عاوزين يا جماعه حد يقولنا مميزات و عيوب الجيتا 2009 و اسعارها دلوقتى كام و بيعمل صيانتها فين و هل فعلا موديل 2009 بقى اعلى من اللى قبله ؟؟
عرض للطباعة
عاوزين يا جماعه حد يقولنا مميزات و عيوب الجيتا 2009 و اسعارها دلوقتى كام و بيعمل صيانتها فين و هل فعلا موديل 2009 بقى اعلى من اللى قبله ؟؟
شكرااااا واضح ان محدش معاه العربيه
بجد انتو ناس متعاونه جدااااااااااااااااااا
the 2009 jetta doesnt differt at all refering to the motor or sachett i has only 2 exta options the radio/mp3 shape has changed may be little better than old one(for all the jetta categories) the other option is the aux outlet so u can plug ur ipod or any external source of music(starting from comfort line)
واحد صاحبى معاه 2008 و جايبها شهر 9 اللى فات
العربية سقتها مرة واحدة و كانت ليه معملتش 1000 كم فمقرصتش عليها بس أنطباعى عنها كالأتى:
1- عربية ثابتة جداً
2- تقيلة شوية......عاوزة 1800 على الأقل بس لو أنت مش بتاع جرى هتبقى فلة معاك.
3- عفشتها ناشفة شوية زى باقى الألمانى بس أعتقد أنها أنعم من البورا......بس يمكن عشان فرق الموديل والعمر
4- واسعة من جوة وتقفيلها كويس جداً
5- كمالياتها حلوة قوى ( هو معاه المستوى قبل الأخير فى الخليجى )
بس ده كل اللى أعرفه عنها
أبقى حاول توضح العنوان شوية عشان أنا من ساعة ما شفت الموضوع كنت فاكرك عامل تقييم للجيتا مش أنت اللى محتاج تقييم.
لو عاوز تسأل على حاجة معينة جمع أسألتك عنها و أبعتهالى و أنا هسألك صاحبى.
شكرا للناس اللى ردت ...انا كنت عايز اعرف اخبارها معاه ايه فى المطبااات ؟؟ و ايه عيوبها من وجه نظره ؟؟؟ و ايه نظام الصيانه و بيعملها فين ؟؟؟ (انا بقارن بينها و بين الاوكتافيا ) و شكرا يا باشا على ردك
اختارر ياباشا الأوكتافيا و انتى مطمئن انا لسه جيبها من 3 شهور و العربية ماشاء الله زى الفل
و احب اقولك من وجهة نظرة ان الأوكتافيا اوسع كتير من الجيتا و قطع غيارها اقل من الجيتا.
هى اسعار قطع غيار الجيتا كام ؟
سيارة ممتازة وقطع غيارها الى حد ما غالية وانت ومقدرتك
لازم تنزل و تسأل على القطع اللى بتتغير بصفة دورية و على فترات قصيرة نسبياً.......زى التيل و الفلاتر و السيور و الجلب أو المقصات......أو تتصل على الهوت لاين لو عندهم.
هسأل صاحبى على الحاجات اللى أنت عاوزها و أرجعلك أن شاء الله؟
اييه يا جماعه مفيش جديد ؟
يا جدعااااان هيا العربيه واطيه اوى فعلا ؟؟؟؟؟؟؟
هى مش واطيه اوى يا باشا لكن اوطى من الاوكتافيا و خصوصا لو محمله او راكب فيها كتير .
اص فى ناس بتقول لو فيها اتنين بتحك فى كل المطباات ؟؟ و بعدين رايك ياباشا هيا احسن كعربيه و لا الاوكتافيا ؟
هو مفيش ولا واحد فى المنتدى عنده جيتا ؟؟؟ ولا حتى اوكتافيا ؟؟ ايه ياجماعه ؟؟
يا باشا الجيتا عموما واطيه بس اعلى شويه من السيفيك
بس الاوكتافيا اللى ركبتها كانت واطيه وبتحك فى المطبات وصاحبها بيقول لان نازل فيها كساحات تحت العربيه وبصراحه انا مش فاهم يعنى ايه كساحات(هو قالى كدا وانا ما سالتوش عملت نفسى فاهم بقا وانا ولا فاهم اى حاجه)هههههههههههه
ايوا انا قصدى لو فى 2 او 3 معاك فى العربيه هاتحك فى كل المطبات ولا ايه النظاام ؟؟؟
هى عربيه جميله جدا لكن تقيله شويه فعلا وموضوع الشيفتات فيها جميل جدا
انا عندى كرستاله ...هى اوطى من الكرستاله ؟؟
حضرتك ياباشا مجرب العربيتين رايك انهى واحده من الاخر ؟؟ و بعدين المنصوره معدش فيها مطبات و لا طريق القاهره كماان :d
الصراحة
مع جمال الجيتا
أختار اوكتافيا أعلى فئة بدون تفكير
هى واطيه بس مش بتحك فى الا فى المطبات العاليه اوى او اللى معموله بغباء و العفشه بتاعتها مش بتنزل زى اليابانى والكورى تلاقى العربيه لو حد راكب فيها من ورا عامله حصان
اسف والله يا باشا مخدتش بالى من الموضوع :Zb_sor1[1]:
والله انا ركبت الجيتا بس مسوقتهاش اتفرجت بس !!! استريحت للاوكتافيا اكتر +كمان ان الاوكتافيا اوسع + انى مش بحب شكل الجيتا لانها جولف و راكبلها شنطه .
