الموضوع: كورولا 93 * لانوس 99

اليكم هذه المقارنة البسيطة بين سيارتين امتلكتهما ووجدت انهما من اكثر السيارات شعبية فى مصر

السيارة الأولى تويوتا كورولا موديل 93 موتور 1300 سى سى مانوال
السيارة الثانية دايو لانوس موديل 99 موتور 1500 سى سى مانوال

سعر كورولا مستعملة ما بين 50 إلى 59 ألف جنيه حسب الحالة
سعر لانوس الثانية مستعملة ما بين 40 إلى 50 ألف جنيه حسب الحالة

قطع غيار كورولا غالية ومش عارف ايه السبب ولكن جوز مساعدين أصلى امامى بـ 1400 جنيه تيل امامى أصلى بـ 275 جنيه وطقم صباب أصلى بـ 900 جنيه.
قطع غيار لانوس رخيصة ومنتشرة جوز مساعدين أصلى امامى بـ 275 وطقم صباب أصلى بـ 300 جنيه وتيل امامى أصلى ب 90 جنيه

موتور كرورلا 1300 سى سى كاربراتير مع التكييف والاوتوماتيك بيموت فعلا وادائه مش كويس دة غير انه كاربراتير وطبعا حضراتكم عارفين اد ايه صعب ضبطه ان لم يكن مستحيل.
موتور لانوس 1500 سى سى انجكشن , معقول جدا مع التكييف ومجربتوش مع الاوتوماتيك وادائه معقول جدا ومش بيحتاج ميكانيكى ولا كلام من دة لانه بيظبط نفسه بنفسه ودى نقطة تحسبله.

استهلاك الوقود بالنسبة للكورولا داخل المدينة ما بين 190:210 كم وعلى الطرق ما بين 260:230 كم للصفيحة
استهلاك الوقود بالنسبة للانوس داخل المدينة ما بين 190:200 كم وعلى الطريق ما بين 280:250 كم فى الصفيحة

صاج كورولا يعتبر متين ومعقول جدا بالنسبة للسيارات الحديثة والحقيقة انه من اكثر الاشياء التى اعجبتنى فى هذه السيارة واكصدامتها متوسطة القوة.
صاج لانوس ضعيف بالمقارنة للكورولا ولكنه مقبول نسبيا والسيارة اكصدامتها قوية .

تابلوه كورولا انسيابى ولكنه يفتقر الى عدة اشياء مثل اللمبات التحذيرية وال RPM والصالون معقول جدا ولكنه ليس مريح بالدرجة المطلوبة.
تابلوه لانوس ظريف مقارنة بالكورولا وملىء باللمبات وطبعا به RPM ولاحظت ان اللانوس اوسع داخليا من كورولا فى الصالون والكراسى مريحة عن الكورولا ربما لأنها مرتفعة قليلا.

عفشة كورولا قوية وحمولة لكنها ناشفة وبتهبد فى الحفر.
عفشة لانوس متوسطة وطرية ومريحة سواء فى الحفر والمطبات.

ثبات كورولا حتى 160 جيد جدا بجنوط 14 وكاوتش 185/60
ثبات لانوس حتى 130 جيد جدا بنفس الجنوط والكاوتش

كورولا واطية على الارض وبتحك فى المطبات وخاصة وهى محملة كانت بتبهدلنى
لانوس عالية فى المطبات حتى وهى محملة ودة شىء مريح للغاية

تكييف الكورولا ممتاز الحقيقة وتبريده جميل جدا واللون كان غامق
تكييف اللانوس ضعيف ولكنه مقبول ولكن فى الاوان الغماقة هيبقى مشكلة.

فرامل الكورولا جيدة جدا ان لم تكن ممتازة
فرامل لانوس ضعيفة بالمقارنة بمعظم السيارات الى ركبتها ولكن مش ضعيفة اوى برضة هى بتحتاج مسافة اطول او كبس اكتر علشان تقف.

رأى الشخصى: حتى الان مبسوط جدا من اللانوس ومستريح فيها اكتر من الكورولا ومستريح من الزيارات الكثيرة للصنايعية ودى ميزة كبيرة جدا لمن لا يعلم .

هذا كل ما اتذكره الان وتحت امركم فى اى استفسارات :)