ركنت أمام محل كماليات في المنصورة رجعت لاقيته مفضيلي الكاوتش!!
امبارح الظهر ركنت قدام محل الجزار للكماليات في طلخا ، المحل له ثلاثة أبواب واحد مقفول عبارة عن فاترينة عرض والاثنين التانيين مفتوحين، فركنت قدام الباب المقفول، فالصبي بتاع المحل قالي مش هينفع تركن هنا يا أستاذ علشان بيجيلنا شغل وبنوقفه قدام المحل" فأنا قلتله إن عنده المساحة قدام البابين التانيين فاضية وبعدين أنا مش هاتأخر دى هية نص ساعة بالكتير وراجع، فمااقتنعش وبدا ينادي على واحد اسمه حسام ، أو مش عارف يبدو انه صاحب المحل أو حاجة زي كده ، لكن أنا طنشتهم ومشيت ، ولما رجعت بعد نص ساعة لقيت عجل العربية متفرغ لنصة وكاوتش من الأربعة الجداد إللي لسه بشوكهم مخروم . طبعا اتخانقت مع المدعو حسام ده ، وهو بمنتهى البرود وهو بيتكلم عن المحل والابواب الثلاثة وما ينفعش تركن هنا ، وبيقولي "علشان متعملش كده تاني" الحقيقة أنا يا جماعة مكنتش عارف أعمل إيه فيه ، أنا مش من طبعي إني أمد إيدي على حد أو حتى أشتم حد ، فزعقت شوية وكان فيه الحمد لله محل كاوتش جنب العربية فمليت العجل ومشيت ، في الوقت ده مكنتش أعرف إن فيه عجلة مخرومة ، فروحت وركنت قدام البيت، ولما نزلت بالليل لقيت العجلة نايمة على الأرض ، وطبعا الكاوتش جديد، فأنا مهمل الاستبن تماما ومفيش معايا كوريك حتى، فالاستبن فاضي ومفيش معايا كوريك، ، استلفت كوريك وحليت العجلة وشلتها في تاكسي ورحت لحمتها ورجعت تاني ركبتها عند البيت وبعدين رحت مشواري. طبعا بعد ما ضاع ساعة أو أكثر ده غير البهدلة، الآن أنا أتسائل : هل من حق أي صاحب محل إنه يمنعك تركن قدام المحل بتاعة وخصوصا لو كان له أكثر من بابين، وإذا ركنت قدامه ورجعت لقيته عامل حاجة في العربية ممكن تعمل إيه؟؟؟
شكرا جزيلا لأصدقائي أعضاء المنتدى
أشكركم أصدقائي جدا جدا جدا ، بصراحة أنا متأثر جدا بتفاعلكم معايا في المشكلة اللي مريت بيها دي، وردا على بعض النقاط .
أولا أنا اتصلت فعلا ب 122 لكن الشبكة كانت واقعة، ثانيا أنا ترددت في الركن قدامة لكن حسبتها بمنطقي أنا . كنا الصبح وشغل الكماليات معظمة بيبقى آخر النهار، هو عند مساحة تاخد عربييتين قدام عربيتي، أنا مش هاتأخر، فركنت ونزلت من العربية . أما منطقه هو بقة فكان وأنا بقتبس من كلامه أثناء الخناقة "احنا واخدين الثلاث أبواب" ، "المساحة قدام المحل تبع المحل" ، "علشان ماتعملهاش تاني".
حل الزلطة والفاترينة الحقيقة كان هيفش غلّي لكن صاحب المال ذنبه إيه.
حل محضر الشرطة ، لن يكون مجديا بالمرة، لأن هيبقى كلام قصاد كلام ، أنا هاقول فضى الكوتش وهو هايقول ماعرفش حاجة وجايز يجيب شهود انه كان في موزمبيق في نفس وقت وقوع الجريمة.
لا أعرف ضباطا. ولو كنت أعرف أحدهم فمش هشاركه في جريمة استغلال نفوذة.
لكن الأمر المثير للاهتمام فعلا هو انه ده واحد بتاع كماليات ، وفيه عربية راكنه قدامه، لو كان قالي كلمة حلوة ، كان ممكن يكسب زبون، لكن يبهدل العربية ويخرم الكاوتش يبقى ده بيعمل دعاية سلبية عندي وعند الدائرة المحيطة بي ، إن ده راجل معندوش ضمير ولو رحت تعمل حاجة عنده وضايقته في حاجة ممكن يبوظلك حاجة في العربية. تفكير غير تجاري بالمرة.
أشكركم جميعا.