مشكلة حصلت في التمبرا

**ZALABANY** · 26-02-2009 10:41 AM

امبارح وانا ماشي على الدائري حصل حاجه غريبه
فجأه الحرارة وصلت ل 120 وبدأت تخش على الخط الأحمر طبعا ركنت على جنب ونزلت ابص على العربيه لقيت المروحه مش شغاله ولقيت نقط ميه نازله من الرادياتير ما اعرفش جايه منين المهم العربيه بردت زودت الميه الخضرا كان معايا شويه وقفلت القربه ودورت مافيش ميه نازله من الرادياتير اخدت طريقي العداد كان على 90 عشان كنت على طريق طوالي ومش قارص على العربيه المهم وصلت البيت لقيت المروحه شغاله وزي الفل حد يفسرلي اللي بيحصل ده ممكن يكون سببه ايه وهل لو الميه نقصت شويه ممكن تسخن العربيه بالشكل ده وحاجه اخيره ازاي اسحب الهوا بنفسي من دورة المياه بتاعة التبريد

**aYaBooY** · 26-02-2009 11:03 AM

على ما اعتقد انه حصل نقصان كبير في المياه عندك عن المستوي الي فيه الترموستات بتاع الردياتير و بالتالي مبقاش فيه مياه يقيس حرارتها و لما حضرتك وصلت عند البيت كان فيه مياه واصلة للمستوي بتاعه و بالتالي اشتغل
علشان العربيات الفيات بيكون الترموستات في الريدياتير و هو الي بيشغل المروحة و بيكون فيه حاجة اسمها صباع الحرارة في الموتور و ده الي بيشغل العداد الي ادامك
اما عن موضوع الهواء ده معرفش بس انت لازم تروح لحد بتاع ريدياتير يكشفلك على دورة التبريد و ينظفهالك ان كان فيه حاجة في الريدياتير يصلحة و حمد لله على سلامتك فوق كل حاجة

**ZALABANY** · 26-02-2009 11:08 AM

حضرتك تقصد ان الثرموستات اللي بيشغل المروحه ماكانش واصله ميه سخنه عشان الميه قلت لسبب أو لآخر عشان كده المروحه ما اشتغلتش
والله انا شايفه سبب منطقي بس مش عارف أكيد حد من الإخوه هايأكدلنا المعلومه لأن الموضوع ده كان بيحصل معايا في ال 28 كتييييير وغيرت بسببه الترموستات اكتر من مره بس الثرموستات بتاعة ال 28 تحت الرادياتير في التمبرا مش عارف

**zeyad1810** · 26-02-2009 01:10 PM

طالما كان فية نقط مية نازلة من الريادتير يبقى الافضل تروح لبتاع ريادتير يكشفلك التسريب جاى منين علشان تكون فى الامان وخلية ياخدلك هوا وشوفة بيعمل اية هتلاقى العملية سهلة جدا وهتتعلمها

**ahmed_su** · 26-02-2009 01:50 PM

بالوصف ده يبقى دورة التبريد فيها هواء بنسبة كبيرة

وبيؤدى لتكوين فقعة هوائية فى مسار المياه والثيرموستات

مبيحسش بحرارة المياه الفعلية وبالتالى مخلاش المروحة تشتغل

فحرارة المياه زادت لبعد درجة الغليان وضغط البخار القوى ادى

لتسرب المياه من الاماكن الضعيفة فى دورة التبريد زى كوليهات

الخراطيم او خرطوم رجوع المياه الى القربة او مسمار سحب الهواء البلاستيك

فى الردياتير وانت لم وقفت وفتحت القربة علشان تزود الميه خرج جزء من الهواء

المتجمع فى دورة التبريد وبتالى الثيرموستات حس بدرجة حرار المياه وشغل المروحة

90% من سبب دخول هواء دورة التبريد بيكون من الخراطيم الكوتش لانها

بعد فترة بتجف وما بتبقاش محكمة فبتسرب هواء الى داخل الدورة

راجع على الخراطيم كويس جدا وخاصة ناحية الكوليهات سواء من ناحية

الردياتير او من ناحية الموتور.

**galilio_mad** · 26-02-2009 05:17 PM

الموضوع ده حصل معايا مرة واحده
زى ما كذا حد من الاخوه قالك , الردياتير ما كانش فيه ميه فبالتالى مش لاقى حاجه يقيس حرارتها
بس لو حصلت تانى , تقف على طول و تبطلها و تهوى القربة حاجة بسيطه جدا تسمح بس بخروج البخار
اوعى تشيل الغطا او تهويه زياده الا لما الضغط كله يتسرب ( عادة بتاخد 3-5 دقايق )

الردياتير ممكن يكون سليم بس الضغط الجامد خلاه يسرب من حته ضعيفة شوية لان الاجناب بلاستيك
لما تكون العربيه باردة افتح الكبوت بس يكون الصبح عشان النور , حاول تبص على اى اثار تسريب ميه من الخراطيم او الكوليهات
برضو بص جنب و تحت المانيفولد و كمان من ناحية الكاتينة على طرمبة الميه ( تحت طرمبة الباور يمين سنه )

لو مفيش اى اثار , امشى بالعربية و بص على مستوى الميه كام يوم و إن شاء الله سليمة

موضوع الهوا , ادينى شويه بس اروح عشان انا لسه فى الشغل و حاصورلك كام صورة للعمليه و اكتبلك شرح تفصيلى
و دى نمرتى 0124234223 و اسمى احمد جلال و ساكن فى مصر الجديدة , لو عندك اى استفسار او تحب اقابلك انا تحت امرك

**ZALABANY** · 26-02-2009 05:26 PM

جلال باشا مش عارف أقولك إيه حقيقي أنت مغرقني بجمايلك جزاك الله كل خير
وطبعا المهندس أحمد ربنا يكرمك على نصايحك الغاليه
وجميع الإخوه اللي بيشاركوا معانا

**galilio_mad** · 26-02-2009 06:05 PM

يا راجل ما تقولش كده, ده كله من فضل الله

معلش بقى خلى موضوع الصور ده الصبح عشان الدنيا ضلمت و مش حاعرف اصور اى حاجة

و بالمناسبة , ترموستات المروحة حتلاقية فى الردياتير من تحت على اليمين تحت خرطوم المية اللى رايح على الكوعة