لله يا محسنين ساعدوني في الاختيار

**hazembarakat** · 28-01-2009 05:47 PM

انا ناوي أشتري الميني فابيا و بفكر في نفس الوقت فالرينو سيمبول
بس عايز أسالكوا سؤال هل سعر الميني فابيا حلو عليها والا غالية عليها
و هل سعر إعادة بيعها حلو والا اه نظامه ؟
مع العلم إن العجبني فالميني فابيا علوها على أرض مقارنة بالفابيا و انها الماني متقفلة في الصين
لكن الرينو فرنساوي متقفل في تركيا
الفابيا متجلربة و بيشكروا فيها لكن الرينو لم يتم إختبارها بعد
انا مش عارف صيانة الفابيا مع توكيلها عاملة اه بس عارف إن الرينو التوكيل فوق الممتاز
مع العلم دي اول عربية لية فحياتى ,العربيتين الي كنت بسقهم كانوا بتوع أختي وأبويا
مش عايز نظام الييخوش يتصور جنب الموضوع و يطلع برا
تبرع والو بجنيه

**mbisar** · 28-01-2009 09:25 PM

بص بالنسبه لسعر اعاده البيع بتاع المينى فابيا لسه ميبانش دلوقتى بس كل العربيات المستعمله سعرها هينزل فى الأرض قريب عشان ازمه سوق السيارات اللى موجوده دلوقتى
بالنسبه لسعرها غالى عليها بتبقا وجهات نظر يعنى فعلا سكودا عربيه حلوه جدا مفيش كلام و موتور المانى بس انا مدفعش مبلغ يوصل لأكتر من 90 الف جنيه عشان عربيه صغيره اوى كده يعنى المينى فابيا هاتش باك و صغيره متستاهلش بصراحه المبلغ ده كله يعنى الجراند بونتو ارخص منها و شكلها احلى منها بكتير و اكبر شويه كمان و جميع الكماليات
بالنسبه للمقارنه بين الرينو و السكودا من حيث التوكيل انا معرفش حاجه عن توكيل السكودا بس الرينو فعلا توكيل ممتاز كل اللى اعرفهم و اتعاملوا معاه بيشكروا فيه اوى
الرينو سيمبول محدش جربها لسه عشان يقارن بينها و بين الفابيا بس عامه هو من الشكل العام العربيه شكلها حلوه و فى نفس الوقت كماليتها كويسه و توكيلها محترم و سعرها كويس و موتورها كويس بردو 1400 سى سى و 98 حصان
و فى النهايه ربنا يوفقك فى عربيه حلوه بس نصيحتى اصبر شويتين لحد ما السوق يستقر و انا بجد لو مكانك لا هجيب دى ولا دى هجيب رينو ميجان مستعمله

**Busquets** · 28-01-2009 09:33 PM

من القالك إن الفابيا تافيل صيني
الفابيا يا مان ألماني تافيل شيكي
وكمان للأخ mbisar الفابيا أرخص من البونتو
الفابيا ٨٩ وسعرها أنا شايف إن فوق الممتاز
ولو حضرتك ركبتها مكنتش قلت انها ضيقة
العربية واسعة كنت راكب فيها مستريح قدام و ورا

**mbisar** · 28-01-2009 09:44 PM

فابيا 1.6 F/O A/T Combi 2009 128900
فابيا 1.6 F/O A/T 2009 124900
فابيا 1.6 M/T Sport 2009 125900
فابيا 1.4 F/O M/T 2009 99900
ده سعر كونتكت كارز انا والله معرفش موضوع ال 89 ده او ممكن يكون الأسعار نزلت فى الفتره الأخيره دى
و بالنسبه للضيق انا اصدى انها شكلها كده صغيره من بره انا مركبتهاش
بص عامه الشكل الخارجى ده ازواق يعنى ممكن حد يشوفها وحش وحد يشوفها حلو
انا عن نفسى شايفها شكلها وحش اوى و شايف ان الجراند بونتو شكلها احلى منها بكتير

**Busquets** · 28-01-2009 10:25 PM

سيبك من الأسعار دي
كونتاكت مش بيعدل الأسعار إلى كل فترة
أنا لسة نزل سأل من يومين بظبط
الجراند بونتو أكيد أحلى منها فل شكل بس إمكانيات الفابيا وسعرها يخلها أفضل

**hazembarakat** · 29-01-2009 06:49 AM

معلش أنا سرحت وانا بكتب أنا عارف إن هي ألماني ـقفيل تشيكي
لا مؤخذة

**mramzy** · 29-01-2009 09:25 AM

هى سعرها فعلا 89900 من حاولى اسبوعين
هى عربيه حلوة جدا وكمليتها الاساسيه اكثر من رينو يعنى فيها فرامل abs ebd بس بصراحه هى من ورا تاخد 3 بالعافيه او 3 وزن خفيف لانى عملت نفس المقارنه
الشنطه بتاعه الرينوا تحفة
الاسكودا التوكيل لتاعها زفت وخصوصا اللى فى غمره
عن تجربة

**hazembarakat** · 29-01-2009 12:23 PM

زفت من حيث اه يا mramzy علش ممكن توضح؟

**mramzy** · 29-01-2009 12:49 PM

موعيده -المعامله - الاساعر الغاليه والمبالغ فيها
انا عندنا فى الشغل a4 ستيشن عملنا 5 الاف ورحنا التوكيل الساعه 8 ونص كنا واقفين صفين بره الشارع ومعطلين الشارع وقلولنا خلاص شطبنا ابقوا تعالوا يوم تانى
وكان ليا صديق عنده فابيا كان عايز يغير الاسطوانه البليه (الدبرايج قالوا هاتخد اسبوه وتتكلف فى حدود 1500 جنيه
فى الوقت ده اوكتافيا عملت حادثه فنزلت ادور على قطع غيار فى التوكيل ما لقتش سالت واحد هناك دلنى على واحد جنب مستشفى القوات الجويه فى احمد سعيد طلع فعلا انسان محترم جدا لقيت كل حجه وعنده الاصلى وعنده اللاصلى برضه بس مش التوكيل وبيقول ويقثول السعر المهم اشتريت الحاجه وسالته على ميكانيكى كويس دلنى على مهندس شاطر جدا فى الهرم رحتله انا وصديق عمل عنده الدبرياج وداناله العربية قبل الافطار فى رمضان خدنها بعد التراويح وهو اشترى وبعت وعمل كل حاجه بسعر اقل من نص التوكيل وعلم تزبيط للعربية وكل اللى فيها وكمان عرفنا انهم 4 شبابا مهندسين واخدين دورات فى المانيا على العربيات فولكس فاجن ( سكودا سيات فولكس) ناس بجد جامده
ما شاء الله عليهم ومن ساعتها مش بغيرهم ابدا سواء لعربية الشركه او لاى حد طالب ناس كويسه وعندهم طقم شغال حكايه ربنا بجد يبارك لهم

**hazembarakat** · 29-01-2009 12:56 PM

طب حضرتك تعرف رقم المحل ده البتجيب من عنده قطع الغيار و ما هو عنوانه ؟
معلش بتقل عليك أصل أنا إنهاردة نزلت شارع دمشق عشان أسأل على قطع غيار الميني فابيا كلوا قالي مش موجودة فأنا عايز أطمن معلش تعبك معايا
طب لو انا لقيت إن قطع الغيار متوفرة يبقى ممكن أروح للمهندس الشاطر ده حيبقى فهمان فيها والا حضرتك اه رأيك ؟