الموضوع: لسه في خير

أولا يادينا بالنسبة لموضوع الشرطة ففعلا مش كلهم وحشين ومرتشين ومفتريين
لأ في ناس منهم محترمة وناس ضحت بحياتها عشان ناس تانية مش بس في حرب اكتوبر
لإ زي ماذكرتي الضابط اللي دفع حياته تمن لإنقاذ وحدة كانت هاتُغتصب وربنا بعته ليها وانقذها.
ومش كلهم بيتلككوا للناس وعايزين يلبسوهم مخالفات بأي شكل لأ سعات بيفوتوا لبعض الناس طالما مهياش حاجة كبيرة وخطيرة وعن غير قصد وهي دي المقصود بيها روح القانون زي الموقف اللي هاحكيه دلوقتي انا كنت ماشية بعربيتي مرة ولاقيت ضابط أو امين شرطة ومعاهم عساكر واقفين بيفتشوا على الرخص وانا كانت رخصة عربيتي مكتوب عليها تصريح مؤقت وانتهي بقاله بتاع اسبوعين أو يمكن اكتر مثلا (كنت بصراحة مستتقلة مشوار المرور اوي وكان لازم اروح اجدده ) ومن حظي برده اني في اليوم ده فعلا كنت رايحة اجدد التصريح اصلا
فسألني رخصك طلعتله رخصة القيادة (وعملت عبيطة ومطلعتش رخصة العربية لإني طبعا كنت خايفة يسحبها لإنها تعتبر منتهية) طبعا منفعش الاستعباط معاه ولاقيته قالي وفين رخصة العربية طلعتهاله اول مابص فيها قالي بس التصريح منتهي قلتله انا عارفة ورايحة اجددها دلوقتي والله يافندم
قاللي بس كده مخالف والمفروض تتسحب قلتله والله يافندم كنت مستنية اخد اجازة واروح اجددها ورايحة النهاردة اهوه
سكت شوية وقالي طيب انا هافوت المرة دي مع انها المفروض تتسحب بس خدي بالك متمشيش بيها اكتر من كده عشان كده غلط وممكن تتسحب منك
قلتله انا رايحة اجددها اهوه ومتشكرة جدا لحضرتك يافندم
وكان بيتكلم بمنتهي الذوق بصراحة ومن غير تعالي ولا حاجة ورغم اني مقولتلوش انا من طرف اللوا فلان ولا دفعتله رشوة ولا حاجة الا إنه سابني اروح اجددها ومسحبهاش مني.
تعالوا بقي نتخيل لو كنت انا مثلا لامضت معاه ولا اتكلمت معاه بطريقة مش كويسة أو متعجرفة واستفزيته تفتكروا كان هايكون رده ايه؟
لكل فعل رد فعل وساعتها مكنش حد هايلومه لإن اي حد منا لو سالته يقولك بالذوق تاخد اللي انت عايزه لكن تتنطط عليا ولا تتكلم بقلة ذوق يبقي لازم يكون رد الفعل في منتهي القسوة.

احنا بس ياجماعة مشحونين بزيادة اصلا ناحية اي رجل شرطة مهما كانت رتبته (وطبعا لإن في امثلة فعلا فاسدة وبتظهر بقوة في المواقف اللي بنسمعها وبنشوفها في الاعلام ) عشان كده احنا بنتلككلهم برده ونحس من اقل تصرف ليهم انهم بيتنططوا علينا مع انه ممكن يكون بيأدي واجبه وبيشوف شغله وبس .
في النهاية كل مهنة فيها الشريف وفيها الفاسد
الفساد لايقتصر على وظيفة بعينها
اما بالنسبة لجيل التمانيات (انا برده مواليد 81) فإحنا فعلا جيل مظلوم :k30:
جيل جه لقي الدنيا خربانة اصلا وعليه إنه يإما يتعايش معاها بخرابها ده يإما يصلحها
في مننا اللي نجح وفي مننا اللي فشل بس اهو المفروض كلنا نحاول بقدر الامكان مش مطلوب مننا ننجح بنسبة 100% لكن على الاقل نحاول نعمل حاجة منقعدش نحط ايدينا على خدنا.
انا مثلا لما كنت بدور على شغل اول ماتخرجت طلع عيني عشان الاقي شغل وعملت انترفيوهات كتيييييييير وقدمت في وظايف ياما لحد ماربنا أذنلي برزق الشغل (لإن الشغل والزواج والخلفة رزق ممكن يكون مكتوبلك وممكن لأ) إشتغلت يوم ماعملت الانترفيو وبدات بمرتب صغير جدا بس اتعملت واتدربت وبعدين اتنقلت من شركة للتانية لحد الشركة الحالية والحمد لله بقيت مساعد مدير عام ومرتبي كويس والحمد لله الدنيا ماشية وكل فترة بيجيلي عروض من شركات كبيرة وساعات كمان انا اللي مش بوافق لإني بقول انا مستقرة نفسياً في الوظيفة الحالية وخلاص لحد مافكر اغير شركتي يبقي ساعتها ادور.
منكرش طبعا اني بيجيلي اوقات كتيرة بكون متشائمة ويائسة ومحبطة من احوال البلد واحوالي انا واسرتي لكن بتكون فترة واهي بتعدي وبنرجع نعيش ونستمر في الحياة تاني وخلاص اتعدونا على كده هاننتحر يعني؟
الاكتئاب اللي عندنا ده مش اكتئاب فردي ده اكتئاب قومي ياجماعة
بس خيلنا نشوف ايه الحاجات الكويسة اللي عندنا وغيرنا محروم منها.
صدقوني هانلاقي نفسنا احسن من ناس كتييييييييير.
رغيت كتير اوي معلش بس الموضوع اصله متفرع برده ومحتاج رغي الحقيقة يادينا

