أرجو المشاركة والمشورة من عشاق البيتلز

**RAAFAT10** · 14-02-2009 09:10 PM

الأخوة الأعزاء
تحياتى لكم جميعا
أرجوأن تفيدونى بالرأى والمشورة لأنى قررت أن أشد العربية اليومين دول لأن ميعاد فحصها الشهر دة وطبعا محتاجة سمكرة ودوكو وأنا عرضتها على كذا واحد منهم أثنين بيشتغلوا فى أى نوع من العربيات بس أنا قلقان منهم لحسن يعكوا فيها وبعدين ودتها لعمر زكريا فى جسر السويس لأن فية ناس شكرت فية فى الموقع علشان أشوفة هيعمل فيها أية وهتكلف كام , المهم رحتله فقلى هتكلف 700 جنية وهيعمل فيها كل حاجة بما فية السقف فقلتلة السقف مش محتاج فقلى يبقى 550 جنية المهم قلتلة كتير شوية لأن الشغل المطلوب فيها مش كتير وهو طبعا ال4 رفارف هيدقواويعمل البارومة اللى فى أخرهم وفية بارومة صغيرة من عند عتب الباب وبارومة فوق الرفرف اليمين اللى ورا وحتة عند الرفرف من تحت وطبعا فية أثر أحتكاكات فى البيبان عايز تتساوى ويثبت المفصلات يعنى بيتهيألى حاجات عادية ,المهم كنت عايز أسأل هل هو فعلا صنايعى كويس وبيطلع شغل مظبوط وهل حد من أصدقائنا أتعامل معة وكان شكل الشغل أية ,ومعاملتة أية ؟ وبصراحة خايف أوديها لأى حد يبوظها وخصوصا هو قال عربيتك أساسياتها كويسة وخسارة تتديها لأى سمكرى مش متخصص فى البيتلز وعلى حسب كلامة ممكن الصنايعى اللى مش فاهم يخليها زى 128وبعدين هومن أول مقابلة معاة حسيت أنة كويس وبيفهم , بس أنتوا عارفين الصنايعية يبقى كويس وأبن حلال وأول ما رجلك تيجى يبقى ما فيش الا كدة وأن كان عاجبك . ومافيش أحسن من كدة ,فما هو رأيكم من ناحية شغلة وهل المصنعية اللى طلبها معقولة ولا كتير بس اللى يهمنى الصنعة لأنى قبل كدة بعت عربية 128 بسبب أنى سمكرتها ومطلعتش زى منا عايز وفضلت مضايق منها لحد ما بعتها ,بس اللى كان يشوفها ما يعرفش العيوب اللى فيها بس أنا عينى بتشوف الحاجة اللى مش مظبوطة و بتعب منها وكل شوية عينى تيجى عليها , ودة طبع مش عارف أبطلة , المهم دوشتكوا بالموضوع دة ولكن لا خاب من استشار ,فأرجو أن تفيدونى برأيكم فى هذا الموضوع جزاكم اللة كل خير.

والسلام عليكم.

**أحمد سالم** · 15-02-2009 12:32 AM

السلام عليكم
اخى انا رحت مره لعمرو السمكرى واكتشفت انه غالى جدا
قالى عربيتى هتتكلف 350 على الرفرفين بس وفيهم خبطاط بسيطه
المهم عملتها سمكره ب 70 جنيه عند سمكرى محترم وصنايعى كمان تمام

ممكن تراجع اللينك ده وتشوف
http://www.nilemotors.net/Nile/showt...t=41794&page=8

**ابوهاشم** · 15-02-2009 01:22 AM

بصراحه انا اتعاملت مع عمرو زكريا بس فى شغلانه بسيطه هو كان ظبطلى الباب اليمين ماكنش بيقفل كويس وخد 20 جنيه
لكن ده مش شغل سمكره اقدر من خلاله احكم عليه اذا كان كويس ولالا
على العموم منتظرين رد باقى الاعضاء

