السلام عليكم و رحمة الله و بركاتة

الحمدلله استلمت العربية من حوالي 15 يوم تقرييبا و الحمد لله رخصتها كله تمام
العربية عاملة 2500 كم و الأمور كلها علي ما يرام
بس انا ما غيرتش الزيت و مش عارف هل كان المفروض اغير الزيت اول 1000 كم و لا عادي
هو مهندس المبيعات اللي في التوكيل قاللي الزيت بيتغير كل 10000 كم
انا هحاول اروح التوكيل و اطمن علي حكاية الزيت دي
لو اي حد عندة فكرة عن موضوع الزيت دا يا ريت يقولها لي

بالنسبة للعربية فانا الحمدلله مقتنع بيها جدا جدا جدا
طبعا العربية اللي معايا هو اللوجان ال 7 راكب اللي موتورها 1600سي سي 16 صباب 110 حصان
عشان فيه منها نفس الشكل بموتور 1600 سي سي 8 صباب 90 حصان بس

طبعا العربية نص كماليات ينقصها زجاج كهربا و سنتر ريموت و كشافات ضباب و عوارض تحميل بس
بالنسبة للأدار فهو اداء مقنع جدا
موتور قوي و سحب ممتاز و اتزان عالي وعفشة قوية و مريحة في نفس الوقت
شكل العربية حتي الآن كل اللي بيشوفها بيعجب بيها و بيحس انه شاف حاجة جديدة غير تقليدية
العربية ما شاء الله واسعة جدا من الداخل بتبهر كل اللي يركبها و خصوصا الكراسي الخلفية اللي كل الناس بتتغش فيها و بتقول ضيقة و يفاجئوا بالعكس و انها واسعد جدا
ارتفاع العربية معقول عن الأرض
العربية انا جبت بيها 170 كم و ما قدرتش اكمل اكتر من كدا لأني خفت و حسيت ان الدركسيون خف في ايدي شوية و ما حبتش اتهور اكتر من كدا خصوصا انه طريق مش فاضي خالص و حوليه زراعات

طبعا الحمدلله اتصورت بالردار لاول مرة في حياتي بعد حوالي 5 سنوات قيادة و اتمسكت علي 98 كم و كعيت ال 150 ملطوش زي الباشا و انا بتحسر علي فلوسي و بدعي ي سري يا رب الفلوس كلها تضيع منكم يا شوية حرميه

المهم العربية الحمدلله انا مبسوط بيها جدا و مش ندمان ابدا


انا تحت امر اي حد محتاج اي معلومة عنها