الموضوع: مفاجآة لكل اعضاء الرابطة

شكرا على هذا الموضوع

شكرا للاستاذ معاذ على الاضافة والمعلومات الثمينة

نظام التأمين على السيارات المتبع في مصر والمشتق من النظام العالمي يقوم على الأتي
1- يلتزم الشخص المؤمن بدفع نسبه من سعر السياره الحالي (وهذه النسبه تختلف من شركه إلى شركه)
2- يدفع الشخص المؤمن المبلغ المتفق عليه دفعه واحده (وهو نسبه من سعر السياره الحالي) فور التعاقد ... "توجد شركات تقوم بتقسيط مبلغ التأمين على عدة شهور"
3- بعد أن يتعاقد المؤمن مع الشركه تصبح السياره تحت المظله التأمينيه للشركه من تاريخه وخلال عام ميلادي كامل
4- التأمين يغطي كافة أنواع المخاطر التي تتعرض لها السياره وتتكفل شركة التأمين بكافة الأصلاحات أو التعويضات في حالة سرقة السياره مثلا أو تعرضها لحريق شامل

معلومات عامه:-
بالنسبه للسيارات الزيرو يتم دفع النسبه المتفق عليها بين المتعاقد والشركه على أساس فاتورة الشراء
وفي العام الذي يليه يقل مبلغ التأمين لأن سعر السياره سوف يكون قد قل بنسبه تقدر بحوالي 20%
وبعد خمسة سنوات لا يؤمن على السياره (ولكن يوجد شركات تقبل التأمين بعد مرور هذه المده)

أعلى نسبة تأمين على السيارات في مصر حاليا هي 4.25% من قيمة السياره

الف شكر للمهتندس أمر وسؤالي هو لازم الفرع اللي في مصر علشان اخد الخصم ولا ممكن من خلال الفرع اللي في طنطا

عزيزي المهندس امر.
طبعا انا بعتذر جدا لمشاركاتي القليله وذلك لضيق الوقت و لأني مبلقاش اي حاجه اضيفها علي ردود الاخوه الاعضاء فارجو ان تسامحوني علي ذلك.
و لكن لما حضرتك بدأت تتكلم عن التأمين فالصراحه قلت لازم اشارك عشان اقدر افيد الاخوه الاعضاء لانه ايضا مجال عملي ,و فعلا كل اللي قلته حضرتك ده كويس و ايضا كلام اخي بايو وضح للناس كتير اوي عن التأمين و فوجئت ان في اعضاء كتير معندهمش فكره عن التأمين و كنت انا اقترحت قبل كده في كونتكت الله يرحمه ان احنا ممكن نعمل ساحه متخصصه للتأمين ممكن ان تفيد كل الاعضاءو لكن طبعا حضرتك و وبايو باشا وضحتوا للناس كل حاجه بس كان افضل لو كان في ساحه متخصصه في الموضوع ده لأن كده في اغلبيه كتير من الأعضاء ممكن متشوفش الموضوع ده.
و بالنسبه للتأمين فنظامه واحد في كل الشركات و ده لان كل الشركات خاضعه للهيئه المصريه للرقابه علي التأمين.
اما بالنسبه للاسعار فالموضوع تنافسي شويه بين الشركات بس اهم حاجه ان موضوع الاسعار ميكونش ليه تأثير بعد كده عند حدوث تعويضات لا قدر الله .و لكن في الاخر معظم الشركات متساويه.
و لكن اقل سعر يوجد في السوق الان مع الخدمه الممتازه يوجد في الجمعيه المصريه للتأمين التعاوني و ضع 100 خط تحت الخدمه الممتازه .و الموضوع ده جربه استاذ بايو بنفسه و حكي عليه قبل كده.
فبالنسبه للسعر في الجمعيه هو 2% شامل حوادث و حريق و سطو طبعا سواء كان خطأك او خطأ الغير و طبعا انا بقول الكلام للناس اللي معندهاش خلفيه عن الموضوع.
و ده ميمنعش ان شركه قناه السويس شركه محترمه اوي بس يعيبها ان السعر غالي شويه ( علي فكره انا اخويا الكبير مراقب عام فيها ) يعني لو حضرتك قابلتك اي اي مشكله فتأكد تماما اني ان شاء الله اقدر احلها لحضرتك او لاي حد من الاخوه الاعضاء.
و لكن انا برشح الجمعيه المصريه للاسباب السابقه و اهمهم سبب السعر و ايضا سرعه صرف التعويضات كويسه اوي.و ايضا لأنها تتبع الصندوق الاجتماعي للتنميه اللي هو بالتالي يتبع مجلس الوزراء.
فالشركتين متساوينين فعلا من حيث المميزات و لكن الموضوع بيبقي مسأله راحه نفسيه من الدرجه الاولي و لكن السعر بيفرق حوالي 500 جنيه يعني تأمين الاسبيرانزا مثلا في الجمعيه بيكون حوالي 1250 جنيه.
و انا فعلا بيبقي عندي عملاء بيطلبوا قناه السويس بالاسم و ناس بتطلب الجمعيه بالاسم ايضا و هما فعلا متساويين زي ما وضحت قبل كده و طبعا الواحد مبيجازفش بسمعته و يتعامل مع شركات ليس لها سمعه طيبه في السوق.

و ده يا جماعه تلفوني عشان لو في حد عايز يستفسر عن اي حاجه تانيه بخصوص الاسعار او الشركات انا في الخدمه ان شاء الله و لو لا قدر في اي حد من الاعضاء عنده اي مشكله في اي شركه تأمين ياريت ميترددش و يكلمني و ان شاء الله اقدر احلها.(0105297567).... و الله الموفق.

اخوكم / ممدوح العربي
السلام عليكم و رحمه الله.

انا بشكرك جدا يا استاذ ممدوح لأن فعلا واضح ان انت انسان على خلق وعلى ثقافة عالية جدا..
واطلب من سيادتك عمل موضوع خاص بالتأمين يتضمن تعريفة وشروطة وكل اجرائاته واسعارة وافضل الشركات في مصر وميزه وعيب كل الشركات وبالتالي تبقى فائدة لكل الاعضاء واعدك بتثبيت الموضوع في حالة تنفيذة وتبقى افدت اعضاء كثير جدا جدا جدا.
الف شكر مقدما

اكيد يا استاذ باهر
اعتقد ان لازم الفرع اللي في مصر على الاقل علشان العربية يتعمل ليها معاينة قبل التأمين. وممكن تبقى تدفع الفلوس في طنطا