الموضوع: اسعار السيارات الجديدة بعد التخفيضات 14 فبراير

طيب ايه اخبار الانسر والياريس والتريوس واليابانى كله ؟ مافيش تخفيضات كبيرة؟

يا جماعة حكاية ان الوكيل يقول ان العربية نزلت الف والفين و خمسة حتي
بيحسسونا انهم بيبيعوا حمص مش عربيات
احنا مع الحملة و مستنيين ووقفين الشرا لغاية اما العربيات تنزل بجد مش ضحك علي الدقون

التوكيل ده بيستهبل ومش دي المشكلة . لكن المشكلة الكبيرة إن في ناس هنا بتقول إن ده وقت كويس للشراء .. إزاي بقى ؟ أنا مش فاهم يعني كل اللي إحنا عملناه ده واللي الناس عملتة كان عشان تخفيض 3 أو 4 تلاف جنية أو حتى 7 أو 8 تلاف جنية . طب فين بقى اللي كانوا بيقولوا 25% و 30% والكلام ده . واضح جدآ جدآ إن إحنا سهل جدآ التأثير علينا وفشكلة الحملة كلها من أولها لأخرها من جهة التوكيلات . بس هما محتاجين شوية ذكاء أعلي من كده وأنا شايف إن ده بيتم فعلا في الوقت الحالي ودي مجرد بداية . وطالما إحنا فينا ناس بتفكر كده فأنا بوعدكوا إن الحملة هتفشل قريب . وساعتها الأسعار هتغلى أكتر من الأول كمان علشان يربونا كويس ويعلمونا إننا ما نعملش كده تاني

اصحاب العربيات مش عايزين ينزلوا الأسعار مع انها نزلت في كل دول العالم معتمدين على ان الشعب المصري شعب طيب وهيقول ياعم وهو انا لسه هستنى لما الأسعار تنزل انا هشتري دلوقتي وخلاص

لكن احنا بنقول لهم الأسعار هتنزل يعني هتنزل

واذا كنتم مش عايزين تنزلوها يبقى خلو العربيات معاكم أقولكم خللوها ...أو ... احشوها

- - - - - - - - - - - - - - - - - - - - - - - - - - - - - - - - - - - - - - - - - - - - - - - -

دة يا جماعه جزء من برنامج محمود سعد اللي بيقدمه على نجوم أف أم سمعته وأنا جاي النهاردة الصبح في الراديو يعني الحمله مسمعه في كل حته يعني كلنا لازم نتكاتف والناس الانهزاميه تفوق بقى وتعرف ان دي مصلحتنا كلنا عايزين نبقى ايجابيين بقى وكفاية نهب في جيوب الشعب المصري

صدقوني لو الحمله دي نجحت كل التجار هيعملوا حساب للمستهلك المصري زي ما بيعملوا حسابه بره ومحدش هيفكر يقرطس الناس على اساس ان الناس سلبيه والشعب المصري طيب ومبيعترضش


خليها تصدي وموديلها يعدي

أعتقد ان التخفيضات الهزيله اللي حصلت دي هي لمجرد جس النبض فقط يعني لو الناس برضه قاطعت الشراء هينزلوا الأسعار تاني وهكذا

إنما لو الناس بلعت الطُعم وتوقفت الحمله فعلا يبقى كلها كام شهر ويزودا الأسعار تاني وترجع ريمه لعادتها القديمة