أستفسار صيانة الـ 60 ألف كيلو ( Clio 1200cc 2002 )

**Cell_k** · 15-02-2009 10:35 PM

بسم الله الرحمن الرحيم

أولا اشكر كل اعضاء هذا الموقع الرائع على المجهود الكبير و التعاون الواضح من كل اعضاء هذا الفسم الراقى ... اعتذر على الاطالة لكن الشكر واجب .

ثانيا العبد لله اشترى سيارة رينو كليو موديل 2002 1200 سى سى و كانت عاملة فى حدود 57 كيلو و اليوم اتممت 61 كيلو و سمعت عن اهمية صيانة الـ 60 الف كيلو ممكن اعرف اعمل ايه دلوقتى و اكشف عليها فين بس بعد اذنكم بلاش التوكيل و اسعار التوكيل ده انا لسة مفوقتش من ثمن العربية

و شكرا لكم جميعا .

**akmal_hamdi** · 16-02-2009 02:49 AM

مبروك على العربيه أولا صيانه ال 60.000 صيانه مهمه جدا فى الكليو ولازم تشوف العربيه كانت بتعمل صيانه فى أنهى فرع علشان تشوف ايه ال اتغيير قريب و ايه ال معاد تغيروا وده مش حتلاقى غير فى التوكيل و انا عن نفسى انصح بالتوكيل و معرفش بقيه الوحوش هينصحوك بأيه على العموم الصيانه هى تغير جميع الفلاترو الزيت و جميع السيور و سير الكاتينه و بليه الكاتينه و الكشف على طرمبه المياه لو فيه ترشيح حيغيروها و لو تعرف معاد تغير البوجيهات امتى علشان ميغيروهاش

**عمرو عمارة** · 16-02-2009 10:03 AM

ممكن أبعتك للميكانيكي بتاعي في الحرفيين.....هو الي عملي صيانة الـ60الف بالكامل....دي تقريباً لستة قطع الغيار الأساسية الي لازم تغيرها

1-سير كاتينة + بلي الشداد ( الاصلى ) 470 جم
2-طلمبة مياه اصلية 350 جم.....نصيحة مني غيرها
3-طقم سيور ( الدينمو + التكيف والباور ) 95 جم
الأسعار دي كانت من سنة....ممكن تقل وممكن تزيد

وبالمرة غير الحاجات دي عشان تكون عملت سيرفيس بالكامل وتكون مطمئن على العربية
-طقم بوجيهات Ngk بـ90جم أو الأصلي بـ120جم
-فياتر هواء أصلي بـ55جم
-فلتر بنزين أصلي بـ45جم
-فلتر زيت أصلي بـ45جم
هات الحاجات دي كلها من ميشيل حليم الي في عمارات الميريلاند
وماتنساش جيركن زيت Shell Ultra 5W40
-فك وتنظيف المنافولد بالكامل

لو عملك الكلام ده كله ممكن ياخد منك 300جم مصنعية

**Cell_k** · 16-02-2009 08:09 PM

السلام عليكم

ألف شكر لكم على المساعدة الرائعه الحمد لله استفدت جدا من المعلومات القيمة خاصة الاستاذ عمرو و شكرا جدا ليك على عرضك لمساعدتى و اكيد طبعا لما اكون جاهز هكلم حضرتك لكن فى مشكلة الان !
من حساب تكلفة الصيانة اعتقد فى حدود 1500 جنية ! و للاسف المبلغ ده مش هيكون جاهز معايا الا فى اول الشهر القادم هل معنى هذا ان لا اقود السيارة تماما حتى عمل الصيانة ؟؟ :K_crying[1]:

**Ahmed Selim** · 16-02-2009 08:17 PM

لأ طبعاً يا باشا......قود السيارة بس خليك مصحصح معاها.....

يعنى أهم حاجة فى الصيانة دى طقم الكاتينة هو اللى لو باظ هيعمل مشكلة......يعنى الشركة بتنصح بتغييره على 60 ألف بس مش مشكلة لما تغيره على 62 مثلاً......