الموضوع: مقارنة بين فيات بونتو كلاسيك و دايهاتسو سيريون وان

المشاركة الأصلية كتبت بواسطة i_Am_Legend

يا باشا سيريون ايه دى سورى شكلها عامل زى العربيات الصينى والتابلوة بتاعها شكلة رزل هو والعداد الغريب دة

يا راجل حرام عليك...صيني ايه
أنا معاك ان تصميمات دايهاتسو الحالية غريبة شوية أو خللينا نقول غير تقليدية..بس الناس كلها عارفة العربية دي ايه وعاملة ازاي...وبعدين اذا كان قصدك على عداد الـ rpm اللي كان شكله عامل زي المنبه ده فا ماتقلقش العداد ده كان اتشال في موديل 2008 وبطلوا ينزّلوها بالشكل ده...دلوقتي الـ rpm محطوط مع باقي العدادات زي العربيات الطبيعية
وبعدين البونتو دي شكلها تقريبا متغيرش من زمان أوي...فا شكلها دلوقتي (بالذات من جوه) أنا شايف انه بقى قديم أوي وراح عليه...وغير كده الميزة في السيريون انها واسعة من جوه بطريقة غريبة عكس ما يبان عليها خالص...الواحد لما بيركبها ويقعد جواها بجد بيبقى مش عارف جابوا المساحة دي كلها منين! و هو ده اللي بيتقال عليه الذكاء في التصميم
طب أقوللك على حاجة كمان؟ عارف الميني فابيا اللي بتبدأ من 90 ألف دلوقتي دي؟ ايه رأيك اني لما ركبتها حسيت بفرق رهيب في مساحة الصالون بينها وبين السيريون؟ أينعم الفابيا من جوه ممكن تكون أشيك شوية بس بجد السيريون دي أوسع عربية في فئتها.....وشركة دايهاتسو عموما من أكتر الشركات اللي بحترم تصميماتها...بجد تصميمات فيها ذكاء غير عادي...والماتيريا والتيريوس كمان أكبر دليل على كلامي

المشاركة الأصلية كتبت بواسطة Demirell

ان شاء الله ربنا يكمّلهالك على خير يا abohalmos
وفعلا الأحسن ان الواحد يستنى كام شهر كده ومايشتريش دلوقتي....ومين عارف..يمكن ينزّلوا منها أوتوماتيك كمان ويبقى الواحد استنى بفايدة
وأحسن حاجة فعلا زي ما بتقول ان الواحد يبعد عن البنوك ووجع دماغها...بس تفتكر التوكيل بيرضى بحكاية التقسيط المباشر دي؟ أنا شخصيا بتمنى ذلك...يمكن الواحد الموضوع يلعب في دماغه وللا حاجة وينضم لنادي أعضاء السيريون في يوم من الأيام...خصوصا اني أنا كمان بفكر في عربية لنفسي قريبا ان شاء الله...بس نفسي ينزّلوا منها أوتوماتيك
عموما السيريون عربية فعلا جميلة ومن عربياتي المفضلة....بس مش عارف ليه ناس كتير بتقول عليها عربية بناتي....رغم اني مرة قبل كده شفت راجل ملتحي سايقها! ومرة تانية راجل تاني شيك كده ولابس بدلة وكرافتة

ههههههههههههههه

يا عمي ولا تزعل نفسك
انا ملتحي وراكبها ومفيش اي مشكلة من العربيه ناحيتي
يعني مبتعملشي اي حركه تقول انها عاوزه بنت بس

هههههههههه
والله العربيه شيك جدا وانت عارف اللي مجربشي يتكلم زي ما هو عاوز


================

اما اخي الفاضل اللي بيقول ان العربيه شكلها صيني ومش عاف ايه وشكل العدادات والكلام ده

بصراحه دي مسألة ازواق
يعني كتير اعجبوا بشكل العدادات والتابلوه كله
انا واحد من الناس لما شوفت العربيه اول مره اول حاجه عجبتني التابلوه وشكل عداد الأر بي ام
صحيح مسألة التغيير في شكل العدادات ده شئ غير مألوف للناس ولنفسي انا كمان ولكن فعلا العداد شكله حلو

طيب اشمعنا اي شاب عاوز يروش عربيته بيروح يركب عداد ار بي ام حتى لو هو عنده في عربيته نازله به
علشان يركبه على القايم اللي جميه او على التابلوه ويبقى منظر اسبورتي شويه

دي كلها ازواق
ومع احترامي لرأي حضرتك ففي حاجه اسمها تصميمات عصريه وبيبقى عليها اختلاف كتير في الرأي زي الماتيريا بالظبط
وهيا تصميمات دايهاتسو كلها كده دلوقتي
تصميمات عصرية لحد كبير ممكن متحسش بها دلوقتي ولكن بمر السنين ممكن تلاقي الشكل جيد وكان كويس بالنسبة لأنه قديم وقتها

السيريون احسن كتير جدا من حيث الشكل و شكلها شيك جدا و صالونها واسع و يابانى انا شايفها احسن كتير

المشاركة الأصلية كتبت بواسطة أبو عبدالله

يا عمي ولا تزعل نفسك
انا ملتحي وراكبها ومفيش اي مشكلة من العربيه ناحيتي

ايه ده بقى! أوعى يكون أنت اللي كنت سايق العربية قدامي ساعتها يا أبو عبد الله

عموما أنا برضه شايف ان حكاية شكل العربية دي نسبية وكل واحد ليه ذوق مختلف فيها
انما السيريون كاعربية مفيش جدال عليها

نقطة لـ abohalmos صاحب الموضوع للتوضيح :
أنا كنت بقول من ضمن كلامي اللي فات ان يا ريت التوكيل يوافق على حكاية التقسيط المباشر معاه بس كان قصدي يعني بشروط ميسرة شوية..يعني بمقدم أقل من الـ 50 في المية اللي بيشترطوها وعلى فترة سداد أكتر من سنة أو سنتين
عشان للأسف هي دي الشروط اللي كل التوكيلات والمعارض بيفرضوها عليك لو عاوز تقسط معاهم بطريقة مباشرة

المشاركة الأصلية كتبت بواسطة abohalmos

اللى انا عارفه ان توكيل دايهاتسو بيقسط بدءا من 25% من تمن العربية

لو الكلام ده أكيد يبقى تمام قوي...أصل أنا كنت بشوف الاعلان اللي كانوا دايما بينزلوه عن العرض بتاعهم اللي هو 25 أو 20 % مقدم وقسط لغاية 60 شهر بدون ضامن بفايدة 7.76% بس كانوا بيكتبوا انه بالتعاون مع بنك Bnp paribas :(

بس في ملحق سيارات أخبار اليوم بتاريخ 10 يناير اللي فات كانت الشركة العالمية للسيارت (united international) اللي هي تبع عبد اللطيف جميل برضه كانت عاملة عرض تاني أحسن :
مقدم يبدأ من 15% وتقسيط لغاية 5 سنين برضه بس بفايدة 8%...بس كانوا كاتبين ان ده بقى تقسيط مباشر مع الشركة والمخزون مملوك ليها..وكاتبين بقى حاجات كتير زي ان ده بدون توكيل بالبيع وبدون الاحتفاظ بنسخة مفتاح وان العميل ممكن يسجل الرخصة باسم شخص تاني...كل ده جميل..
بس الصدمة بقى انهم كانوا كاتبين ان العرض ده لغاية آخر يناير بس!

عموما أنا عن نفسي حاسس ان احتمال كبير في الفترة الجاية يبقى في عروض تانية زي دي ويمكن أحسن كمان