إيه رأيكم فى الريس الصينى ؟ ؟ ؟

**V1P3R** · 12-02-2010 01:09 PM

بص يا صحبى انا كان معايا ريس صينى ماركة هامرز من سنتين ونص تقريبا كان لسة ناز 200 سى سى

بصراحة انا اول ماجبتة فضل معايا شهرينن كدا تمام وانا اساسا كنت بتعلم علية

بعد الشهرين وعينك ماتشوف الا النور كل يومين او 3 بالكتير اوى لازم اروح للميكانيكى مرة ورق دبرياج مرة فرامل لدرجة انى اتخنئت منها وسبتها بايظة اخر مازهقت وبقيت بمشى ب الفرامل اللى قدام بس مرة فايبر كل شوية يخلع اوتوماتيك ومسامير تطير منة لدرجة ان مرة واللة العظيم المراية مرة واحد طارت وانا على السريع :d

بس عموما هو مش بيقفل 100 و 120 لا هو كان بيقفل معايا وانا علية لوحدى 150 اخرة .

الخلاصة اللى عايز اوصلة لك ياتشترى يابانى يا تصبر على ماتجمع فلوس اليابانى .

وبالنسبة لموضوع السفر هتتبهدل بية وهتزهق .

انا كنت كل يوم بسافر بية 40 كيلو رايح جاى يعنى المجموع 80 كيلو

بس مش هو اللى بيتعب لا انت اللى هتتعب واكيد مشوارك اكبر من مشوارى

وبسم اللة ماشاء اللة الصينى علية رعشة تهز اجدعها وسط ::d

اتمنى انى اكون افادتك .

وحاليا انا بدور على كوساكى 250 ويفضل ال 400 لو حد قدامة حاجة منهم حالة نضيفة جداااااااا ياريت يبعت لى على الخاص وانا جاهز ..

شكرا ...

**attiaahmed** · 14-02-2010 02:43 PM

بص انا هلخصلك الموضوع فى كامتين :
اولا اوعى تشترى الريس الصينى
ثانيا متفكرش انة ريس ؟
بمعنى ان ماتورة هو نفس ماتور اى موتوسيكل صينى بس الشكل الخارجى هو اللى واخد شكل الريس
انا اول ما جيت اشترى اشتريت ريس صينى اسمة هوندا بونا حاجة كدة شكل الهوندا جبتة ب7000 ج بعتة بعد سنة ب4000ج يعنى انت لو جبتة فلوسك هتقل جامد فبالتالى مش هتعرف تشترى ريس يابانى
انا جبت بعد كدة 250 استعمال نضيف ب 13000 والحمدلله زى الفل وعرفتنى يعنى اية ريس يابانى وعرفتنى يعنى اية امشى 180 _200 كم وانا مطمئن ودلوقتى قلبى جمد وببيع فيها وهجيب حتة 600 انشاء الله
الموضوع خدنى والكلمتين زادوا 1000 كلمة ههههههه بس هقولك الكلمتين برده ( اوعى ........ ابعد )

**Adel.Nasr** · 24-02-2010 01:36 PM

انا يا جماعه ليا رأي تاني . اولا انتوا بتتكلموا على الريس الصيني العادي زي (الهامرز ) وانواع تانيه كلها تعبانه وانا معاكم ان الانواع دي مش قويه ولا بتجري . لكن انا بتكلم عن ماركه اسمها ( جلوبال سترونج) وعندكوا الموقع بتاع الشركه في المشاركه رقم ٢ وعندكو الصور هو شبيه بهوندا 1000cbr

**Adel.Nasr** · 24-02-2010 01:48 PM

الموتوسيكل دا شكله زي ماشوفتو اجمد من هوندا 250 و 400 و 600 كمان دا غير إنو تبريد مياه و عداد ديجيتال وسرعه 160 بيجيبها مرتاح والسعه 250cc‏ ‏ والسعر في حدود 7000 يعني ارخص من الهوندا المستعمل اللي كل شويه عايز تروح للميكانيكي عشان يصلحو وبعد شويه يعطل تاني ههههههههاي

**otefa** · 24-02-2010 02:06 PM

صيني ايه بس يابيه هو نافع قوي في العربيات لما هينفع في الموتوسيكلات وبعدين العملية مش ناقصة مخاطرة اكثر ماهي رياضة خطرة
يعني يتقطع الجنزير وانت ماشي ويكلبشللك الكاوتش ولا يخبطك في رجلك
الموضوع مش موضوع شكل ولا سرعة بس الامان اولا
زي كدة لما الواحد يلبس خوزة مافيهاش مواصفات امان ممكن تضر اكثر ما تنفع في الحادث لاقدر الله

**honda145** · 31-03-2010 07:12 PM

على فكرة لو جبت ريس صينى هتكره حياتك هتلئيها من الأهتذاذ الشديد الى بيفك كل مسمار وقطعة فى المكنة ولامن السخونية ولامن قلة وليس عدم توافر قطع الغيار وخاصة الفبر وايضا غلوها بصراحة اشترى نفسك ممكن مثلا تجبلك هوجان 3 شكلها حلو وشبابى وكمان سعرها

**mlav_cbr** · 02-04-2010 04:10 PM

صينى ايه اللى انت جاى تقول عليه ولا امان ولا ثبات ولا اى حاجه انا اعتقد الموتسيكلات ديه تنفع فى المشاوير البسيطه الصغيرة اللى ما تتعداش20 كيلو فى اليوم

**3ateef** · 02-04-2010 04:54 PM

وسيلة تعذيب......

**hima_popup** · 03-04-2010 05:56 AM

باشا إصبر شويه وماترميش نفسك في ريس صيني بتلات أربع تلاف جنيه حرام عليك ده بتاع السيس في ريسات رخيصه هوندا حوالي عشر تلاف جنيه وهتلاقي بتسعتلاف جنيه ولو عايز إفراج جمركي عندي بتاع واحد صاحبي عايز فيه 13 ألف جنيه لو عايز تشوفه كلمني في التليفون والله إفراج جمركي ماترخصش تعالا ومالكش دعوه وانا أعصرهولك لحد 10000 أو 11000 والله لوجه الله تعالى ده رقمي 0122637197 إبراهيم أسعد وانا من أول الهرم من نصرالدين