شركة المصرية للسيارات "العريقة" . . . تجربتى الشخصية
معـــرض المصــــريــة للسيــــــارات
الشهر اللى فات (شهر 6) روحت المصرية (فرع المنصورة) علشان اسأل على نيسان ليفينا. قابلنى هناك مندوب اسمه محمد بابتسامة عريضة على وشه وقعد يكمنى بذوق ويلعب فى دماغى كأنه هيدينى العربية ببلاش. بكام يا عم قاللى بـ 112 ألف. قلتله طيب نظامكم ايه قاللى بتدفع أى حاجة زى 500 جنيه مثلاً كجدية تعاقد والعربية تكون عندك فى نفس اليوم أو تانى يوم بالكتير.
المهم يوم 20 يونيو روحت دفعت له 1000 جنيه على أساس انى هستلم العربية يوم 1 يوليو وقلت له تجيبلى العربية علشان آجى اتفرج عليها أنا ومراتى قاللى أول ما تيجى هكلمك فى التليفون. كام سعر العربية يا عم قاللى 115 الف قلت له انت مش قلت 112 قاللى ده كان عرض وخلص خلاص قلت له طيب ايه اللى هايخلينى اسيب التوكيل واجيبها من عندكم قعد يضحك ومردش !!!
بعدها بكام يوم قلت له فين العربية قال لى أنا مش عاوز أجيبها علشان ماتبقاش فى المعرض والناس تيجى تفتح فيها وتبهدلهالك (شوف ازاى !!!)
يوم 28 يونيو كلمته وقلت له العربية فين قاللى مش هقدر اجيبها لك إلا لو دفعت فلوسها الأول قلت له يا سلام طيب أنا حاجز ليه قال لى مش بايدى حاجة علشان العربية تطلع من المخازن لازم يكون فى إذن بيع قلت له يا عم ده باقى 3 أيام قعد يتوه فى الموضوع وماطلعتش منه بحاجه.
يوم 30 يونيو هو كلمنى وقاللى على معادنا بكره قلت له طبعا يا باشا قاللى طيب لو عرفت تجيبلى 10 أو 15 ألف هابعت أجيبلك العربية علشان تستلمها بكره ان شاء الله، قلت له هأرد عليك كلمته بعدها بساعتين قاللى السواقين طلعوا خلاص فبكره تدفع وأجيبهالك، قلت له ماشى
يوم واحد يوليو كان يون أربعاء وطبعا كل البنوك كانت أجازة علشان أول السنة المالية المهم اتصرفت فى 39 ألف وروحت دفعتهم (يبقى كده دافع مقدم 40 الف) وقلت له انا الخميس مسافر فيبقى الأحد ان شاء الله وهات العربية بقى، أظن مافيش أحسن من كده أنا لو روحت لأى معرض عربيات صغير فاتح تحت السلم واديته تلت ثمن العربية هايجيبهالى تانى يوم. ابتسم وقاللى ماتقلقش هاتستلمها الأحد. وأكدت عليه يوم الخميس قاللى يوم الأحد تيجى تلاقى عربيتك.
يوم السبت كلمته قاللى معلش يا باشا عندنا زحمة فى التسليم والسواقين بيطلعو يجيبو العربيات اللى هاتتسلم فى نفس اليوم بس.
المهم يوم السبت بالليل كنت مسافر ورجعت بيتى الساعة 6 صباح الأحد ومع ذلك صحيت بدرى ونزلت البنك واستحملت القرف والزحمة وروحت طالع عليه. ايه الأخبار يا عم قاللى السواقين فى مصر من بدرى، طيب العربية هتوصل امتى قاللى مدير الفرع هيسأل بالتليفون، والوقت يمر ومفيش جديد، ايه المشكله، اصله ماكنش معاه تليفونات السواقين، طيب وبعدين، استنى شوية، وبعدين، المدير بيكلم رئيس السواقين ولسه هيرد عليه. طيب يا عم انتو عندكم كام سواق؟ قاللى 4، قولتله مش ممكن تكونو معكمش موبايلاتهم، يا سيدى اعمل 4 مكالمات ورد علىّ، وبعد مرور فتره مش قصيره قالولى العربية هتوصل النهاردة وهنبلغك بالميعاد بالظبط الساعة 2 أو 3.
