رفارف البيتلز

**RAAFAT10** · 25-02-2009 12:59 PM

أخوانى الأعزاء
لكم منى أرق التحيات
فى رحلة البحث فى التجديد عرضت السيارة على 2 سمكرية وكان رأيهم أنهم هيشتغلوا فى الرفارف لأن بها بارومة على الحواف ومنفوخين شوية وقالوا ممكن نرجعهم زى ما كانو ,وعرضت العربية على سمكرى تالت قال أن الرفارف تعبانين ومش هيرجعوا زى ما كانو وأنهم بعد كذا شهر ممكن البارومة تسرح فيهم تانى وأحسن حاجة تغييرهم لأن خسارة تصرف عليهم دهانات وشغل وهيكون برضة فيهم عيوب . المهم سألت على الرفارف لقيتهم غاليين جدا وتمنهم الطقم 1350 جنية وفية منهم نوعين نوع رمادى برازيلى ونوع أسود معرفش صناعة أية .فكنت عايز أعرف أية الفرق بين النوعين الرمادى و الأسود وأنهى أحسن وما هو أرخص سعر ليهم فى السوق وعند مين بالظبط ,وسألت عن المستعمل لقيتة غالى ومش حلو والطقم ب 1100 جنية فهل ممكن حد يدلنى على حد تكون الأسعار عندة معقولة ويكون أشترى منة قبل كدة اليومين دول.
وكنت عايز أعرف حد يكون بيبيع الأطار النيكل اللى على زجاج البيبان والكاوتش بتاعهم . ولكم منى جزيل الشكر

**ahit** · 25-02-2009 02:32 PM

السلام عليكم و رحمة الله و بركاته

رافت باشا أخبار حضرتك إيه؟
بالنسبة للرفارف ممكن حضرتك تتصل و تعدى على الحاج/ محسن الألفى ... بتاع قطع الغيار المستعمل اللى عند جامع عمرو بن العاص.
هو راجل محترم و قوله إنك جاى من طرف المهندس أحمد حسن بتاع البيتل البرتقالى و إن شاء الله هايقدر يخدمك فى الرفارف و كمان جنبه حمدى السمكرى.
العنوان و التفاصيل فى الرابط ده:
http://www.nilemotors.net/Nile/showt...021#post675021

**أحمد سالم** · 25-02-2009 04:36 PM

السلام عليكم
خليك مع أستاذنا احمد حسن وهو ان شاء الله هيدلك على المكان الصحيح
لاكن اعتقد ان الاسعار اللى حضرتك سمعتها مبالغ فيها جدا
وكمان خلى بالك ان فى بعض سمكريه بيحبو يريحو دماغهم ويقولك ركب جديد على طول لانه بيحسبها انه هيتعب فى التصليح
حاول تشوف كذا سمكرى قبل ماتلجأ للجديد

**ابوهاشم** · 25-02-2009 05:49 PM

الاطار النيكل ده هتلاقيه فى التوفيقيه
انا فكر كويس انى شوفته هناك بس مسالتش على سعره

**ahit** · 25-02-2009 05:59 PM

أنا آسف نسيت أرد على الجزئية دى :

وكنت عايز أعرف حد يكون بيبيع الأطار النيكل اللى على زجاج البيبان والكاوتش بتاعهم . ولكم منى جزيل الشكر

فى شارع حسن الأكبر بعابدين
فيه محل إسمه سامح بيبيع جميع أنواع الكاوتش و النيكل للبيتل , للكبوت و الزجاج الأمامى و الخلفى و الأجناب

**RAAFAT10** · 26-02-2009 10:48 AM

الأخوة الأعزاء
اشكركم جميعا على ردودكم الكريمة وشكرا للأستاذ هاشم والأستاذ أحمد سالم , وشكر خاص للأستاذ أحمد حسن لأنى فعلا ذهبت للحاج محسن الألفى والحقيقة هو رحب بى جدا وخصوصا لما عرف أنى من طرفة وهو راجل مهذب جدا وفى منتهى الأخلاق, وركبت معاة فى عربيتة ورحنا المخزن ,والحقيقة أنا وجدت عندة 4 رفارف بس كانوا على أد حالهم.واللأتنين الخلفيين (شمامة) واللى أنا عايزهم (بطيخة) وكان أول مرة أسمع المسطلحات دى ويقصدوا بيهم شكل الفوانيس الخلفية , وقلى سعرهم ب 1100 جنية ,وأنا قلتلة ياريت لو فية حاجة أحسن فقلى أنى أتصل بية يوم الأحد القادم أحتمال يجيلة حاجة كويسة بس أن شايف أن سعرهم غالى شوية بالنسبة أنهم مستعملين لأن الجديد البرازيلى ب 1350 وصاحب المحل اللى سألتة اللى بيبيع الجديد قلى طب بس لما تيجى وتنوى تشترى هنكلم فى السعر يعنى ممكن ينزلهم شوية, وأنا هكلم الحاج محسن حسب معادنا يمكن تجيلة حاجة كويسة ,وربنا يسهل ,بس فية سؤال محيرنى هو أية علاقة أرتفاع أسعار حديد التسليح بمصر بصاج العربيات اللى أصلا جاى من برة سواء جديد أو قديم ,أية سبب أرتفاع سعر الصاج ؟, الله أعلم . وأشكركم جميعا جزيل الشكر

**ahit** · 27-02-2009 01:02 AM

العفو رافت باشا
إحنا إخوات طبعاً و أنا ما عملتش حاجة خالص و كان نفسى أخدمك اكتر من كده.
الحاج/محسن اللفى ... فعلاً راجل زوق و محترم و ممكن توصية على اللى انت عاوزه و يجبهولك .
و للأسف كل حاجة سعرها ولع فى العربيات و غالبيتها إستغلال من التجار أو المستوردين و غالبيتهم بيدورو على أى حاجة و السلام لمضاعفة الربح حتى لو السكر غلى هايغلو قطع الغيار و الحديد.
طب حضرتك عديت على حمدى السمكرى ولا لأ؟

**RAAFAT10** · 28-02-2009 02:14 PM

شكرا يا أستاذ أحمد على زوقك , هو أنا طبعا عديت على حمدى السمكرى وأتعرفت علية هو وأخوة وهما فى منتهى الزوق بس أنا كنت رايح بدون العربية وعلشان كدة هو مشفهاش لسة وبأذن الله هرحلة بيها المرة الجاية علشان يشوفها , وربنا يسهل . وشكرا مرة أخرى.