سوزوكي ماروتي نفسى اتسدت منها

**sab3aawy** · 11-03-2009 10:46 AM

المشاركة الأصلية كتبت بواسطة wasta

هيه أكيد طبعا أزواق يا أستاذ تامر بس بزمتك إنت مش حاسس إن سعر العربيه عالى زياده عن اللزوم

شوف يا ستاذى هو فيه مدرستين، مدرسة يهمها الشكل اكثر من اى شئ اخر ومعندهاش التزامات تخليها تدور على الاعتمادية، ففى هذة الحالة بشترو عربية عمرها عشرة سنوات مثلا بس تكون كبيرة كدة وليها هيبة، ومعندهمش مانع يقضو اجازة نهاية الأسبوع ما بين الميكانيكى والكهربائى، انا كنت بعمل كدة وانا اصغير لما مكانش ورايا اى التزامات، ومدرسة تانية بتكون خرجت حسابات الشكل من اعتبارها وبتدور على حاجة تقضى غرضهم باقل قدر من وجع الدماغ واقل وقت يضيع لدى الصنايعية واقل مبلغ يتصرف على الاصلاحات لأن الفلوس لها بنود صرف اهم، وبالتالى بيدوروا على عربية زيرو حتى ولو صغيرة لا تحتاج سوى للبنزين والزيت ولها ميعاد صيانة محدد واحتمال ان تفاجئنا بمقلب يضيع يوم عمل بأكمله او اكثر لزيارة الميكانيكى او التوكيل هو احتمال ضئيل لا يذكر

فلذلك اللى انت ممكن تكون شايف انه غالى ومبالغ فى تمنه غيرك ممكن يكون شايف انه معقول، والسيارة المستعملة كبيرة الجحم اللى انت شايفها ابهة وتساوى تمنها غيرك ممكن يكون شايف انها متساويش غير تمن الحديد اللى فيها بالكيلو، ولولا اختلاف الاذواق لبارت السلع

**wisambasha** · 12-03-2009 03:44 PM

المشاركة الأصلية كتبت بواسطة mesaharaty

السلام عليكم جميعا
أشكر جميع من شارك فى الرد على استفسارى
وبارك الله فيكم وخلاص رجعتولى الثقة فى الماروتى تانى
أنا من الأول كنت حاسس إن الكلام ده مش مظبوط (غير منطقى) لكن للحق أقول إنى سألت ميكانيكى بيشتغل فى الماروتى فقاللى إن فيه جزء فيبر فى معلقة الفتيس (اللافيه) بس لا يوجد منه خوف على الفتيس أو الغيارات لأنه مش داخل فى ديناميكا الغيارات يعنى زى ما يكون قاعدة للتثبيت فقط
حد فاهم حاجة ؟؟؟

وعلى أى حال أنا باحب العربية دى وطبعا بعد ما تأكدت من كلامكم عنها وخبراتكم فيها يبقى لازم أضرب لكم تعظيم سلام
وشكرا

صدقني يا اخي العربية دي صغيرة بس جبارة انا فضلت معايا سنتين موديل 2002 وعملت بيها مشاوير وسفر بالعبيط وعمرها ما قلت اصلها ابدا

**kareemmonsef** · 12-03-2009 07:19 PM

انا بشتغل مهندس فى توكيل سوزوكى
مافيش ترس بلاستيك فى الفتيس نهائيا
دا كدب بين

**freespoken** · 13-03-2009 04:56 PM

المشاركة الأصلية كتبت بواسطة kareemmonsef

انا بشتغل مهندس فى توكيل سوزوكى
مافيش ترس بلاستيك فى الفتيس نهائيا
دا كدب بين

انا من زمان كان نفسي اشوف حد علي المنتدي من التوكيل
انا عندي سؤال محيرني جدا : استهلاك البنزين في العربية كاااااااااااااام انا لما حسبتها طلع رقم عجيب جدا
فيريت تطمني ياهندسه وأهويبقي الكلام من بق اهل الاختصاص
ياريت يابشمهندس متطنشنييش الله يخليك وياريت تفضل معانا في المنتدي ونعمل موضوع ونثبته زي منتدي الهيونداي كده عشان في اسأله واستفسارات تانيه كتيير.
وشرفتنا يابشمهندس

**wessampo** · 13-03-2009 07:29 PM

انا كمان عندى نفس المشكلة و رحت التوكيل ولسة برضة البنزين عالى قوى يعنى 9.5 فى الكيلو يا ريت رد يا جماعة فى الموضوع دة

**zalpany2000** · 13-03-2009 09:45 PM

9.5 لتر في الكيلو ؟؟؟؟
ولا 9.5 كيلو في اللتر ؟؟؟؟
اصلها تفرق
تحياتي

**m7nsh** · 14-03-2009 08:10 PM

المشاركة الأصلية كتبت بواسطة zalpany2000

9.5 لتر في الكيلو ؟؟؟؟
ولا 9.5 كيلو في اللتر ؟؟؟؟
اصلها تفرق
تحياتي

هههه يانهار ابيض

اكيد قصده 9.5 كيلو فى اللتر ,, مستحيل التانيه دى خالص !! انا قلبى وجعنى يا دكتور من مجرد التفكبر فى استهلاك بنزين بالشكل ده ( بينى و بينك و جيبى برده وجعنى اوى ) !