المهم كان ورايا كام مشوار ومردتش امشى بالفلوس قمت "زى أى واحد مبيفكرش" دافع المبلغ كله.
وتمر الساعة 2 وتمر الساعة 3 فكلمته الساعة 3 ونص قاللى شوف يا باشا احنا متأسفين اصل الموزع معندوش عربيات وهتوصل يوم الاثنين القادم (بعد 8 أيام) واللى انت عاوزه. قلت له هفكر وأرد عليك، كلمته بعدها بعشر دقايق قلتله يعنى يفوت الاربعاء والخميس والسبت وبعدين تقوللى مفيش عربية، يبقى انا حاجز ودافع ليه؟ وتسيبى اروح البنك وآجى من البنك وانت ناوى تدور لى العربية يوم الاستلام الصبح؟ جهزلى فلوسى، قاللى الموزع كلمنا والعربية هتوصل بعد بكره ومعلش واصبر معانا ومجتش فى يومين والكلام ده
طبعا انا روحت لمعرض كبير فى المنصورة وحكيت له الموضوع بصراحه فعمل تليفون وانا قاعد معاه وقاللى العربية موجوده عند الموزع واللون موجود ومفيش مشكله فقلت له هوصل للمصرية اجيب فلوسى واجيلك وبرده عديت على السبع قاللى هاتلى عربون وهاجيبهالك على طول.
طبعا روحت للشركة وقلتله هاتلى فلوسى وبعد محاولات فاشلة منه بالعدول عن قرارى راح لمدير الفرع وقاله فنادانى وقاللى هات الوصولات والبطاقة وبعدين راح قايللى انا مش هديك العربية بـ 115 أنا هعمل خصم، قلت له انا مش عاوز خصم ولا عاوز عربية أنا عاوز فلوسى وهقضيها مواصلات، قاللى مفيش فلوس دلوقتى (وعمال يقول هات البطاقة وهات الوصولات ويقعد يبص فيهم ليه مش عارف) وبعد شد ومحادثات قاللى عدى علينا الساعة 9 بالليل خد فلوسك.
المهم عديت عليهم بالليل وكانو بيركبوا لوح تجارية على عربية فقلت حلو قوى كده ميقدرش يقوللى مفيش فلوس، واخدت فلوسى بهدوء غريب ومعلش يا افندم وفرصه سعيده والسلام عليكم
والنبى دى تعاملات شركة كبيره تعاملاتها بالملايين؟ المهم انا دفعت عربون فى معرض تانى والمفروض انى هستلمها بكره وربنا يسهل.
ابعدوا عن النصابين - ناشيونال موتورز
ناشيونال موتورز
اشتريت لانسر شارك الكاملة من ناشيونال موتورز اسيوط اول الشهر و طبعا يادوب مشيت بيها حاجة بسيطة لغاية ورقها ما خلص ... وفجاة قفلت العربية بالريموت عادى خالص و نزلت اشترى حاجة ... رجعت لقيت العربية مش راضية تفتح خالص !!!
قعدت ادوس بالريموت اكتر من مرة فى كل حتة مافيش فايدة !!!
قلت خلاص افتح بالمفتاح ... وكانت الصدمة ان المفتاح مش راضى يفتح !!!!
كلمت التوكيل و كان الرد : هات سمكرى يفكلك الشبكة اللى قدام و يكشف على البطارية اكيد ضعيفة (مع انى كنت ماشى بالعربية!!)
انا كنت هاتجنن لسة شارى العربية و افك الشبكة ؟
لا و كمان سالت ايه دخل البطارية بالباب اللى مش بيفتح بمفتاحه ؟؟؟؟
وكان الرد : ؟؟؟؟ لا احد يعرف !!!
المهم انا كنت ع الطريق و ما فيش حد ... تطوع واحد كهربائى طيب ييجى معايا و لما شاف العربية جديدة صعب عليه و قال لى : لو فكيتلك الشبكة الدنيا قدام هتبوظ !!
وسالنى : مفيش مفتاح تانى ؟ وافتكرت انى سالت نفس السؤال وقالولى لا هوا واحد بس !!
المهم قدر عن طريق الرفرف يفتح الكبوت و يوصل للبطارية و لقيها سليمة خالص !!