المشاركة الأصلية كتبت بواسطة دينا أبوالعلا

يا باشا الموضوع موضعك انتي تتكلمي فاللي انتي عايزاه طبعا واللي مش عايزاه امسحه
علي فكره انتي هتجبلنا الكلام وهتخليهم يقوله طبعا عشان بنت لو حد فينا كانت الرخصه اتسحبت
حلو قوي اكتئاب قومي دي
والله عندك حق احنا احسن من غيرنا علي الاقل لينا بيت بنام فيه

نورتيني

الله اعلم هو عمل كده عشان بنت وبس ولا عشان اتكلمت معاه بذوق ومن غير ماتعالي عليه يعني وكمان لإنه حس اني مش بستعبط وماشية بيها كده بلطجة يعني وفعلا ربنا يعلم اني يومها بالذات كنت نازلة مخصوص عشان اجددها.
لإن والدي دايما يقولنا امشوا صح متعملوش مخالفات ولا تمشوا برخصة منتهية ولا حتى اشتراك مترو خلصان.
دايما يقول خلينا ماشيين في السليم احسن وبلاش نحط نفسنا في مواقف تخلينا معرضين للمخالفة أو للتأنيب من اي حد.

مع اني ركبت تاكسي مرة والسواق لاقيته بيقولي عارفة انا فضلت بسوق 13 سنة من غير رخصة سواقة (طبعا كان بيمشيها فلوس ورشاوي.
بس الحمد لله انا محطيتش رجلي في عربيتي ولا سوقتها الا لما طلعت رخصة السواقة

المشاركة الأصلية كتبت بواسطة دينا أبوالعلا

ونعم بالله
عايزه اقولك حاجه ابويا وابوك لما شاركو في 73 كانو جدودنا بيقولو عليهم جيل فاشل ومش متحملين المسؤليه ولو اتفرجت علي الافلام القديمه هتسمع من ده كتير
عايزه اقول ان الشده ممكن تصنع رجاله يعني الولد اللي كل همه يلفت نظر والبنت اللي كله هما توقع ولد ممكن يكونو مش محتاجين بتر زي ما حضرتك بتقول ممكن يكونو محتاجين اعاده هيكله او صدمه
معاك ان مكنش انعدام الاخلاق والذمم متفشي زي دلوقتي اعتقد ان مجرد احساسنا بالغلط ده بريق من الامل

شكرا على ردك
بس أنا مش قصدي على ولد عامل ظريف أو بنت مستهترة .......لا دانا بقولك فساد و افترى.......

يعني كل ظابط أو مسئول بيعمل لناس ‎خدمات و ‎يستغل سلطاته....ده فساد و افترى.......
شايفين إني ‎مزودها???? فكرو كدة.....فين العدل إن ‎رخصة فلان تتسحب و ‎رخصة علان لا و الاتنين ‎مخالفين ???
ماهو ده فكر الواسطه.......عدم تكافؤ فرص ف كل حاجة........

و كل شارع فضل محفور عشان تصليح بالسنة أو 2 أو ‎3.........ده فساد و افترى.......

و كل واحد يركن صف تاني و يشد الهند بريك .........ده فساد و افترى.......

و كل مطب أو بلاعة أو حفره ف أرقى شوارع القاهرة بقالهم 5 سنين .........ده فساد و افترى.......

و كل واحد ‎يخش على الطابور من أوله و طوز ف إلي واقفين .........ده فساد و افترى.......

و دي حاجات بسيطة و البلاوي كتير زي ماحنا عارفين........

أنا واحد ‎شغال ف شركه مستحيل تسمحلي بي الاستهتار ده ...أو حتى عشره....و بدفع ضرايب من مرتبي حوالي 10000 كل سنة و ملتزم بي كل القوانين و الرسوم.........ليه أستحمل كل الاهمال ده و أدفع أكتر عشان أنجو منه???

و على ‎فكرة...جيل الآباء حتى لو حارب ف أكتوبر.....ده مش معناها إنهم ملايكة....يعني هما حاربوا بمزاجهم??
و حتى لو كانو أبطال....ده مش معناه إنهم فوق المساءلة.......ماهو دول بعد كدة مسكو البلد وادي النتيجة !!!!
‎الأدمغة دي هيا إلي عايزة بتر من وجهة نظري.....عشان صعب أوي نعلمهم الحق و العدل و إتقان العمل بعد ما عدو الأربعين .....و في منهم ضحايا طبعا

أنا عندي أمل ف الأجيال الجديدة 2000 أو بعد كدة كمان عشان التنشئة الدينية أنا شايف إنها زادت يعني كل واحد فيهم هيكون يتحرى الحلال و الحرام لما يكبر ......و ده ‎يخليه ميعملش فساد و افترى.......

بجد شكرا على الموضوع الممتاز إلي ‎خلاني أفضفض كدة

ازيكم جميعا
الخير موجود يا جماعة بس للأسف مدفون بقاله 10 سنين واللى عايزه لازم يدور عليه عشان بقى صعب التعامل بيه مع الشعب المصرى
اخوكم يوسف