متابع بشغف
شكرا على عرضك القيم
متابع بشغف
شكرا على عرضك القيم
على ايه باشا انا فى خدمه اى اخ هنا فى المنتدى
لو الشقه على المحاره ممكن تتكلف حوالى 2500 جنيه خامات و الخامات كمان محترمه جدا حاجه نضيف و هتزيد لو هتعمل حبه ديكورات من ورق حائط او معجون رخام او texture بارز او بيرل (شبيه للقطيفه) و دى حاجات بتتعمل فى جنب واحد فى الصاله مثلا او ريسيبشن او خلفيه لغرفه النوم و الحاجات دى ممكن تشوفها على الطبيعه فى مركز تلوين دهانات و ممكن لما حضرتك تنوى اقول لحضرتك اقرب اماكن تشوف فيها كل حاجه من الحاجات دى
و حضرتك تؤمر يا باشا
اولا شكرا على الافادة وتعبك معانا ويارب يجعله فى ميزان حسناتك
دى الحاجة اللى ان اعاوز اسأل عليها
فى فى الهرم واحد بتاع دهانات وهو وكيل لداهانات رغــدان
بصراحة شوفت شوية دهانات عنده غريبة وتحفة
بس كنت عاوز استفسر عن الاسعار تقريبا كده بكام للمتر بالنسبة لمعجون الرخام والقطيفة والحاجات دى
بص يا باشا فى شركات كتير و كل شركه بتقدم عروض مختلفه و بتفرق حسب المكان بتاعك لو مش فيه حد من الشركه اللى عاوز تاخد توكيلها هيسهلوا الموضوع شويه معاك و الموضوع تقريبا ببساطه :
محتاج محل تمليك او ايجار مش فارقه بس لو ايجار مش اقل من 5 سنين و الشركه اللى هتتعاقد معاها لازم هتيجى تتفرج على المكان فى الاول
كل الشركات بتدى تسهيلات تتمثل فى تقسيط الماكينه لتلوين الدهانات مع بنك على اقساط شهريه و مقدم فى حدود من 40 الى 50 الف حسب الشركه
و لو حضرتك تقولى مكانك و ايه التوكيلات اللى جنبك ممكن اساعد حضرتك
و توضيب المحل بيبقى غالبا على الشركه اللى عتتعاقد معاها
و لو اى استفسار تانى انا تحت امر حضرتك عشان لو انا نسيت حاجه
بص حضرتك الشقه كلها هتتراشم بمعنى ان الجير كله هيشال من الحيطه بسكين معجون و الزيت برضه اللى طاقق منه هيتشال كويس و بعدن تتدى وش سيلار او برايمر و بعدين تمعجن وشين معجون و بعدين تدهن الدهانات اللى هتختارها جاهزه بالالوان اللى حضرتك مختارها
و ملحوظه لازم تبقى على ايد الصنايعى و هو بيراشم عشان يراشم بذمه لانها اهم مرحله فى الدهان لانها لو مش متراشمه كويس و معجنت ودهنت على كده ممكن الدهان يطق بعد فترة بسيطه
و بالنسبه للرطوبه لو سبب الرطوبه انتهى يعنى كان فى نشع ميه من الجيران و انتهى ممكن تتاكد انه نشه و بعدين يعمل نفس الخطوات السابقه
و لو السبب برضه انتهى بس لسه ما نشفش فى صنايعيه يا بيستنوا تنشف يا اما يفتحوا عليه الباشبورى و يسلطو اللهب على الحيطه عشان ينشفوها
و الاسعار هتبقى حسب مشاحه الشقه
شكراَ علي عرضك الكريم و معلوماتك الغزيرة .
فيه شقة 110 صافي نص تشطيب (محارة بالأبواب و الشبابيك فقط) .. عايز أديها لحد و أستلمها عالمفتاح عشان مفيش وقت أتابع بصراحة بس عايز شغل حلو .. فا ده يتكلف كام ؟
و لو فيه صور ممكن أروح فين و يا ريت تسيبلنا contact بحضرتك .
و شكراَ لك .
بص يا باشا اللى عند رغدان مشهور هو حاجه اسمها اسبراتيل و هو معجون بيتشكل بالشكل اللى انت عاوزه على شكل طوب مثلا او باى شكل عشوائى حتى ممكن يتعمل منه شكل ورده عباد شمس او شمس فى حجره اطفال حاجات كتير يعنى و بعد ما يتفرد على الحائط بيتدهن يا اما باكوا سيل من رغدان برضه او اى دهان بلاستيك ملون او ليدى جليز (منتج من يوتن) بيدى شكل حلو لانه بيتمسح و بيدى درجات لون متدرجه
و ده سعر بستله السبراتيل من 70 الى 75 جنيه و بتفرد حتى 9 متر مربع
و الاكوا سيل بيعمل 75 الى 80 جنيه
و اليدى جليز زى الاكواسيل
و معجون الرخام بتاعه مش قوى اوى معجون الرخامى بتاع يوتن اقوى و احسن كتير و العبوه 1,4 كجم و بتعمل فى حدود 85 الى 90 جنيه
و شكل الشموا بتاع رغدان بصراحه ما اعرفوش وما اعرفش الخامه بتاعته بس موجود فى يوتن باسم بيرل و موجود برضه فى ناشيونال برضه و سعره بيعمل حوالى 180 الى 200 جنيه ملون بالكمبيوتر
و اى سؤال انا فى الخدمه يا باشا
لا شكر على واجب يا باشا انا فى الخدمه
انا معلش مش هقدر افيد حضرتك فى موضوع السيراميك و السباكه انا بصراحه مش بعرف فيهم اوى لكن اسعار تقريبيه لمتر السيراميك بيكون اواخر الثلاثينات و اوائل الاربعينات بالنسبه لكليوبترا و مصنعيه متر السيراميك حوالى 8 جنيه للمتر و ممكن تزيد حسب المنطقه
و بالنسبه للدهانات و التشطيب لو عاوز تديها لحد مونه و مصنعيه بياخدوا حوالى من 9000 الى 10000 فى شقتك بالديكورات و مش هتقل عن 8000 يبقى سعر جامد بس لازم تشرط على اللى هيشتغل تكون الخامات راقيه تقوله يشتغل يوتن كمثال
و المشكله انى من السويس فصعب اقابل حد و انصحه لكن ممكن حضرتك لو محتاج حاجه تكلمنى رقمى 0189549999
و ممكن ادل حضرتك على اماكن بيع تكون جنبك و اسعارها كويسه لو كنت اعرف حد جنبك بتعامل معاه فى شغلى او نقاش يكون جنبك و ممكن يشتغلك فى شقتك مفيش مشاكل ان شاء الله