الموضوع: شوية مشاكل في العربية وعايز رأيكم

السلام عليكم ورحمة الله وبركاته ...

صباح الخير يا وحوش الرينو واتمنى انكم تكونو كلكم بأفضل حال .

انا عندي كام مشكلة في العربية وكنت صابر عليها على امل اني لما اشتري الثانية اقدر اسيبها مع اي حد في البيت يحل مشاكلها براحتها وانا اتحرك بالثانية لأني مش بقدر استغنى عن العربية بتاتا , بس نظرا لأن المشاكل تطورت خايف يكون تأثيرها كبير على العربية ...

المشاكل اللي عندي كالتالي :

1 مع اني بحرص اني مطلعش بالعربية الصبح الا بعد ما اسيبها 3 دقائق على الاقل دايرة بس حصلت اكثر من مرة اني بعد ما اطلع بيها بفترة صغيرة جدا الاقيها طفت لوحدها بدون اي رجرجة او اي اعراض فجأة الاقي العربية مش مستجيبة و فصلت تماما .. اشغلها ثاني تشتغل وتكمل طريقها !!


2 دائما في صوتين بيصدرو من العربية الصبح اول صوت وانا بشغلها صوت حشرجة جامد كنت فاكره حاجة في السيور بس بعد ما غيرت السيور في صيانة ال 120 الف لسه الصوت موجود .. وثاني صوت بعد ما بتدور مباشرة صوت حاجة بتلف على الفاضي .


3 العربية مبقتش انسيابية في تعاملها مع ضغطتي على دواسة البنزين زي قبل كده ... يعني لما برفع رجلي عن البنزين بحس كأنها اتسحبت لورا مش بتفضل ثابتة ولازم اضغط دبرياش علشان تستقر ..


4 والعربية ممورة بلاقي رعشة بسيطة بتطلع اول ما المروحة بتشتغل وبتظهر على عداد ال rpm الرعشة وبلاقيه نزل فجأة ويقرب من الصفر وبعدين يطلع ثاني بعدها على طول .


5 النقلات بقت صعبة جدا و كان عمرو عمارة باشا لما ساقها نصحني اني اغير طقم الدبرياش ,, بس انا للأسف مش لاقي وقت للموضوع ده و عايز اعرف مدى خطورة الاستمرار على الحال ده .



معلش طولت عليكم وفي انتظار آراءكم هل استنى عليها لحد ما اشتري الجديدة ولا افضي نفسي كام يوم واحل كل مشاكلها ..

في امان الله