**RAAFAT10** · 15-02-2009 11:44 AM

شكرا يا جماعة على سرعة الرد, طيب ممكن أعرف عنوان الأسطى أحمد فين بالظبط علشان لو قريب منى أرحلة ولكم منى جزيل الشكر. بصراحة الجماعة دول بيغلوا فى أسعارهم ذيادة عن اللزوم يعنى من قيمة 3 شهور فية واحد سمكرى جنبى بيشتغل فى محل وكانو بيقولوا علية صنايعى كويس وكان ساعات بياخد شغل لحسابة, جبتة علشان كنت ساعتها بفكر أعمل سمكرتها فشاف العربية وكان فيها نفس الشغل ولا ذاد ولا قل , فشفها وقلى هياخد 150 جنية وهيعمل كل حاجة وهتاخد شغل يوم ونص ,المهم رحتلة حسب ما أتفقنا ولكن لقيتة مشغول فقلت أرحلة مرة تانى وبعدين أنشغلت والوقت جرى , ودلوقتى هوساب المحل اللى كان شغال فية, طبعا فية فرق شاسع فى المبلغ وعلى فكرة أنا رحت لنفس المحل وقابلت المرة دى صاحب المحل اللى كان شغال فية نفس السمكرى اللى كان هياخد 150 جنية , وقلتلة تعمل الشغل دة بكام ؟ عارفين قلى كام ؟ قلى 700 جنية يعنى لو السمكرى اللى قلى 150 جنية اللى كان شغال عندة لسة موجود كان برضة هو اللى هيعمل نفس الشغل , شوفتوا بقى السعر بيختلف أزاى فى نفس المحل ,يعنى أستغلال فظيع والفرق مش بسيط ,وقلتلة يا عم يهديك يرضيك دة مبلغ كبير يقلك ولا مليم ,ولما تسأل الجماعة دول طيب الشغل هياخد وقت أد أية اللى يقلك أسبوع واللى يقول خمس أيام ,واللى يقول 10 أيام , طبعا هو هياخدها ويشتغل فيها نص ساعة فى اليوم ويخربش فيها شوية علشان يفهمك أنة عامل شغل فيها ولا هو عمل حاجة ,وهى لو عملها ماتخدش يوم معاة ,طبعا الواحد بيبقى فاهم كدة كويس .بس هو أية العمل,للأسف ما فيش أمانة عند حد ,والشغل اللى يطلع بختك يأبو بخيت ,طلع كويس يبقى من حظك,طلع وحش ,كل سنة وأنت طيب ما فيش أحسن من كدة المهم ربنا يسترها معانا , وشكرا

**ابوهاشم** · 15-02-2009 03:10 PM

ان شاء الله ربنا يوصلنا لواحد سمكرى كويس وامين مش طماع وكلنا نتعامل معاه
بس انت ممكن تتصل بلاسطى جمال الميكانيكى هو كان قالنا ان فى سمكرى بيتلز هو بيتعامل معاه وربنا يوفقك وابقى احكيلنا برضه عملت ايه

**ahit** · 16-02-2009 04:01 AM

السلام عليكم و رحمة الله و بركاته

الأستاذ/ رأفت
الحقيقة أنا لم أتعامل مع سمكرى بيتل فى حاجة كبيرة و لكن أنا ممكن أرشح لحضرتك كام مكان أو سمكرى و نشوف آراء باقى الأعضاء أو حضرتك تشوفهم و تشوف شغلهم على الطبيعة و مصنعية الشغل اللى عند حضرتك و تقرر بعد كدا هاتتعامل مع مين:
1- الحرفيين مليانة أساتذة فى سمكرة البيتل بس المشكلة إنهم غاليين.
2- أيمن السمكرى فى عزبة الصعايدة أستاذ بناءاً على شهادة اللى إتعاملو معاه و معرفش تليفونه أو عنوانه بالتفصيل لكن ممكن أسألك.
3- عمرو زكريا السمكرى بجسر السويس و بردو أنا ماتعاملتش معاه فى حاجة كبيرة لكن هو بصراحة فاهم و والده من زمان و هو شغال فى البيتل و أنا لما بعدى عليه بلاقى عربيات خربانة و سبحان الله بيرجعها زى ما كانت ( من سقف و أرضيات و غيره ) و بردو حضرتك صاحب القرار و أنا مش برشحو و لكن بقول اللى شوفتو بس.
4- فى مصر القديمة فيه واحد ممكن حضرتك تسأل عليه جمال الميكانيكى زى ما الأستاذ/هاشم تفضل و قال لحضرتك, و جمال بيشكر فيه جداً.
5- فيه سمكرى تعامل معاه قريب الأستاذ/ محمد بركات .. لأنه كان بيشد عربيتو عنده و اللى أعرفو إنو حنين فى المصنعية بس مش متخصص بيتل و فى العاشر من رمضان , و لو حبيت نسأل عنو و نشوف شغلو عند محمد بركات عامل إزاى بردو.
6- فيه سمكرى فى المقطم كان الأستاذ/ أحمد سالم بيتعامل معاه و بردو مش متخصص بيتل و لكن مصنعيتو قريبة بناءاً على كلام أحمد سالم.