بالنسبه بقى لموضوع انها بتحك فالاوكتافيا معانا واطيه برده و بتحك فى المطبات و يا سلام لو حد راكب ورا 2 ولا 3 و يا فضيحتى لو فى حاجات فى الشنطه كمان ....مش بتسيب مطب الا ما تحك فيه ؟؟ بس ده لانها خليجى انما كان معانا مصرى مكنتش بتحك خالص ...
موضوع الوطو ده مش هيفرق اوى بينها و بين الجيتا و هى عموما مش مختلفه عن الجيتا كتير ...شوف الى يريحك فيهم و توكل على الله .
بس فى ميزه فى الاوكتافيا عن الجيتا و هى الوكيل (الناس بتقول عليه زى الزفت بس والله كويسين معايا و زى الفل). لو فى اى استفسار انا تحت امرك و متزعلش انى اتاخرت فى الرد.
ياباشا كفايه زوقك والله ...هو توكيل فولكس وحش اوى ؟؟و الناس اللى معاها العربيه خليجى بتعمل صيانه فيين ؟
ربنا يكرمك ياباشا .
انا معلوماتى عن توكيل فولكس انه زحمه جدا بطريقه رهيبه لكن انا مروحتش ؟؟؟
بالنسبه للخليجى ففى مركز اسمه الوهدان(معتمد من الوكيل) ده بيعمل للخليجى و كمان الوكيل اعتقد انه بيعمل برده لانى بعمل الاوكتافيا فى نور الدين شريف (وكيل سكودا فى اليكس و طبعا معتمد من ارتوكاوتو و كمان ارتوك اوتو بيعمل لخليجى).
أنا لدى الجيتا الفول أوبشن من 10 شهور.
العربية رائعة جدا، هى فعلا واطية شوية عن اللانسر البومة اللى قعدت معى كام سنة قبلها، و أول ما أستلمت الجيتا فى أول أسبوع حكيت فى مطبين عاليين قوى و معمولين بطريقة بشعة، و لكن اتعلمت التهدئة عند أخذ المطب و اخده بالراحة وبطريقة عمودية عليه (حسب المكتوب فى كتالوج السيارة، و ليس بالورب كما هو شائع) و فعلا مهما كان المطب عالى و وحش أصبح لا يحك بعد أول اسبوع من الأستلام رغم أنى أسكن محافظة مدنها بين المطب و المطب فى شوارعها مطب، فهى ليست بهذا الوطو الذى تتحدثون عنه.
بالنسبة للمقارنة بينها و بين الأوكتافيا (مع أحترامى لها) فالجيتا هى الأصل و الأوكتافيا هى النسخة المصنعة فى التشيك و التى سمحت فولكس فاجن مالكة شركة سكودا التشيكية لها بتجميعها فى التشيك، فهل يقارن التجميع فى التشيك بالأصل الألمانى؟؟!! أعتقد الأجابة لا تحتاج مناقشة و الدليل فارق السعر.