طبعا حصلت بهدلة علشان يوصل للبطارية دا غير الحاجات اللى قعد يجربها و كنت واقف جنبه حاسس انى هاعيط من المهزلة اللى عايشها مع عربية المفروض انى جايبها جديدة و دافع فيها تحويشة عمرى ودلوقتى بقها مفتوح و بيتلعب فيها !!!
خدت تاكس ودخت على بتاع ساعات علشان اغير حجر الريموت (يمكن ؟) وقالولى الحجر سليم خالص .. مع كدة حطيت واحد جديد !
المهم جربنا كل حاجة و مفيش فايدة ... اتصلت بمهندس الشركة و كان رده انى اجيبله العربية القاهرة (طبعا كوميديا لو عرفتوا ان العربية واقفة فى طريق اسيوط - سوهاج و مش بتتحرك !!! دا غير انها اتوماتيك ما بتتزقش)
دا غير الوقت اللى ضاع و البهدلة اللى خدتها و انا دلوقتى سايب العربية على الطريق و مشيت اشوف شغلى
لو برمجة المفتاح طارت المفتاح هيفتح الكالون بتاع الباب عادي
انا قلت نفس الكلام بالحرف لبتاع التوكيل .. وكانت الردود :
-العربية دى جاية بمفتاح واحد !!!
-موضوع ان المفتاح ما بيفتحش دى غريبة و عمرها ما حصلت !!
اللي انا باقوله
فيه حاجة ملعوب فيها مش تمام
انا سألت مدير الصيانة على الموضوع ده قال لي
فيه مفتاح طوارئ حديد داخل الريموت (يتم سحبه من مكانه فيظهر مفتاح كامل عادي جدا حديد) بحيث ان المفروض يتم الفتح به في حالة ما اذا الريموت لم يعمل فأنا مستغرب جدا ان المفتاح الحديد لم يفتح الباب حيث ان فتح الباب في الحالة دي ليس له اي علاقة بالدوائر الكهربية
, شنطه العربيه مش راضية تفتح بالريموت و مافيش مكان لمفتاح !!
انا اعصابى اتحرقت .... كل يوم يقولولى هانبعت لك حد ... و العربية واقفة على الطريق
حضر احد الفنيين بعد ان قام احد العاملين بالتوكيل بالاتصال به .. و الرجل فنى تويوتا اصلا ... لما شاف العربية قال لى :
يا باشا ايه البهدلة دى !!!
طبعا صعب عليه منظرها و طبعا هوا عارف انها عربية جديدة
المهم باستخدام عتلة حديد عرف يفتح الباب ولقى كالون الباب بايظ خالص و قال بالحرف :
انا عمرى ما شفت حاجة زى كدة فى عربية جديدة فى حياتى !!!
وسالنى - كالعادة - على المفتاح التانى !! و كالعادة برضه استغرب خالص لما سمع موضوع انى استلمت واحد
و لقى الريموت بايظ خالص و قاللى تشغلها بالمفتاح و انا هاظبطلك الكالون
وطبعا انا دلوقتى كل حاجة باعملها بالمفتاح
اتصلت بالتوكيل "ناشيونال موتورز" وكان كلامهم معناه "بالذوق" = اخبط راسك فى الحيط !!
ولكن علشان يثبتوا انهم لسه بنى ادمين دلونى على ورشة فى القاهرة اعمل مفتاحو اصلح الحاجات اللى باظت على حسابى !!!!!!!!!!!!!!!!!!
الحكاية خلصت بالاتصال التالى من احد العاملين بالتوكيل :
"ياريت يا دكتور ما تتعبش نفسك لان انت اللى هتتاذى !!!"
"يعنى ايه ؟ ... انا هاعمل محضر و اكلم بتوع حماية المستهلك"
ضحكة قصيرة (زى بتاعة بتوع المافيا فى الافلام الاجنبى)
"يعنى عماد بيه بيقول ما تتعبش نفسك لان انت اللى هتتاذى"
والبقية فى حياتكم فى الامانة والصدق والاحترام و الالتزام و ...و..
واهلا بالغش و النصب و الاحتيال و البلطجة و ...و...
وابعدوا عن ناشيونال موتورز النصابين ...
وكل سنة و انتم طيبين !
____________________________________-
نرجو منك عدم تكرار الموضوع فى أقسام أخرى
حتى لا نضطر أسفين بوقف عضويتك لمخالفة قواعد المنتدى
مشــرف عام - 2