من حوالي سنة ونصف .. عربيتي الفيكترا 1600 سي سي مانيوال بدورها مش بتدور الكلام ده مش الصبح .. والبطارية جديدة والمارش شغال 100% والدينانو شغال والبوجيهات سليمة

رفعت الكنبة اللي وراء ورفعت الغطاء البلاستيك اللي مغطر طرمبة البنزين .. ولقيت الطرنبة مش بتضخ بنزين من الخراطيم بتاعتها

جيت ميكانيكي والثاني معرفوش السبب . سحبتها على منصور مدينة نصر قالي غير الموبينة !!! غيرتها كانت تقريبا بـ 450 جنيه
بعد أربع شهوراتكرر نفس العيب .. وديتها منصور مدينة نصر برده .. قاللي غير مشط الموبينه !!! غيرته بـ 400 جنيه تقريبا !!
بعد أربع خمس شهر تقريبا .. اتكرر نفس العيب .. رحت لكهربائي .. قالي طرمبة البنزين عايزه تتغير مش شغاله .. غيرها .. غيرتها بطرمبة بوش ألماني بـ 750 جنيه تقريبا بالفلتر .. ولما الكهربائي جه يدورها بالطرمبة الجديدة مادرتش !! فقعد يلعب شوية في الكهرباء وقاللي سلك الموبينة .. ولما لقاني تنحتله علشان الطرمبة مكنتش عايزة تتغير قاللي .. وبرده الله الطرمبة بايزه ..

بعد ثلاث شهور العيب اتكرر !!! جبت واحد كهربائي .. برده رفع الكنبة اللي وراء وشاف الطرمبة لقاها مش بتضخ بنزيت .. والكهرباء اصلا مش وصله للطرنبة !! قعد ساعة يكشف على الفيوزات لقاها سليمة .. والراجل شبه فشل .. قلتله أنا شوفلي كده الموبينة .. خلع سلكها وقالي هات سنه مارش .. وفعلا لقاها مش بتجيب كهرباء .. قعد يراجع على الفيوزات اللي في العلب السوداء اللي جنب البطارية ويشيل كل واحد ويزقة كويس ولغاية ما الموبينة جابت كهرباء ... والكهرباء وصلت لطرمبة البنزين والعربية دارت

أنا كده عرفت بعد الخسائر الكبيرة دي من شوية صناعية ومهندسين زبالة سوا بره أو جوه التوكيل .. ان العيب ان الموبينة بتفصل كهرباء .. وان الفيوزات هية السبب !!

حسبي الله فيهم .. أنا عندي دلوقتي طرمبة بنزين سليمة وموبينة سليمة ومشط موبينة سليم وسلك موبينة سليم .. واشتريت غيرهم !!!

السؤال .. ايه موضوع فيوزات الموبينه دي .. ؟ وهيه فعلا موضوع فيوزات ؟؟ وأعمل ايه علشان الموضوع مايتكررش ؟