أما بالنسبة للوسع و العلو فالأثنان حاجة واحدة، أجلس داخل االمقصورة و أفتح غرفة المحرك نسخة من بعض (بس فارق علامة فولكس من علامة سكودا) ، الفارق الوحيد فى شكل المقدمة (الأوكتافيا عالية بينما الجيتا aerodynamic زيها زى الجولف شقيقتها الهاتشباك لكى تقلل مقاومة الهواء) و أيضا شكل المؤخرة (فى الأوكتافياsemihatchback و لذلك لها مساحة زجاج خلفى كأى هاتشباك، أما الجيتا فهى True Sedan)
أيضا الأوكتافيا أطول من الجيتا حوالى 4.2 سم
باستثناء ذلك لا توجد فروقات، أه نسيت الجيتا أنعم يكثير من الأوكتافيا (زيها زى اليابانى فى نعومته الفائقة) أما الأوكتافيا فهى خشنة كثيرا ولا اعرف السبب لأن الأثنين واحد زى الأصل و صورة المراية
أتمنى أن أكون أفدت صاحب سؤال المقارنة
بالنسبة للتوكيل هم ناس محترمين و كويسين جدا و عيبهم الزحام الذى أتغلب عليه بالأتصال المسبق call centerو أخذ موعد مسبق للصيانة. معاملتهم كويسة و محترمة و الزحام اعتقد هيخف عن توكيل العبور شوية بعد فتح توكيل أبو رواش.
و مش وهدان دا سكودا ؟
شكرا على ردك ...بس هى فرقها مش كتير فى الارتفاع عن البومه ؟ و هى ناعمه زى البومه مثلا ؟
و سمعت برده ان الجيتا انعم بس الوطى دا اللى قلقنى جدا
لا تقلق صدقنى لو خدت المطبات بالراحة لن تحك فى أى مطب فأنا بيكون راكب معى 4 و الشنطة مليئة شنط و أنا رايحة المصيف و لا حكة واحدة،و زى ما قلت أحنا طرقنا مليئة بالمطبات. لما تركبها بأستمرار ستتعود على أخد المطبات بالراحة. اما لو خدتها بسرعة فستحك مع المطبات العالية قوى سيئة التصميم
hanady
ربنا يبارك لحضرتك في العربية و الحمد لله انك مستريحة فيها لأنها عربية جميلة فعلا
venus-doom
اتفاقي معاك الى حد بعيـــــــــــــــــــــد في الحكم على الجيتا
و أحب أضيف رأيي لأني باركب الاتنين (A5 و جيتا)
مش بتوعي طبعا ...بس واحدة بتاعة حمايا و التانية بتاعة صاحبي أخويا يعني الاتنين بتوعي في الأخر و أنا اللي باصلحهم لو حصل فيهم حاجة
طبعا دي ملاحظات شخصية ...
1 - الشكل
طبعا أذواق ولو ان واجهة الجيتا متكلفة أكتر على الأقل و تحمل علامة الصانع الأقوى
2 - الاتساع
الأوكتافيا أوسع حاجة بسيطة ..تلاحظها في مساحة الرأس للركاب الخلفيين ..الجيتا ضيقة في النقطة دي
3 - الاعتمادية
و أنا أقصد بيها هنا تعدد و مرونة الاستخدام ...الأوكتافيا تكسب بسبب شنطتها الواسعة و ارتفاعها عن الأرض (ممكن تحمل فيها كتييير)
4 - الارتفاع
الجيتا من أوطى السيارات في السوق المصري ..تالت ورا و تحك في مطب عالي ...و عمري ماركبت ورا ولا حد ركب معايا فيها ورا الا وحكينا (بس على فكرة مع التعود ربنا بيسهل و الدنيا بتمشي تمام)
5 - السحب
فارق ضئيل جدا لصالح الجيتا لن تلحظه الا عند قيادة السيارتين بشكل متوالي السبب هو تصميم الجيتا و هناك مقولة (لم أجد لها اثباتا ولا نفيا) تقول ان الفرق في عدد الصبابات في الموتور هو السبب 8 في اسكودا و 16 في الجيتا أي ان الجيتا تحمل جيلا أحدث من نفس المحرك بس مش مقتنع لأن ده كان هايعمل فرق ملحوظ .
6 - العفشة :
خشونة ملحوظة و مزعجة للبعض فى الأوكتافيا ..ارهاق على الطرق الطويلة و لكن في المكابل احساس بقوة التعليق و ان العربية تفوت في الحديد الحقيقة.
أما الجيتا فهي أقل خشونة بالطبع و ان كانت لا تصل أبدا للسيارات اليابانية
في نقطة كمان ..الجيتا اللي رينجاتها 17" و LOW PROFILE TIRE بترجعنا لمشكلة الخشونة و تعب الظهر في السفر الطويل ..
7 - عزل المقصورة :
العزل في اسكودا فاااشل صوت العفشة و الموتور شديد الوضوح و صوت الهوا في الجسم على السرعات العالية مزعج أيضا (طبعا مش مزعج زي اللانسر يعني).
