيوب التصنيع من الشركه المصنعه لها ومن توكيلها هنا كمان
وان قطع الغيار لها موجوده ومتوفره بشكل مايعطلنيش عن مصالحى لو احتجتها وبسعر مناسب غير مغالى فيه
وبعد كده العيوب اللى ممكن تظهر فى العربيه نتيجة سوء استخدامى لها فده حاجه بترجع ليا انا واستعمالى للعربيه واعتقد انكم توافقونى ان استعمالى للعربيه نتيجتة هتكون واحده على اى نوع وماركه للعربيه مهما كانت بلد التصنيع او جودتها
ارجوكم سامحونى على التطويل فى تعليقى واتمنى انى اكون قدرت اوصل وجهة نظرى لكم
واشكركم