* و طبعاً الأفضل إن حضرتك تسأل سروجى محترم على سمكرى محترف بيتل و هو ممكن يدل حضرتك بردو لأن العربية بعد السمكرة بتروح مباشرة للسروجى و هو أكتر واحد ممكن بيشوف و يحس بشغل السمكرى النظيف من غيره.

**ابوهاشم** · 16-02-2009 04:09 AM

كلام جميل من محترف بيتلز

**RAAFAT10** · 16-02-2009 11:06 AM

متشكر يا جماعة على مشاركتم وأهتماممكم بالموضوع ,وربنا يسهل وألاقى واحد كويس, وأنا كنت أفضل واحد قريب منى علشان أقدر أتابعة.وعموما هحاول أروح للجماعة اللى قلتوا عليهم,وأشوف أخبارهم أية . ولكم منى أرق التحيات .وشكرا

**أحمد سالم** · 16-02-2009 12:24 PM

الاسطى احمد ورشته فى المقطم هى ورشه متكامله فيها ميكانيكى وسمكرى وبتاع دوكو وعفشجى لاكن الميكانيكى اللى هناك مالوش فى البيتلز انا ماجربتهوش بصراحه لاكنه مش متخصص بيتلز اما السمكرى والله من كلامه قالى انه اشتغل بيتلز بس 7 سنين وانا لما كنت عنده كان شغال فى جولف وكان ماشاء الله شغله زى الفل
ولما هتروحله هتلاقى عى تليفونه عربيات كانت ماتنفعش هو مصورها قبل الشغل وبعد ماخلصها
لو لقيت المقطم قريب منك ممكن تعدى عليه وتاخد فكره حتى بس عن الاسعار والشغل
ولو عايزنى اكون معاك انا ماعنديش مشكله
تليفونى هو 0102070464 احمد سالم
وده تليفون الاسطى احمد 0109513682
ولو تليفونه مش شغال ده تليفون صاحب الورشه
عم شكرى 0122681248
ان شاء الله ربنا يوفقك للصواب وانا رئيى انك تشوف كذا واحد وتقارن الاول قبل ماتاخد قرارك انت هتتعامل مع مين

**RAAFAT10** · 16-02-2009 02:12 PM

شكرا للأستاذ أحمد حسن والأستاذ هاشم والأستاذ أحمد سالم وأشكرك على عرض االمساعدة لى بس أنا مش عايز أتعبك معايا واللة يخليك وشكرا على ردكم وهحاول أتصل بهم بس الأسطى أحمد بعيد عنى جدا لأنى ساكن فى عين شمس لكن هحاول ارحلة وربنا يسهل .وشكرا

الموضوع: أرجو المشاركة والمشورة من عشاق البيتلز

LinkBack

أدوات الموضوع

عرض

-

-

-

-

المواضيع المتشابهه

أرجو المساعدة والمشورة من المنتدى الغالى

الي كل عشاق البيتلز

طلب من كل عشاق البيتلز

إلى عشاق البيتلز

الي عشاق البيتلز ؟

الكلمات الدلالية لهذا الموضوع

المفضلات

المفضلات

ضوابط المشاركة