الجيتا العزل أفضل كثيييرا في نقطة صوت الهوا ..تقريبا غير موجود بالمرة
أما صوت الموتور فهو واااضح تماما كأنها في حجرك زي الأوكتافيا
صوت العفشة أقل وضوحا
8 - الثبات ..
حدث ولا حرج السيارتين يتمتعان بثبات رائع في أسوأ الظروف الجوية و حتى سرعة 160 - 170
بعد هذه السرعة تجد الجيتا أكثر طمأنة بسبب ارتفاعها القليل
9 - حساس الركن
في الأوكتافيا تظهر درجات الرادار على شاشة الكاسيت لتعلمك بمدى قرب الحاجز مع الصفارة طبعا بس الميزة هي انها بتعرفك هو يمين و لا شمال و قرب أكتر من اليمين ولا من الشمال .
10 - الشنطة :
أوكتافيا :11: إشي خيال يا ناس
11 - قوة الجسم الخارجي
وده بيبان في الخطات الصغيرة جو البلد
الأوكتافيا عربة مدرعة :tank:فعلا وخصوصا الاكصدام الخلفى اللي ممكن يخرشم :36_7_4[1]:أي عدوان من الخلف
صاجها ناشف قوي الحقيقة
بس انا ما جربتش الجيتا في أي خبطة لحد دلوقتي ..ربنا يستر
أحب أضيف تعليق صغير على حتة الأصل و النسخة
الموضوع ده غير منطقي بالمرة
الشركة الأم زي مجموعة فولكس بتعمل مجموعة محركات و platforms و وحدات للتحكم و السيطرة و كل شركة تابعة للمجموعة (اللي منها شركة فولكس فاجن نفسها) بتاخد ما يناسب "سياسة الشركة التسويقية" و تضيف تبعا لذلك شخصيتها الخاصة
يعني مش ممكن نقول ان أودي شركة تابعة لفولكس و ان الأودي A3 نسخة من الجولف مثلا مع اشتراكهم في حاجات كثيرة مع فرق شاسع لصالح أودي .
و كذلك التوليدو و البورا ...السيارتان كانتا نسخة من بعض مع فروق جميلة في السيات زي المكيف الأوتو و المرايات الضم و مرأة التعتيم و لم تكن هذه الكماليات متاحة في بورا التي أيضا اكتسحت التوليدو (ومازالت حتى في المستعمل) بسبب فكرة الأم و التقليد مع ان اللي يركب توليدو ...يحس بطعم أحلى كتير من البورا الكئيبة و هما مشتركين في نفس المحرك و platform مع فروق طفيفة في التعليق لصالح التوليدو ....
و أخيرا
أحب أقول كلمة لصديقي islamaboelnaga
المقارنات العقلية بين العربيتين دول مش هاتوصلك لحاجة صدقني
هاتفضل تلف وتلف حوالين نفسك
اركب دي و دي و اللي تدخل قلبك دووووس فيها
والله كله عمل المقارنات دي و في الأخر ركب اللي عجبته و خلاص
و اللي راكب دي بيبص على التانية:colsmil: و اللي راكب التانية بيبص على دي:colsmil: لحد دلوقتي
صباح الخير جميعا
بجد الله ينور عليك يا دكتور احمد انا متفق معك تماما فى كل كلمه قولتها
مع اختلاف فى الاختيار يعنى حضرتك اخترت الاوكتافيا وانا ارشح الجيتا بصراحه
بس نفسى اعرف يعنى ايه كساحات اصل واحد صاحبى معاه اوكتافيا وبتحك فى المطبات وبيقول السبب الكساحات
فى نقطه كمان لاحظتها ان الكورولا اليابانى مريحه عن الجنوب افريقى اللى معايا ورينجاتها 15 وانا 16 يمكن ده السبب ولا العفشه مختلفه فى الاتنين
وتقبل تحياتى
الله ينور علينا جميعا ربنا يخليكو
شوف يا سيدي الكساحة دي أكيد يقصد بيها التصفيح اللي تحت الموتور
في مصفحات معدنية و دي بجد "مصفحة" و تقيلة جدا و لو اتحكت للصبح ماتخافش عليها
و في مصفحات فيبر هي ناشفة صحيح بس قصيرة و مش زي الحديد و دي ما بتحسش بحكتها زي الحديد..
أنا مع الجيتا
بس يمكن لو شوفت الفيس لفت بتاع الأوكتافيا على الحقيقة أغير رأيي
:: الســيارات الأوروبــيــة :: > فــــولكـــس > تقيم للجيتا 2009 ؟؟
هو ده الموضوع اللي أنا فيه و لا انا تهت ؟؟؟